ନୂଆଦିଲ୍ଲୀ, ୧୨ା୨: ଯୌନ ଶୋଷଣ ଅଭିଯୋଗରେ ଦିଲ୍ଲୀର ଏକ କୋର୍ଟ ଭାରତୀୟ ୧୭ ବର୍ଷରୁ କମ୍ ମହିଳା ଫୁଟ୍ବଲ ଟିମ୍ର ପୂର୍ବତନ ସହକାରୀ କୋଚ୍ ଆଲେକ୍ସ ମାରିଓ ଆମ୍ବ୍ରୋସ୍ଙ୍କ ବିରୋଧରେ ଗିରଫ ପରଓ୍ବାନା ଜାରି କରିଛନ୍ତି। ଯୌନ ଅପରାଧରୁ ଶିଶୁ ସୁରକ୍ଷା (ପୋସ୍କୋ) ଆଇନର ଧାରା ୧୨ (ଯୌନ ନିର୍ଯାତନା ପାଇଁ ଦଣ୍ଡ ବିଧାନ) ଅନୁସାରେ ଆମ୍ବ୍ରୋସଙ୍କ ବିରୋଧରେ ଦ୍ୱାରକା ସେକ୍ଟର ୨୩ ପୋଲିସ ଷ୍ଟେଶନରେ ଏକ ଏଫ୍ଆଇଆର ପଞ୍ଜୀକୃତ କରାଯାଇଥିଲା। ସହକାରୀ କୋଚ୍ ଜଣଙ୍କୁ ନରଓ୍ବେରୁ ଡକାଯାଇଛି। ୧୭ ବର୍ଷରୁ କମ୍ ମହିଳା ଫୁଟ୍ବଲ ଦଳର ୟୁରୋପ ଟୁର୍ ସମୟରେ ଏକ ଟ୍ରେନିଂ ବେଳେ ଆମ୍ବ୍ରୋସ ଜଣେ ଖେଳାଳିଙ୍କ ପ୍ରତି ଖରାପ ଆଚରଣ କରିଥିଲେ। ଏହି କାରଣରୁ ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ଗତବର୍ଷ ଜୁଲାଇରେ ଆମ୍ବ୍ରୋସଙ୍କୁ ବରଖାସ୍ତ କରିଥିଲା। ଶୁକ୍ରବାର ଅତିରିକ୍ତ ସେସନ ଜଜ୍ ଗଗନଦୀପ ଜିନ୍ଦଲ କୋଡ୍ ଅଫ୍ କ୍ରିମିନାଲ ପ୍ରୋସିଜିଓରର ଧାରା ୭୦ ଅନୁଯାୟୀ ଏକ ଗିରଫ ପରଓ୍ବାନା ଜାରି କରିଛନ୍ତି। କୋର୍ଟ ଆହୁରି ମଧ୍ୟ ସିଆର୍ପିସି ଧାରା ୪୪୬ ଅନୁସାରେ ଏକ ବଣ୍ଡ୍ର ଉଲ୍ଲଂଘନ ପାଇଁ ନୋଟିସ ଜାରି କରିଛନ୍ତି। କୋର୍ଟ ପୂର୍ବରୁ ଗତବର୍ଷ ଅକ୍ଟୋବର ୨୭ରେ ଆମ୍ବ୍ରୋସଙ୍କ ବିରୋଧରେ ସମନ ଜାରି କରିଥଲେ।
