ଶ୍ରୀନଗର,୨୦।୨ : ଜମ୍ମୁ-କଶ୍ମୀରରୁ ଧାରା ୩୭୦ ହଟାଯିବାର ପ୍ରାୟ ସାଢ଼େ ତିନି ବର୍ଷ ପରେ କେନ୍ଦ୍ର ସରକାର ବର୍ତ୍ତମାନ ଏଠାରେ ମୁତୟନ ହୋଇଥିବା ସୈନ୍ୟଙ୍କୁ ହଟାଇବାକୁ ଚିନ୍ତା କରୁଛନ୍ତି। ସ୍ବତନ୍ତ୍ର ମାନ୍ୟତା ଉଚ୍ଛେଦ ଏଠାରେ ବହୁ ସଂଖ୍ୟକ ସୁରକ୍ଷା ବାହିନୀ ମୁତୟନ କରାଯାଇଥିଲା। ଏଥିସହ ଖବର ଆସିଛି ଯେ ବର୍ତ୍ତମାନ ଉପତ୍ୟକାର ଭିତର ଭାଗରୁ ଭାରତୀୟ ସେନାକୁ ଧୀରେ ଧୀରେ ପ୍ରତ୍ୟାହାର କରିବାକୁ କେନ୍ଦ୍ର ସରକାର ଚିନ୍ତା କରୁଛନ୍ତି। ଯଦି ଏହା ଘଟେ, ତେବେ ଭାରତୀୟ ସେନାର ଉପସ୍ଥିତି କେବଳ ନିୟନ୍ତ୍ରଣ ରେଖା ମଧ୍ୟରେ ସୀମିତ ରହିବ ।
ସୁରକ୍ଷା ବାହିନୀର ଅଧିକାରୀଙ୍କ ଅନୁସାରେ ଜମ୍ମୁ-କଶ୍ମୀରର ଆଭ୍ୟନ୍ତରୀଣ ଅଞ୍ଚଳରୁ ସେନା ହଟାଇବା ପ୍ରସ୍ତାବ ଉପରେ ଦୁଇ ବର୍ଷ ଧରି ଆଲୋଚନା କରାଯାଉଛି। ପ୍ରତିରକ୍ଷା ମନ୍ତ୍ରଣାଳୟ, ଗୃହ ମନ୍ତ୍ରଣାଳୟ, ସୁରକ୍ଷା ବାହିନୀ ଏବଂ ଜମ୍ମୁ-କଶ୍ମୀର ପୋଲିସର ଯୋଗଦାନ ସହିତ ଏହି ବାର୍ତ୍ତାଳାପ ଗତିଶୀଳ ହୋଇଛି। ଉପତ୍ୟକାରେ ଆଇନ ଶୃଙ୍ଖଳା ତଥା ଆତଙ୍କବାଦ ବିରୋଧୀ କାର୍ଯ୍ୟ ପାଇଁ ଭାରତୀୟ ସେନା ସହିତ ନିୟୋଜିତ ସିଆରପିଏଫ ପ୍ରତ୍ୟାହାର କରାଯାଇପାରେ।
ରିପୋର୍ଟ ଅନୁଯାୟୀ, ସେନା ଅଧିକାରୀ କହିଛନ୍ତି ଯେ ମନ୍ତ୍ରଣାଳୟ ସ୍ତରରେ ଏହି ବିଷୟରେ ଆଲୋଚନା ହେଉଛି ଏବଂ ଏନେଇ ଶୀଘ୍ର ପଦକ୍ଷେପ ଗ୍ରହଣ କରାଯାଇପାରେ।
ଅଧିକାରୀଙ୍କ କହିବାନୁସାରେ, ଭାରତୀୟ ସେନା ଜମ୍ମୁ-କଶ୍ମୀରରେ ପ୍ରାୟ ଲକ୍ଷେ ୩୦ ହଜାର ସୈନିକ ମୁତୟନ କରିଛନ୍ତି। ସେଥିମଧ୍ୟରୁ ପ୍ରାୟ ୮୦ ହଜାର ଭାରତ ସୀମାରେ ନିୟୋଜିତ ହୋଇଛନ୍ତି। ରାଷ୍ଟ୍ରୀୟ ରାଇଫଲ୍ସର ପ୍ରାୟ ୪୦ ରୁ ୪୫ ହଜାର ସୈନିକ ଆଭ୍ୟନ୍ତରୀଣ ଅଞ୍ଚଳରେ ଆତଙ୍କବାଦ ବିରୋଧୀ କାର୍ଯ୍ୟରେ ନିୟୋଜିତ ଅଛନ୍ତି। ଏଥି ସହିତ, ସିଆରପିଏଫର ପ୍ରାୟ ୬୦ ହଜାର ଯବାନ ମୁତୟନ ରହିଛନ୍ତି। ସେଥିମଧ୍ୟରୁ ୪୫ ହଜାର କଶ୍ମୀର ଉପତ୍ୟକାରେ ନିୟୋଜିତ ଅଛନ୍ତି। ଜମ୍ମୁ-କଶ୍ମୀର ପୋଲିସର ୮୩ ହଜାର ଯବାନ ଏହି କାର୍ଯ୍ୟରେ ନିୟୋଜିତ ରହିଛନ୍ତି। ଏହା ସହିତ ସିଏପିଏଫର କିଛି କମ୍ପାନୀ ମଧ୍ୟ ଉପତ୍ୟକାରେ ଅଛନ୍ତି ।