ମୁମ୍ବାଇ,୩।୧(ପି.ଟି.): ପ୍ରଥମଥର ପାଇଁ କ୍ରିକେଟ ଆଇକନ ସଚିନ ତେନ୍ଦୁଲକରଙ୍କ ପୁଅ ଅର୍ଜୁନ ମୁମ୍ବାଇ ସିନିୟର ଦଳରେ ସ୍ଥାନ ପାଇଛନ୍ତି। ଯୁବ ବାମହାତୀ ଦ୍ରୁତ ବୋଲର ଅର୍ଜୁନଙ୍କୁ ସୟଦ ମୁସ୍ତାକ ଅଲି ଟ୍ରଫି ପାଇଁ ମୁମ୍ବାଇର ବର୍ଦ୍ଧିତ ୨୨ ଜଣିଆ ଦଳରେ ସାମିଲ କରାଯାଇଛି। ମୁମ୍ବାଇ ଦଳର ମୁଖ୍ୟ ଚୟନକର୍ତ୍ତା ସଲିଲ୍ ଆଙ୍କୋଲାଙ୍କ ଶନିବାର ଏ ନେଇ ସୂଚନା ଦେଇଛନ୍ତି। ଅର୍ଜୁନଙ୍କୁ ବାଦ୍ ଦେଲେ ଅନ୍ୟତମ ଦ୍ରୁତ ବୋଲର କ୍ରୁତିକ ହାନାଗାଭାଡିଙ୍କୁ ଏହି ଦଳରେ ସାମିଲ କରାଯାଇଛି।
ପ୍ରଥମ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ୨୦ଜଣ ଖେଳାଳିଙ୍କୁ ଚୟନ କରିବାକୁ ନିର୍ଦ୍ଦେଶ ଦେଇଥିଲା। ତେବେ ପରେ ବୋର୍ଡ ୨୨ଜଣ ଖେଳାଳିଙ୍କୁ ଦଳରେ ସାମିଲ କରାଯାଇପାରିବ ବୋଲି କହିଥିଲା। ଫଳରେ ଏହି ଦୁଇ ଖେଳାଳିଙ୍କୁ ପରେ ସାମିଲ କରାଯାଇଛି ବୋଲି ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ) ତରଫରୁ କୁହଯାଇଛି। ଏଥି ସହିତ ୨୧ ବର୍ଷୀୟ ଅର୍ଜୁନ ପ୍ରଥମଥର ପାଇଁ ମୁମ୍ବାଇ ସିନିୟର ଦଳରେ ସାମିଲ ହେବାର ସୌଭାଗ୍ୟ ପାଇଛନ୍ତି। ସେ ପୂର୍ବରୁ ବିଭିନ୍ନ ବୟସ ବର୍ଗରେ ମୁମ୍ବାଇ ତରଫରୁ ବହୁ ଟୁର୍ନାମେଣ୍ଟ ଓ ଆମନ୍ତ୍ରଣୀୟ ଟୁର୍ନାମେଣ୍ଟରେ ଅଂଶଗ୍ରହଣ କରିଆସୁଥିଲେ। ପୂର୍ବରୁ ସେ ଭାରତୀୟ ଜାତୀୟ ଦଳ ପାଇଁ ନେଟ୍ସରେ ବୋଲିଂ କରିବାର ସୁଯୋଗ ହାସଲ କରିଥିଲେ। ସେ ମଧ୍ୟ ଭାରତୀୟ ୧୯ ବର୍ଷରୁ କମ୍ ଦଳରେ ସାମିଲ ହୋଇ ଶ୍ରୀଲଙ୍କା ଗସ୍ତ କରିଥିଲେ। ଯୁବ ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବଙ୍କ ନେତୃତ୍ୱରେ ମୁମ୍ବାଇ ତା’ର ସବୁ ମ୍ୟାଚ ରାଜ୍ୟର ରାଜଧାନୀରେ ଖେଳିବ। ଜାନୁୟାରୀ ୧୦ ତାରିଖରୁ ଜାତୀୟ ଟି୨୦ ଚାମ୍ପିୟନଶିପ୍ ରୂପେ ବିବେଚିତ ହେଉଥିବା ସୟଦ ମୁସ୍ତାକ ଅଲି ଟି୨୦ ଘରୋଇ ଟୁର୍ନାମେଣ୍ଟ ଆରମ୍ଭ ହେବ।