ମୁମ୍ବାଇ,୪।୪(ପି.ଟି.): ଅଷ୍ଟ୍ରେଲୀୟ ଅଭିଜ୍ଞ ବ୍ୟାଟ୍ସମ୍ୟାନ ଷ୍ଟିଭ୍ ସ୍ମିଥ୍ ଦିଲ୍ଲୀ କ୍ୟାପିଟାଲ୍ସ ଦଳରେ ଯୋଗ ଦେବାକୁ ଶନିବାର ମୁମ୍ବାଇରେ ଆସି ପହଞ୍ଚିଛନ୍ତି। ଏବେ ସେ ବାଧ୍ୟତାମୂଳକ ୭ ଦିନିଆ କ୍ୱାରାଣ୍ଟାଇନ୍ରେ ରହିବେ। ଏ ନେଇ ଦିଲ୍ଲୀ କ୍ୟାପିଟାଲ୍ସ ଟୁଇଟ୍ କରି ସୂଚନା ଦେବା ସହ ସ୍ମିଥ୍ଙ୍କ ଏକ ଫଟୋ ଅପ୍ଲୋଡ କରିଛି। ୩୧ ବର୍ଷୀୟ ସ୍ମିଥ୍ଙ୍କୁ ରାଜସ୍ଥାନ ରୟାଲ୍ସ ରିଲିଜ୍ କରିଥିଲା। ଫଳରେ ଗତ ଫେବୃୟାରୀରେ ହୋଇଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଅକ୍ସନରେ ଦିଲ୍ଲୀ କ୍ୟାପିଟାଲ୍ସ ତାଙ୍କୁ ୨.୨ କୋଟି ଟଙ୍କା ବିନିମୟରେ କ୍ରୟ କରିଥିଲା।
ଦିଲ୍ଲୀ ଦଳ ଇତିମଧ୍ୟରେ ଟ୍ରେନିଂ ଆରମ୍ଭ କରିଛି। ତେବେ ସ୍ମିଥ୍ ଓ ତାଙ୍କ ନିଜ ଦେଶର ଖେଳାଳି ମାର୍କସ ଷ୍ଟୋଇନିସ କିନ୍ତୁ ଦଳର ପ୍ରଥମ ମ୍ୟାଚ୍ ପୂର୍ବରୁ ଅଭ୍ୟାସ କରିବାର ସୁଯୋଗ ପାଇବେ ନାହିଁ। କାରଣ ଏହି ଦୁଇ ଖେଳାଳି କ୍ୱାରାଣ୍ଟାଇନରେ ରହିବେ। ଏପ୍ରିଲ ୧୦ ତାରିଖରେ ଦିଲ୍ଲୀର ପ୍ରଥମ ମ୍ୟାଚ୍ରେ ମହେନ୍ଦ୍ର ସିଂ ଧୋନୀଙ୍କ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଭେଟି ଅଭିଯାନ ଆରମ୍ଭ କରିବ। ଉଲ୍ଲେଖଥାଉ କି, ସ୍ମିଥ୍ ୨୦୧୯ରେ ରାଜସ୍ଥାନ ରୟାଲ୍ସ ଦଳରେ ଯୋଗ ଦେଇଥିଲେ ଓ ୨୦୨୦ରେ ଦଳର ନେତୃତ୍ୱ ନେଇଥିଲେ। ତେବେ ଦଳ ତାଲିକାର ସର୍ବନିମ୍ନ ସ୍ଥାନରେ ରହି ଅଭିଯାନ ଶେଷ କରିଥିଲା। ପୂର୍ବତନ ଅଷ୍ଟ୍ରେଲିଆ ଅଧିନାୟକ ରିକି ପଣ୍ଟିଂ ଦିଲ୍ଲୀର ହେଡ କୋଚ୍ ରହିଛନ୍ତି। ନିୟମିତ ଅଧିନାୟକ ଶ୍ରେୟାସ ଆୟାର ଇଞ୍ଜୁରି କାରଣରୁ ବାଦ୍ ପଡ଼ିଥିବାରୁ ଉଇକେଟ କିପର ବ୍ୟାଟ୍ସମ୍ୟାନ ରିଷଭ ପନ୍ତ ଦିଲ୍ଲୀର ନେତୃତ୍ୱ ନେବେ।