ଖାରତୁମ୍, ୨୨ା୯: ଉତ୍ତର-ପୂର୍ବ ଆଫ୍ରିକୀୟ ଦେଶ ସୁଦାନରେ ସରକାରକୁ କ୍ଷମତାଚ୍ୟୁତ କରି ଶାସନ ନିଜ ହାତକୁ ନେବାକୁ ସେନାର ଏକ ଗୋଷ୍ଠୀ ମଙ୍ଗଳବାର ଉଦ୍ୟମ କରିଛନ୍ତି। ସେମାନଙ୍କ ଏହି ଯୋଜନା ବିଫଳ ହୋଇଛି ବୋଲି ସୁଦାନର ପ୍ରାଧିକରଣ କର୍ତ୍ତୃପକ୍ଷଙ୍କ ପକ୍ଷରୁ କୁହାଯାଇଛି। ଷଡ଼ଯନ୍ତ୍ରକାରୀ ସରକାରୀ ଗଣମାଧ୍ୟମ ଭବନ ଏବଂ ସେନା ମୁଖ୍ୟାଳୟକୁ କବ୍ଜା କରିବାକୁ ଚେଷ୍ଟା କରିଥିଲେ। ଦେଶର ରୁଲିଂ କାଉନସିଲ ଏବଂ ମିଲିଟାରି ସରକାରଙ୍କ ନିୟନ୍ତ୍ରଣରେ ରହିଥିବା ଜଣାଯାଇଛି।
ଦଶନ୍ଧିର ଶାସନ ପରେ ୨୦୧୯ ଏପ୍ରିଲରେ ପୂର୍ବତନ ରାଷ୍ଟ୍ରପତି ଓମାର ଅଲ୍-ବଶିରଙ୍କୁ ବିଦ୍ରୋହ ବଳରେ ଶାସନରୁ ହଟାଯାଇଥିଲା। ଏହାର ୩ ବର୍ଷ ପରେ ଦେଶରେ ଏହାର ପୁନରାବୃତ୍ତି ଉଦ୍ୟମ ଘଟଣା ସୁଦାନର ଦୁର୍ବଳ ଗଣତନ୍ତ୍ର ବ୍ୟବସ୍ଥା ପୁଣି ସାମ୍ନାକୁ ଆସିଛି। ବଶିରଙ୍କ ସମର୍ଥକ, ସେନା ଏବଂ ବାହାର ଲୋକ ଏହି ବିଦ୍ରୋହ ଉଦ୍ୟମ କରିଥିବା ସୁଦାନର ପ୍ରଧାନମନ୍ତ୍ରୀ ଅବଦ୍ଦଲ୍ଲା ହାମ୍ଦକ୍ କହିଛନ୍ତି। ସେନାର ଏହି ଗୋଷ୍ଠୀର ବିଦ୍ରୋହ ରୋକିବାକୁ ସରକାରୀ ମିଡିଆ ଜନସାଧାରଣଙ୍କୁ ଆହ୍ବାନ ଦେଇଛି। ତେବେ ସବୁକିଛି ନିୟନ୍ତ୍ରଣରେ ଅଛି ବୋଲି ସାମରିକ-ନାଗରିକ ପରିଷଦର ସଦସ୍ୟ ମହମ୍ମଦ ଅଲ-ଫିକି ସୁଲେମାନ ଫେସ୍ବୁକରେ ଏକ ପୋଷ୍ଟ କରିଛନ୍ତି। ଏଥିରେ ସାମିଲ ଥିବା ଉଚ୍ଚ ର଼୍ୟାଙ୍କ୍ର ଅଫିସରଙ୍କ ସମେତ ସମସ୍ତ ସୈନ୍ୟଙ୍କୁ ଗିରଫ କରାଯାଇଛି। ସବୁଠୁ ଲମ୍ବା ସମୟ ଧରି ସରକାରରେ ଥିବା ରାଷ୍ଟ୍ରପତି ଅଲ୍-ବଶିରଙ୍କୁ କ୍ଷମତାଚ୍ୟୁତ କରାଯିବା ପରେ କ୍ଷମତା ବାଣ୍ଟିବା ପାଇଁ ଏକ ଚୁକ୍ତି ହୋଇଥିଲା। ସାମରିକ, ସାଧାରଣ ନାଗରିକ ପ୍ରତିନିଧି ଏବଂ ବିରୋଧ କରୁଥିବା ଗୋଷ୍ଠୀକୁ ନେଇ ଏକ ସରକାର ଗଠନ ପାଇଁ ସହମତି ହୋଇଥିଲା। ଏବେ ଦେଶରେ ନାଗରିକ ଏବଂ ସେନାର ମିଳିତ ସରକାର ରହିଛି।
