କଟକ ଅଫିସ, ୩।୧୧: ଦୀପାବଳି ପାଇଁ ପ୍ରସ୍ତୁତ ହୋଇଛି କଟକ ପୋଲିସ। ସମ୍ପୂର୍ଣ୍ଣ କଟକଣା ଭିତରେ ଦୀପାବଳୀ ଓ କାଳିପୂଜା ଆୟୋଜନ ହେବ। ରାଜ୍ୟ ସରକାରଙ୍କ ସ୍ବତନ୍ତ୍ର ରିଲିଫ କମିଶନର(ଏସ୍ଆର୍ସି)ଙ୍କ ଗାଇଡ୍ଲାଇନକୁ ପାଳନ କରାଯିବ। କାଳୀପୂଜାରେ ମୃଣ୍ମୟୀଙ୍କ ଉଚ୍ଚତା ୪ଫୁଟ କରାଯିବ। ଏ କ୍ଷେତ୍ରରେ ପୋଲିସ ସ୍ବତନ୍ତ୍ର ଦୃଷ୍ଟି ରଖିବ। ତେବେ ଏହି ଉତ୍ସବ ପାଇଁ ୧୫ ପ୍ଲାଟୁନ ପୋଲିସ ଫୋର୍ସ ମୁତୟନ ହେବ ବୋଲି କଟକ ଡିସିପି ପ୍ରତୀକ ସିଂ ସୂଚନା ଦେଇଛନ୍ତି। ଅନ୍ୟପକ୍ଷରେ ବାଣ ଦୋକାନ ଖୋଲିବା ନିମନ୍ତେ ଲାଇସେନ୍ସ ପ୍ରଦାନ କରାଯିବ। କୋଭିଡ କଟକଣା ମଧ୍ୟରେ ବାଣ ଦୋକାନ ଖୋଲିବା ଲାଗି ନିଷ୍ପତ୍ତି ହୋଇଛି। ଜନସାଧାରଣ ଘରେ ରହି ଉତ୍ସବର ମଜା ଉଠାଇବା ପାଇଁ ଡିସିପି ନିବେଦନ କରିଛନ୍ତି। ପୂଜା ସମୟରେ ସାଜସଜ୍ଜା କିମ୍ବା ଭସାଣି ବେଳେ ଶୋଭାଯାତ୍ରା ହେବ ନାହିଁ। ଗତବର୍ଷ ଭଳି ଚଳିତବର୍ଷ ପୂଜା ଆରମ୍ଭରୁ ବିସର୍ଜନ ପର୍ଯ୍ୟନ୍ତ ସହରର ସମସ୍ତ ଭାଗରେ ଫୋର୍ସ ସହ ପୋଲିସ ଅଫିସରଙ୍କୁ ନିୟୋଜିତ କରାଯିବ।
