ବାଲିଗୁଡା/ଭୁବନେଶ୍ୱର,୧୭ା୧୧(ବ୍ୟୁରୋ): କନ୍ଧମାଳ ଜିଲା ବାଲିଗୁଡା ଥାନା ଅଞ୍ଚଳରୁ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ(ଏସ୍ଟିଏଫ୍) ୧୧ କେଜି ଓଜନର ଏକ ଜୀବନ୍ତ ବଜ୍ରକାପ୍ତା ଉଦ୍ଧାର କରିଛି। ଏସ୍ଟିଏଫ୍ ଘଟଣାରେ ସମ୍ପୃକ୍ତ ୨ ଚାଲାଣକାରୀଙ୍କୁ ଗିରଫ କରିଛି। ସେମାନେ ହେଲେ କନ୍ଧମାଳ ଜିଲା ବାଲିଗୁଡା ଥାନା ସୋନୁବାଡି ଗ୍ରାମର ଶିବାନନ୍ଦ ମଲିକ ଏବଂ ବରଖମା ଥାନା କାଳୀପୂସାଙ୍ଗିଆ ଗ୍ରାମର ରାସ୍ତରା ଭୋଇ।
ବୁଧବାର ବିଳମ୍ବିତ ରାତିରେ ଜାକିକିଆ ଗାଁ ନିକଟରେ ୨ଜଣ ଯୁବକ ବଜ୍ରକାପ୍ତା ଡିଲ୍ କରିବା ଉଦ୍ଧେଶ୍ୟରେ ଆସୁଥିବା ନେଇ ଏସ୍ଟିଏଫ୍କୁ ଖବର ମିଳିଥିଲା। ଏନେଇ ଏସ୍ଟିଏଫ୍ର ଏକ ଟିମ୍ ବାଲିଗୁଡା ବନବିଭାଗକୁ ଜଣାଇଥିଲା। ବନବିଭାଗ ଓ ଏସ୍ଟିଏଫ୍ ଟିମ୍ ପହଞ୍ଚତ୍ ବଜ୍ରକାପ୍ତାକୁ ଜବତ କରିବା ସହ ୨ ଅଭିଯୁକ୍ତଙ୍କୁ କାବୁ କରିଥିଲେ। ଗିରଫ ପରେ ସେମାନଙ୍କୁ ଏସ୍ଟିଏଫ୍ ବାଲିଗୁଡା ବନବିଭାଗକୁ ହସ୍ତାନ୍ତର କରିଥିଲା। ବନବଭାଗ ଏକ ମାମଲା ରୁଜୁ କରି ଉଭୟଙ୍କୁ କୋର୍ଟ ଚାଲାଣ କରିଛି। ଅପରପକ୍ଷରେ ସୁରକ୍ଷା ଦୃଷ୍ଟିରୁ ଉଦ୍ଧାର ବଜ୍ରକାପ୍ତାକୁ ବାଲିଗଡ଼ା ଡିଏଫ୍ଓଙ୍କୁ ହସ୍ତାନ୍ତ କରାଯାଇଛି। ତେବେ ଅଭିଯୁକ୍ତଦ୍ୱୟ ପାଖ ଜଙ୍ଗଲରୁ ବଜ୍ରକାପ୍ତାକୁ ଆଣିଥିବା ସନ୍ଦେହ କରାଯାଉଛି। ତେବେ ଏମାନେ କାହାକୁ ବିକ୍ରି କରିଥାନ୍ତେ, ପୂର୍ବରୁ କେତୋଟି ବଜ୍ରକାପ୍ତା ଚାଲାଣ କରିଛନ୍ତି ସେନେଇ ବନବିଭାଗ ଓ ଏସ୍ଟିଏଫ୍ ତଦନ୍ତ ଜାରି ରଖିଛି।