ମାଲକାନଗିରି,୧୫।୫(ଡି.ଏନ୍.ଏ.): ମାଲକାନଗିରି ଜିଲା ସତୀଗୁଡ଼ା ମଧ୍ୟମ ଜଳସେଚନ ବିଭାଗର ବାମପାର୍ଶ୍ୱ କେନାଲ ମାଲକାନଗିରି ପୌର ପରିଷଦ ମଧ୍ୟ ଦେଇ ଚାଷୀଙ୍କ ପାଇଁ ଜଳ ପ୍ରବାହିତ ହେଉଛି। ଝାଟିମାଟି କଲୋନୀଠାରୁ ରିକ୍ଲାମେଶନ କଲୋନୀ ଦେଇ ଏମ୍.ଭି-୨ ଗ୍ରାମକୁ ଯାଇଛିା। ବର୍ତ୍ତମାନ କେନାଲରେ ପାଣି ଛଡ଼ା ଯାଇଥିବାରୁ କେନାଲର ଉଭୟ ହୁଡ଼ା କେତେକ ସ୍ଥାନରେ ବନ୍ଧ ବୁଡ଼ି କେନାଲ ତଳେ ଥିବା ଦୈନିକ ମାଛ ବଜାର ଏବଂ ବସ୍ତି ମଧ୍ୟକୁ ଜଳ ପ୍ରବେଶ କରୁଛି। ଫଳରେ ଏହି ତଳିଆ ଅଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଏହି କେନାଲ ସମ୍ପୂର୍ଣ୍ଣ ଅନାବନା ଗଛରେ ଭରପୁର ହୋଇଥିବାରୁ ପାଣି ନିଷ୍କାସନ ହୋଇ ନ ପାରି ଏପରି ଅବସ୍ଥା ସୃଷ୍ଟି ହୋଇଛି। ତୁରନ୍ତ କେନାଲ ସଫା କରିବା ସହ ବନ୍ଧ ଉଚ୍ଚତା ବଢ଼ାଇବା ପାଇଁ ସେହି ଅଞ୍ଚଳବାସୀ ଦାବି କରିଛନ୍ତି। ଏନେଇ ସତୀଗୁଡ଼ା ଜଳସେଚନ ବିଭାଗ ଯନ୍ତ୍ରୀଙ୍କ ସହ ଯୋଗାଯୋଗ ହୋଇ ପାରି ନ ଥିବାରୁ ତାଙ୍କର ପ୍ରତିକ୍ରିୟା ମିଳିପାରିନାହିଁ।
