ଢେଙ୍କାନାଳ ଅଫିସ, ୧୮ା୩-ପାଖେଇ ଆସୁଛି ପୌର ନିର୍ବାଚନ। କମ୍ପୁଛି ପ୍ରଚାର ମଇଦାନ। ପ୍ରତିପକ୍ଷଙ୍କୁ ପରାସ୍ତ କରିବାକୁ ପ୍ରମୁଖ ରାଜନୈତିକ ଦଳ ରଣନୀତି ପ୍ରସ୍ତୁତି ଚଳାଇଥିବାବେଳେ ସରଗରମ ହୋଇଉଠିଛି ଢେଙ୍କାନାଳ ସହରାଞ୍ଚଳ ରାଜନୈତିକ ବାତାବରଣ। ଏସବୁ ମଧ୍ୟରେ ସମସ୍ତଙ୍କ ନଜର ଅଟକିଛି ୪, ୫ ଏବଂ ୬ନଂ. ଓ୍ବାର୍ଡ ଉପରେ। ୪ନଂ. ଓ୍ବାର୍ଡ ମହିଳାଙ୍କ ପାଇଁ ସଂରକ୍ଷିତ ରହିଥିବାବେଳେ ସବୁ ରାଜନୈତିକ ଦଳ ନୂଆ ପ୍ରାର୍ଥୀଙ୍କୁ ନେଇ ଭାଗ୍ୟ ପରୀକ୍ଷା କରୁଛନ୍ତି। ସେହିପରି ୫ ଓ ୬ନଂ. ଓ୍ବାର୍ଡରେ ଦଳଡିଅଁାଙ୍କ ମଧ୍ୟରେ ଲଢ଼େଇ ହେଉଛି। ତେଣୁ ଏହିସବୁ ଓ୍ବାର୍ଡକୁ କରାୟତ୍ତ କରିବା ଉଭୟ ବିଜେଡି ଏବଂ ଭାଜପା ପାଇଁ ସମ୍ମାନର ପ୍ରଶ୍ନ ହୋଇଛି।
ଗୁଡିଆନାଳି, ଭାଗିରଥୀ ବିହାର ‘ଏ’ ଓ ‘ବି’ ବ୍ଲକ, ଟାଉନ ଥାନା ପଛ ପାର୍ଶ୍ୱ ଆଦି ଅଞ୍ଚଳକୁ ନେଇ ଗଠିତ ୪ନଂ ଓ୍ବାର୍ଡର ଭୋଟର ସଂଖ୍ୟା ୨ ହଜାର ୪୩୮। ୨୦୦୩ରେ ଏହି ଓ୍ବାର୍ଡ କଂଗ୍ରେସ କବ୍ଜାରେ ଥିଲା। ଏଥର ବିଜେଡିର ଲିପିକା ଦାସ, ଭାଜପାର ରତ୍ନପ୍ରଭା ଆଏଚ୍, କଂଗ୍ରେସର ସୋନାଲି ସ୍ବାଇଁ ଏବଂ ସ୍ବାଧୀନ ଭାବେ ଐଶ୍ୱର୍ଯ୍ୟା ମହାନ୍ତି ନିର୍ବାଚନ ଲଢୁଛନ୍ତି। ଏହି ଓ୍ବାର୍ଡ କଂଗ୍ରେସ ପାଇଁ ସମ୍ମାନର ପ୍ରଶ୍ନ ହୋଇଥିବାବେଳେ ସ୍ବାଧୀନ ପ୍ରାର୍ଥୀ ନିର୍ଣ୍ଣାୟକ ଭୂମିକାରେ ଅବତୀର୍ଣ୍ଣ ହେବା ସମ୍ଭାବନା ରହିଛି। ପାନୀୟ ଜଳ, ଶୋଚନୀୟ କଂକ୍ରିଟ୍ ରାସ୍ତା ଓ୍ବାର୍ଡବାସୀଙ୍କ ଦୀର୍ଘଦିନର ସମସ୍ୟା ପାଲଟିଛି।
ଗତ ନିର୍ବାଚନରେ ୫ନଂ. ଓ୍ବାର୍ଡକୁ ହାତେଇ ନେଇଥିଲା କଂଗ୍ରେସ। ହେଲେ ଚଳିତ ଥର କଂଗ୍ରେସ ଶୂନ୍ୟ ରହିଛି ଏହି ଓ୍ବାର୍ଡ। ଶେଷ ସମୟରେ ଦଳୀୟ ପ୍ରାର୍ଥୀ ନାମାଙ୍କନ ପ୍ରତ୍ୟାହାର କରି ନେବା ପରେ କଂଗ୍ରେସ ଛାଡି ବିଜେଡିରେ ଯୋଗ ଦେଇଥିବା ପ୍ରକାଶ ଚନ୍ଦ୍ର କୁଅଁର, ଭାଜପାର ନୂଆ ମୁହଁ ରୁଦ୍ରନାରାୟଣ ତ୍ରିପାଠୀ ଏବଂ ସ୍ବାଧୀନ ପ୍ରାର୍ଥୀ ଦେବେଶ କୁମାର ମିଶ୍ରଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି। ଅମଲାପଡ଼ା ବସ୍ଷ୍ଟାଣ୍ଡ, ଚାନ୍ଦମାରିସାହି ଆଦି ଅଞ୍ଚଳକୁ ନେଇ ଗଠିତ ଏହି ଓ୍ବାର୍ଡର ଭୋଟର ସଂଖ୍ୟା ୧,୫୫୦। ରାସ୍ତାଘାଟ, ଡ୍ରେନେଜ୍, ପାନୀୟଜଳ ସମସ୍ୟାକୁ ନେଇ ଏହି ଓ୍ବାର୍ଡରେ ତୀବ୍ର ଅସନ୍ତୋଷ ଲାଗି ରହିଥିବାବେଳେ ସମସ୍ୟା ସମାଧାନ କରିବାକୁ ପ୍ରତିଶ୍ରୁତି ଦେଇ ପ୍ରାର୍ଥୀମାନେ ଭୋଟରଙ୍କ ନିକଟତର ହେବାକୁ ଉଦ୍ୟମ କରୁଛନ୍ତି।