କୌଣସି ଉତ୍ସବ ହେଉ କିମ୍ବା ମାଙ୍ଗଳିକ କାଯର୍ୟକ୍ରମ ଅବସରରେ ଯଦି ଭୋଜିଭାତର ଆୟୋଜନ ହୁଏ ତେବେ ସାଲାଡ ତ ଯେମିତି ବି ହେଉ ହୁଏ । ଏଥିରେ ବିଶେଷକରି କାକୁଡ଼ି, ଗାଜର, ଟମାଟୋ ଓ ପିଆଜ ଆଦି ପନିପରିବାର ବ୍ୟବହାର ହୋଇଥାଏ। କିନ୍ତୁ ଏହିସବୁ ପରିବା ଓ ଫଳକୁ ନେଇ ହେଉଥିବା କଳାକୃତୀ ଏବେ ଭୋଜିର ଅନ୍ୟତମ ଆକର୍ଷଣ ପାଲଟୁଛି।ତା’ସହ ରହୁଛି ବରଫର କାରିଗରୀ। ଏମିତି କଳାକୃତିକୁ ଯେ କେହି ଦେଖିଲେ ଟିକେ ଅଟକିଯିବେ । ହେଲେ ଏମିତି ପନିପରିବା ଓ ବରଫରେ ଖୋଦେଇ କଳାକୃତି ୨୦ବର୍ଷ ଧରି ତିଆରି କରିଆସୁଛନ୍ତି ଜଣେ ଯୁବକ। ସେ ହେଲେ ପ୍ରେମାନନ୍ଦ ବାରିକ ।
ଘର ଖୋର୍ଦ୍ଧା ଜିଲାର ବାଲିଅନ୍ତା ବ୍ଲକ ଅନ୍ତର୍ଗତ ବେଣୁପୁର ଗାଁରେ। ସେ କୁହନ୍ତି,ଏହି ପନିପରିବା କାର୍ଭିଂ କଳାକୃତି ତିଆରି ପାଇଁ କୌଣସି ଆର୍ଟ କଲେଜରେ ପାଠ ପଢ଼ିନାହିଁ କି କେଉଁଠି ଟ୍ରେନିଂ ନେଇନାହିଁ । ମାଟ୍ରିକ ପାସ୍ ପରେ ଗାଁରୁ ଭୁବନେଶ୍ୱରକୁ ଆସିଥିଲି। ଏଠାକାର ଏକ ହୋଟେଲରେ ଦେଖିଲି ପଶ୍ଚିମବଙ୍ଗର ଜଣେ ବ୍ୟକ୍ତି ବରଫ କାଭିର୍ଂ , ଭେଜିଟେବୁଲ କାଭିର୍ଂ ରେ ସୁନ୍ଦରସୁନ୍ଦର କଳାକୃତି ତିଆରି କରୁଥିଲେ। ଏଥିରେ ପ୍ରଭାବିତ ହେଲି। ଏହାପରେ ମନେମନେ ଚିନ୍ତାକଲି ଏମିତି କଳାକୃତିକୁ କିପରି କରିପାରିବି। ଏଥିପାଇଁ ୧୯୯୫ରୁ ବିଭିନ୍ନ ପରିବାକୁ କାଟି ଏହି ଅଭ୍ୟାସ ଜାରି ରଖିତ୍ଲି। କାଭିର୍ଂକାମକୁ ଭଲରେ କରିପାରୁଥିବାରୁ ଦିଲ୍ଲୀ ଯାଇ ପ୍ରାୟ ୫ବର୍ଷ ରହିଥିଲି । ଦିଲ୍ଲୀର ଏକ ବଡ଼ ହୋଟେଲରେ ସାଲାଡ ଡେକୋରେଶନ କାର୍ଯ୍ୟ କଲି।
ଅବଶ୍ୟ ବିଶାଖାପାଟଣାରେ ୨୦୦୧ରେ ଖ୍ରୀଷ୍ଟମାସ ସ୍ୟାଣ୍ଡ ଆର୍ଟ ଓ ଆବାସ କାର୍ଭିଂ କରିଥିଲି। ଏମିତିରେ ଦେଶର ବିଭିନ୍ନ ସହରରେ ପ୍ରାୟ ୨ହଜାରରୁ ଊର୍ଦ୍ଧ୍ୱ ଏହି କାର୍ଭିଂ ପ୍ରୋଗ୍ରାମ କରି ସାରିଲିଣି। ତେବେ କାର୍ଭିଂ ଡିଜାଇନ୍ ଅନୁସାରେ ପ୍ରଥମେ ବଡ଼ବଡ଼ ପନିପରିବାକୁ ଆଣିବାକୁ ପଡ଼ିଥାଏ। ତାପରେ ଡିଜାଇନ୍କୁ ନଜର ରଖି ପନିପରିବାର ଚୋପା କିମ୍ବା ଉପରଭାଗରେ ହାଲୁକାରେ ସ୍କେଚ୍ରେ ବିଭିନ୍ନ ଆକୃତିର ଚିତ୍ର କରାଯାଇ ଥାଏ। ତାପରେ ଛୁରିରେ କଟାଯାଇ ଡିଜାଇନ ଅନୁସାରେ କଳାକୃତିର ନମୁନାକୁ ବାହାର କରାଯାଇ ସୁନ୍ଦରସୁନ୍ଦର କଳାକୃତି ତିଆରି କରାଯାଇଥାଏ। ଏହି କାର୍ଭିଂ କଳାକୃତି ପାଇଁ ଗାଜର, ବିଟ୍, ମୂଳା, ପିଆଜ, ପତ୍ରକୋବି, ଫୁଲକୋବି, କ୍ୟାପସିକମ, ତରଭୁଜ, କଖାରୁ, କଦଳୀ, କାକୁଡ଼ି ଆଦି ବିଭିନ୍ନ ପନିପରିବା ଦରକାର ପଡ଼ିଥାଏ। କେବଳ ପନିପରିବା ନୁହେଁ ବରଂ ବରଫରେ ମଧ୍ୟ ବରଫକୁ କଟିଂକରି ବରଫକାର୍ଭିଂ କଳାକୃତି କରାଯାଇଥାଏ। ଏହା ଟିକେ ନିଆରା ଲାଗେ। ବରଫ କଟିଂ, ପନିପରିବା ଓ ଫଳ କଟିଂ, ସାଲାଡ ଡେକୋରେଶନ, ଫଳ ଡେକୋରେଶନ, ପେଣ୍ଟିଂ, ଫ୍ଲାଓ୍ବାର ଡେକୋରେଶନ ଓ ବାଲୁକାକଳାକୃତି ଆଦିର ଆଦର ଦିନକୁଦିନ ବଢୁଥିବାରୁ ଏମିତି କାମରେ ଆଜିକାଲି ବହୁ ଯୁବତୀଯୁବକ ରୁଚି ରଖୁଛନ୍ତି। ଏଥିରେ ଭଲ ରୋଜଗାର ହୋଇପାରୁଛି।
-ବନବିହାରୀ ବେହେରା