ନୂଆଦିଲ୍ଲୀ,୫ ।୮: ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ହଟିବାକୁ ୩ ବର୍ଷ ପୂରଣ ହୋଇଛି । ତେବେ ଅନୁଚ୍ଛେଦ ୩୭୦ ହଟିବା ପରେ ଆତଙ୍କବାଦୀ ଆକ୍ରମଣ ସଂଖ୍ୟା କମ ହୋଇଛି ବୋଲି କୁହାଯାଉଛି । ଏହାସହ ଲ ଆଣ୍ଡ ଅର୍ଡର ଘଟଣାରେ କୌଣସି ସାଧାରଣ ନାଗରିକ ଅଥବା ଯବାନଙ୍କ ମୃତ୍ୟୁ ହୋଇ ନାହିଁ । ଆତଙ୍କବାଦୀ ଆକ୍ରମଣରେ ସାଧାରଣ ଜନତାଙ୍କ ମୃତ୍ୟୁ ସଂଖ୍ୟା ବି କମିଛି ।
ଜମ୍ମୁ-କଶ୍ମୀର ପୋଲିସ ଧାରା ୩୭୦କୁ ହଟାଇବା ପୂର୍ବରୁ ଓ ପରେ ୩ ବର୍ଷର ଘଟଣାକୁ ତୁଳନା କରି ସୂଚନା ଦେଇଛି କି କଶ୍ମୀର ଜୋନରେ ଆତଙ୍କବାଦୀ ଆକ୍ରମଣ ଘଟଣା କମ୍ ହୋଇଛି । ପୋଲିସ ଏହାକୁ ୬ଟି କାଟାଗୋରୀରେ ବିଭକ୍ତ କରିଛି ।
ଜମ୍ମୁ-କଶ୍ମୀର ପୋଲିସର ସୂଚନା ଅନୁଯାୟୀ, ଲ ଆଣ୍ଡ ଅର୍ଡର ଘଟଣାରେ ଅନୁଚ୍ଛେଦ ୩୭୦ ହଟିବା ପୂର୍ବରୁ ୧୨୪ ନାଗରିକଙ୍କ ମୃତ୍ୟୁ ହୋଇଥିବା ବେଳେ ୩୭୦ ହଟିବା ପରେ ଏବେ ଏହା ଶୂନ୍ୟ ହୋଇଯାଇଛି । ସେହିପରି ୩୭୦ ହଟିବା ପୂର୍ବରୁ ୨୯୦ ଯବାନ ଶହୀଦ ହୋଇଥିବା ବେଳେ ଅନୁଚ୍ଛେଦ ୩୭୦ ହଟିବା ପରେ ୩ ବର୍ଷ ମଧ୍ୟରେ ୧୭୪ ଯବାନ ଶହୀଦ ହୋଇଛନ୍ତି ।