କଳାକାରକୁ ନିଜ ପ୍ରତିଭାର ପରିପ୍ରକାଶ ପାଇଁ କେବଳ କାନ୍ଭାସ୍ କି ରଙ୍ଗ ତୂଳୀର ଆବଶ୍ୟକତା ପଡେନା। ନିଜ କଳାର ପ୍ରଦର୍ଶନ ପାଇଁ ସେ ଯେକୌଣସି ମାଧ୍ୟମକୁ ବି ଆପଣେଇପାରେ। ଯାହାର ପ୍ରମାଣ ଜାପାନର ଧାନ କ୍ଷେତକୁ ଦେଖିଲେ ମିଳିଯାଏ। ଏଠାକାର କିଛି କୃଷକ କେବଳ ଧାନ ଚାଷ କରି ନ ଥାଆନ୍ତି ବରଂ ସେହି କ୍ଷେତକୁ ଖୁବ୍ ସୁନ୍ଦରଭାବେ ସଜାଇଥାଆନ୍ତି ମଧ୍ୟ। ସେମାନେ ନିଜ ଚାଷ ଜମିରେ ବିଭିନ୍ନ କିସମର ଧାନଗଛକୁ ଏଭଳି ଭାବେ ଲଗାଇଥାନ୍ତି ଯେ, ତାହା ବଡ ହେବା ପରେ ଗୋଟେ ଗୋଟେ ସୁନ୍ଦର ପୋର୍ଟ୍ରେଟ୍ରେ ପରିଣତ ହୋଇଯାଏ। ମୋନାଲିସାଠୁ ଆରମ୍ଭ କରି ମର୍ଲିନ ମୋନରୋ, ପୁଣି ଜାପାନ ପରମ୍ପରା ସଂସ୍କୃତି ସହ ଜଡିତ ଅନେକ କଥାବସ୍ତୁର ଚିତ୍ର ଏଇ ଧାନ କ୍ଷେତରେ ଦେଖିବାକୁ ମିଳେ। ଲାଗେ ସତେ ଯେମିତି କୃଷକଙ୍କ ପାଇଁ ତାଙ୍କ ଧାନ କ୍ଷେତ ପାଲଟିଛି ବିରାଟକାୟ କାନ୍ଭସ୍। ଖାସ୍କରି ଜାପାନର ଆମୋମୋରୀ ପ୍ରାନ୍ତସ୍ଥ ଇନକାଦତେ ଗାଁରେ ଏଭଳି କଳାକୃତୀସବୁ ଦେଖିବାକୁ ମିଳେ। ଏହି ମାଷ୍ଟର ପିସ୍ଗୁଡିକୁ ସେମାନେ ୭ଟି ଅଲଗା ଅଲଗା ପ୍ରକାରର ଧାନ ଲଗାଇ ତିଆରି କରିଥାନ୍ତି। ଆଉ ଯେତେବେଳେ ପବନ ହୁଏ କ୍ଷେତ ଲାଗେ ସତେ ଯେମିତି ତାହା କୌଣସି ଏକ ଥ୍ରୀଡି ମାଷ୍ଟରପିସ୍। ଏହି ସୁନ୍ଦର ଦୃଶ୍ୟକୁ ଦେଖିବା ପାଇଁ ଅନେକ ପର୍ଯ୍ୟଟକ ଏଠାକୁ ଆସନ୍ତି।