ଭୁବନେଶ୍ୱର,୨୩ା୩ (ସ୍ପୋଟର୍ସ ବ୍ୟୁରୋ): ରାଜ୍ୟସ୍ତରୀୟ କଳାହାଣ୍ଡି କପ୍ କ୍ରିକେଟରେ ବୁଧବାର ସମ୍ବଲପୁର, କିଟ୍, ବୌଦ୍ଧ, କୋରାପୁଟ ଓ ବଲାଙ୍ଗୀର ବିଜୟ ହାସଲ କରିଛନ୍ତି। ବରଗଡର ସୁମିତ କେ. ରାୟ ଓ କୋରାପୁଟର ଅର୍ଶଦ କିଶୋର ଶତକ ମାରିଥିବା ବେଳେ ବୌଦ୍ଧର ଦେବାଶଷ ବାଘ ଓ ସୋନପୁରର ଗୌତମ ଦାସ ୫ ଉଇକେଟ ସଫଳତା ହାସଲ କରିଛନ୍ତି। ରେଭେନ୍ସା ଗ୍ରାଉଣ୍ଡ-୧ରେ ଖେଳାଯାଇଥିବା ମ୍ୟାଚରେ ଟୁକୁନା ସାହୁଙ୍କ ଅଲରାଉଣ୍ଡ ପ୍ରଦର୍ଶନ ସତ୍ତ୍ୱେ ସମ୍ବଲପୁର ୬୬ ରନ୍ରେ ଅନୁଗୁଳକୁ ପରାସ୍ତ କରିଛି। ପ୍ରଥମେ ବ୍ୟାଟିଂ କରି ସମ୍ବଲପୁର ୩୮ ଓଭରରେ ୯ ଉଇକେଟରେ ୨୦୧ ରନ୍ କରିଥିଲା।
ସୟଦ ଜାକି ୫୮ ରନ୍ କରିଥିବା ବେଳେ ମିଲନ ସାମଲ ୩ ଓ ଟୁକୁନା ସାହୁ ୨ ଉଇକେଟ ନେଇଥିଲେ। ଜବାବରେ ଟୁକୁନାଙ୍କ ୭୧ ରନ୍ ସତ୍ତ୍ୱେ ଅନୁଗୁଳ ୩୧.୪ ଓଭରରେ ୧୩୫ ରନରେ ଅଲଆଉଟ ହୋଇଥିଲା। ସମ୍ବଲପୁର ପକ୍ଷରୁ ରାହୁଲ ବିଶ୍ୱକର୍ମା ୪ ଉଇକେଟ ନେଇଥିଲେ। ସନ୍ସାଇନ୍ ଗ୍ରାଉଣ୍ଡରେ ଖେଳା ଯାଇଥିବା ଅନ୍ୟ ଏକ ମ୍ୟାଚରେ କିଟ୍ ୮୪ ରନ୍ରେ ବରଗଡକୁ ପରାସ୍ତ କରିଛି। ସୁଦର୍ଶନ ରାଉତଙ୍କ ୮୯ ଓ ଅନୀଶ ରାଉତଙ୍କ ୫୪ ରନ୍ ବଳରେ କିଟ୍ ୫୦ ଓଭରରେ ୮ ଉଇକେଟରେ ୩୩୦ ରନ୍ କରିଥିଲା। ଜବାବରେ ସୁମିତ୍ କେ. ରାୟଙ୍କ ୧୦୦ ରନ୍ ସତ୍ତ୍ୱେ ବରଗଡ ୯ ଉଇକେଟରେ ୨୪୬ ରନ୍ କରିଥିଲା। ଆଦର୍ଶପୁର ଗ୍ରାଉଣ୍ଡରେ ବୌଦ୍ଧ ୭ ଉଇକେଟରେ ନବରଙ୍ଗପୁରକୁ ପରାସ୍ତ କରିଛି। ପ୍ରଥମେ ବ୍ୟାଟିଂ କରି ନବରଙ୍ଗପୁର ୧୧୪ ରନରେ ଅଲଆଉଟ ହୋଇଥିଲେ। ବୌଦ୍ଧର ଦେବାଶିଷ ୩୦ ରନ୍ରେ ୬ ଉଇକେଟ ନେଇଥିଲେ। ଜବାବରେ ବୌଦ୍ଧ ୨୧.୫ ଓଭରରେ ୩ ଉଇକେଟ ହରାଇ ୧୧୬ ରନ୍ କରିଥିଲା।
ଏମ୍ଜିଏମ୍ ଗ୍ରାଉଣ୍ଡରେ କୋରାପୁଟ ୧୦୩ ରନ୍ରେ ସୋନପୁରକୁ ପରାସ୍ତ କରିଛି। ପ୍ରଥମେ ବ୍ୟାଟିଂ କରି କୋରାପୁଟ ଅର୍ଶଦଙ୍କ ୧୧୨ ରନ୍ ବଳରେ ୫୦ ସଭରରେ ୮ ଉଇକେଟରେ ୨୭୬ ରନ୍ କରିଥିଲା। ସୋନପୁରର ଗୌତମ ଦାସ ୫୭ ରନ୍ରେ ୫ ଉଇକେଟ ନେଇଥିଲେ। ଜବାବରେ ଚିନ୍ମୟ ପଣ୍ଡାଙ୍କ ୪ ଉଇକେଟ ସଫଳତା ବଳରେ ସୋନପୁର ୧୭୩ ରନ୍ରେ ଅଲଆଉଟ ହୋଇଥିଲା। ଡ୍ରିମ୍ସ ଗ୍ରାଉଣ୍ଡରେ ଖେଳା ଯାଇଥିବା ମ୍ୟାଚରେ ବଲାଙ୍ଗୀର ୯୮ ରନ୍ରେ ଦେବଗଡକୁ ପରାସ୍ତ କରିଛି। ଡି ଗୌରବଙ୍କ ୫୮ ରନ୍ ବଳରେ ବଲାଙ୍ଗୀର ୯ ଉଇକେଟରେ ୨୩୪ ରନ୍ କରିଥିଲା। ଦେବଗଡ ୩୪.୫ ଓଭରରେ ୧୩୬ ରନ୍ରେ ସୀମିତ ରହିଥିଲା।