ଅବୁଜା,୧୦ ।୧: ନାଇଜେରଆର ଏକ ଗାଁରେ ବଡ ଧରଣର ନରସଂହାର ହୋଇଥିବା ଖବର ମିଳିଛି । ଯେଉଁଥିରେ ଶହ ଶହ ଲୋକଙ୍କ ଜୀବନ ଯାଇଛି । ସ୍ଥାନୀୟ ଗଣମାଧ୍ୟମର ସୂଚନା ଅନୁଯାୟୀ, ଉତ୍ତର-ପଶ୍ଚିମ ନାଇଜେରିଆର ଜମ୍ଫାରା ରାଜ୍ୟର ଏକ ଗାଁରେ କେତେଜଣ ସଶସ୍ତ୍ର ଡକାୟତ ଗ୍ରାମବାସୀଙ୍କ ଉପରକୁ ଆଖିବୁଜା ଗୁଳି ଚାଳନା କରିଥିଲେ । ଯେଉଁଥିରେ ୨୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା କୁହାଯାଉଛି । ମୃତକଙ୍କ ସମାଧି ପାଇଁ ସେନାର ସହାୟତା ନିଆଯାଇଛି । ଏହି ଘଟଣାରେ ୫୮ ଜଣ ଗ୍ରାମବାସୀଙ୍କ ମୃତ୍ୟୁ ହୋଇଥିବା ରାଜ୍ୟ ସରକାର କହିଛନ୍ତି । ହେଲେ ଜଣେ ପ୍ରତ୍ୟେକ୍ଷଦର୍ଶୀ ଯେ କି ଏହି ଆକ୍ରମଣରେ ନିଜର ୩ ପିଲା ଓ ସ୍ତ୍ରୀଙ୍କୁ ହରାଇଛନ୍ତି ସେ କହିଛନ୍ତି ଅତିକମରେ ସଶସ୍ତ୍ର ଡକାୟତଙ୍କ ଆକ୍ରମଣରେ ୨୦୦ରୁ ଅଧିକ ଲୋକଙ୍କ ଜୀବନ ଯାଇଛି । ଏପର୍ଯ୍ୟନ୍ତ ୧୫୪ ଜଣଙ୍କ ମୃତୁଦେହକୁ ପୋତି ଦିଆ ସରିଲାଣି ।
ସୂଚନାଯୋଗ୍ୟ, ସୋମବାର ସଶସ୍ତ୍ର ଡକାୟତଙ୍କ ଆଡ୍ଡାସ୍ଥଳ ଜମ୍ଫାରା ରାଜ୍ୟର ଗୁସାମି ଜଙ୍ଗଲ ଓ ପଶ୍ଚିମ ତସ୍ମରେ ଗାଁ ଉପରେ ସେନା ପକ୍ଷରୁ ବିମାନ ଆକ୍ରମଣ କରାଯାଇଥିଲା । ଯେଉଁଥିରେ ଡକାୟତଙ୍କ ୨ ଲିଡରଙ୍କ ସମେତ ୧୦୦ରୁ ଅଧିକ ଡକାୟତଙ୍କ ମୃତ୍ୟୁ ହୋଇଥିଲା । ଏହାର ପ୍ରତିଶୋଧ ନେବାକୁ ଯାଇ ଡକାୟତମାନେ ଗ୍ରାମବାସୀଙ୍କ ଉପରେ ଗୁଳି ଚାଳନା କରିଥିବା କୁହାଯାଉଛି ।
