ଓ୍ବାଶିଂଟନ୍/ମ୍ୟୁନିକ୍,୨୦ା୨: ଆମେରିକା ପରରାଷ୍ଟ୍ର ସଚିବ ଆଣ୍ଟୋନି ବ୍ଲିଙ୍କେନ୍ ରବିବାର ଚାଇନାକୁ କଡ଼ା ଚେତାବନୀ ଦେଇଛନ୍ତି। ୟୁକ୍ରେନ୍ ବିରୋଧୀ ଯୁଦ୍ଧରେ ରୁଷିଆକୁ ଚାଇନା ଅସ୍ତ୍ରଶସ୍ତ୍ର ଓ ଅନ୍ୟ ସାମରିକ ଉପକରଣ ଯୋଗାଇଦେଲେ ଏହାର ପରିଣାମ ଭୟଙ୍କର ହେବ ବୋଲି ସେ କହିଛନ୍ତି। ସେହିପରି ଚାଇନାର ଗୁପ୍ତଚର ବେଲୁନ୍ ଆମେରିକୀୟ ସାର୍ବଭୌମତ୍ୱକୁ ଉଲ୍ଲଂଘନ କରିବା ଗ୍ରହଣୀୟ ନୁହେଁ ବୋଲି ବ୍ଲିଙ୍କେନ୍ ନିନ୍ଦା କରିଛନ୍ତି।
ମ୍ୟୁନିକ୍ ଗ୍ଲୋବାଲ ସିକ୍ୟୁରିଟି କନ୍ଫରେନ୍ସ ପରିପ୍ରେକ୍ଷୀରେ ଚାଇନାର ବରିଷ୍ଠ କୂଟନୀତିଜ୍ଞ ଓ୍ବାଙ୍ଗ୍ ୟି ଏବଂ ବ୍ଲିଙ୍କେନ୍ଙ୍କ ମଧ୍ୟରେ ସାକ୍ଷାତ୍ ହୋଇଛି। ଆମେରିକା ବେଲୁନ୍କୁ ନେଇ ଅତ୍ୟଧିକ ହଟଚମଟ ସୃଷ୍ଟି କରୁଛି ବୋଲି ଓ୍ବାଙ୍ଗ୍ ୟି ମନ୍ତବ୍ୟ ଦେବାର କିଛି ଘଣ୍ଟା ପରେ ଉଭୟେ ପରସ୍ପରକୁ ଭେଟିଛନ୍ତି। ସାକ୍ଷାତ ପରେ ଏକ ଇଣ୍ଟରଭ୍ୟୁରେ ବ୍ଲିଙ୍କେନ୍ କହିଛନ୍ତି, ବେଜିଂକୁ ବେଲୁନ୍ ପ୍ରସଙ୍ଗରେ ସ୍ପଷ୍ଟ ଚେତାବନୀ ଦିଆଯାଇଛି।
ଚାଇନା ବେଲୁନ୍ ୫ ମହାଦେଶର ୪୦ରୁ ଊର୍ଦ୍ଧ୍ୱ ଦେଶକୁ ଅନୁପ୍ରବେଶ କରିଥିବା ବିଶ୍ୱବାସୀ ଜାଣିସାରିଲେଣି। ୟୁକ୍ରେନ୍ ଯୁଦ୍ଧରେ ଚାଇନା ରୁଷିଆକୁ ଯୁଦ୍ଧାସ୍ତ୍ର ଓ ଅନ୍ୟ ସାମରିକ ଉପକରଣ ଯୋଗାଇଲେ ଏହାର ପରିଣାମ ବିପଜ୍ଜନକ ହେବ ବୋଲି ବ୍ଲିଙ୍କେନ୍ କହିଛନ୍ତି। ପ୍ରକାଶ ଯେ, ନିକଟରେ ଚାଇନା ବେଲୁନ୍କୁ ନେଇ ବ୍ଲିଙ୍କେନ୍ ନିଜ ବେଜିଂ ଗସ୍ତ ବାତିଲ କରିଥିଲେ। ଚାଇନାର ବହିର୍ବ୍ୟାପାର ସେଣ୍ଟ୍ରାଲ କମିଶନ ଅଫିସ ନିର୍ଦ୍ଦେଶକ ଓ୍ବାଙ୍ଗ୍ ୟିଙ୍କ ମତରେ ବେଲୁନ୍ ଉପାଖ୍ୟାନ ହେଉଛି ଆମେରିକା ଦ୍ୱାରା ପ୍ରାୟୋଜିତ ଏକ ରାଜନୈତିକ ପ୍ରହସନ। ଚାଇନାକୁ ଅତିକ୍ରମ କରିବା ପାଇଁ ଆମେରିକା ସବୁ ପ୍ରକାର ଉପାୟ ଆପଣାଇଛି।
ବେଲୁନ୍ ଉପାଖ୍ୟାନ
୪ରେ ଆମେରିକାର ସାଉଥ କାରୋଲିନା ସମୁଦ୍ର କୂଳ ନିକଟରେ ଚାଇନାର ଏକ ବେଲୁନ୍କୁ ଓ୍ବାଶିଂଟନ ଖସାଇ ଦେଇଥିଲା।
ଏହାକୁ ଗୁପ୍ତଚର ବେଲୁନ୍ କହି ଚାଇନାକୁ ଟାର୍ଗେଟ କରିଥିବାବେଳେ ବେଜିଂ ଅଭିଯୋଗକୁ ଖଣ୍ଡନ କରିଥିଲା।
୧୦ରେ ଆଲାସ୍କାର ଡେଡ୍ହର୍ସ ଆକାଶରେ ଏକ ଅଜଣା ବସ୍ତୁ ଉଡ଼ୁଥିବା ଦେଖିବାକୁ ମିଳିଥିଲା। ଏହାକୁ ମଧ୍ୟ ଆମେରିକା ଖସାଇ ଦେଇଥିଲା।
୧ରେ କାନାଡାର ୟୁକୋନ୍ ଆକାଶରେ ଆଉ ଏକ ଅଚିହ୍ନା ଉଡ଼ନ୍ତା ବସ୍ତୁ (ୟୁଏଫ୍ଓ) ଦେଖିବାକୁ ମିଳିଥିଲା, ଯାହାକୁ ଆମେରିକୀୟ ସେନା ସହାୟତାରେ ଖସାଇ ଦିଆଯାଇଥିଲା।
୧୨ରେ ଆମେରିକା-କାନାଡା ସୀମାନ୍ତ ମିଶିଗାନ୍ରେ ଏକ ଆଠକୋଣୀୟ ୟୁଏଫ୍ଓକୁ ଆମେରିକୀୟ ସେନା ଖସାଇଥିଲା।