ମୁମ୍ବାଇ,୨୭।୪: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ୨୦୨୨ରେ ବାମ ହାତୀ ଯୁବ ଦ୍ରୁତ ବୋଲର ଅର୍ଶଦୀପ ସିଂ ଉଲ୍ଲେଖନୀୟ ପ୍ରଦର୍ଶନ କରି ଆସୁଛନ୍ତି। ଗତ ତିନି ସିଜନରେ କ୍ରମାଗତ ଭାବେ ପ୍ରଦର୍ଶନ ଭଲ ରଖିଥିବାରୁ ସେ ଖୁବ୍ଶୀଘ୍ର ଜାତୀୟ ଟି-୨୦ ଦଳରେ ସ୍ଥାନ ପାଇପାରନ୍ତି ବୋଲି ଭାରତର ପୂର୍ବତନ ମୁଖ୍ୟ ପ୍ରଶିକ୍ଷକ ରବି ଶାସ୍ତ୍ରୀ କହିଛନ୍ତି।
ଶାସ୍ତ୍ରୀ କହିଛନ୍ତି, ଜଣେ ଯୁବ ଖେଳାଳି ଚାପରେ ଥାଇ ବି ଭଲ ପ୍ରଦର୍ଶନ କରି ଆସୁଛି। ଚାପରେ ସେ ଶାନ୍ତ ରୁହନ୍ତି ଏବଂ ‘ଡେଥ୍ ଓଭର୍’ରେ ଭଲ ପ୍ରଦର୍ଶନ କରୁଛି। ଏହା ଦର୍ଶାଉଛି ଯେ ସେ ବହୁତ ଦ୍ରୁତ ଗତିରେ ଆଗକୁ ବଢ଼ୁଛନ୍ତି। ସେ ଭାରତୀୟ ଟିମ୍ରେ ସାମିଲ ହୋଇପାରିବେ।
ତେବେ ୨୩ ବର୍ଷୀୟ ଅର୍ଶଦୀପ ୨୦୧୯ରେ ଆଇପିଏଲ୍ରେ ଡେବ୍ୟୁ କରିଥିଲେ। ସେ ଗତ ୪ ସିଜନରୁ ପଞ୍ଜାବ କିଙ୍ଗ୍ସର ଅବିଚ୍ଛେଦ ଅଙ୍ଗ ରହିଆସିଛନ୍ତି। ନିଲାମ ପୂର୍ବରୁ ଫ୍ରାଞ୍ଚାଇଜ୍ ଦ୍ୱାରା ରିଟେନ କରାଯାଇଥିବା ଦୁଇ ଖେଳାଳିଙ୍କ ମଧ୍ୟରେ ଅର୍ଶଦୀପ ରହିଥିଲେ।