ଓ୍ବାଶିଂଟନ୍, ୩୦।୩: ଶିକ୍ଷା ହେଉ ଅବା ଉଦ୍ୟୋଗ, ପ୍ରତିଟି କ୍ଷେତ୍ରରେ ଏବେ ପ୍ରତିଯୋଗିତା ଦେଖିବାକୁ ମିଳୁଛି। ଜଣେ ଅନ୍ୟ ଜଣଙ୍କଠାରୁ କିପରି ଆଗରେ ରହିବ ସେ ନେଇ ତର୍କ ଓ ତର୍ଜମା ଲାଗି ରହିଛି। ବିଜ୍ଞାନ ଗବେଷଣାରେ ମଧ୍ୟ ସମାନ ପରିସ୍ଥିତି ଦେଖିବାକୁ ମିଳିଛି। ବର୍ତ୍ତମାନ ସମୟରେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)କୁ ନେଇ ବୈଜ୍ଞାନିକମାନଙ୍କ ମଧ୍ୟରେ ଏକ ଦୌଡ଼ ଆରମ୍ଭ ହୋଇଛି। ତେବେ ଭବିଷ୍ୟତର ଭଲ ପାଇଁ ବର୍ତ୍ତମାନ ସମୟରେ ଏଆଇକୁ ନେଇ ଚାଲିଥିବା ଗବେଷଣା ବନ୍ଦ କରିବାକୁ ପଡ଼ିବ। ନଚେତ୍ ଏହା ମାନବ ଜାତି ପାଇଁ ଘାତକ ସାବ୍ୟସ୍ତ ହେବ ବୋଲି ୧୦୦୦ ଜଣିଆ ବିଶେଷଜ୍ଞ ଦଳ ସତର୍କ କରିଛନ୍ତି।
ଏଆଇ ଦ୍ୱାରା ଲୋକେ ଉପକୃତ ହେଉଛନ୍ତି। କିନ୍ତୁ ଏହା ସୀମିତ ରହିବା ଆବଶ୍ୟକ। ଉନ୍ନତମାନର ଏଆଇ ନିର୍ମାଣ କରିବା ପାଇଁ ବର୍ତ୍ତମାନ ବୈଜ୍ଞାନିକମାନେ ଗବେଷଣା ଚାଲୁ ରଖିଛନ୍ତି, ତାହା ଭବିଷ୍ୟତରେ ବିପଜ୍ଜନକ ପରିସ୍ଥିତି ସୃଷ୍ଟି କରିବ ବୋଲି ବିଶେଷଜ୍ଞଙ୍କ ପକ୍ଷରୁ ଜାରି ଚିଠିରେ ଉଲ୍ଲେଖ କରାଯାଇଛି। ଏଆଇର ନୂଆ ମଡେଲ୍ ଯୋଗୁ ବିଶ୍ୱ ପାଇଁ ବିପଦ ବଢ଼ିବ। ବୈଜ୍ଞାନିକମାନେ ଏଆଇକୁ ଅଧିକ ଆଡ୍ଭାନ୍ସ ଓ ଶକ୍ତିଶାଳୀ ଡିଜିଟାଲ ମାଇଣ୍ଡ ଦେବାକୁ ଚାହୁଁଛନ୍ତି। କିନ୍ତୁ ସେମାନେ ଏହାର କୁପରିଣତିକୁ ଉପଲବ୍ଧି କରିପାରୁ ନାହାନ୍ତି। ଏ ନେଇ ସରକାର ମଧ୍ୟ ତତ୍ପର ହୋଇ ବିଶେଷ ପଦକ୍ଷେପ ଗ୍ରହଣ କରିବା ଜରୁରୀ।
ତେବେ ଚଳିତ ମାସରେ ଓପନ୍ଏଆଇ କମ୍ପାନୀ ପକ୍ଷରୁ ସବୁଠାରୁ ଉନ୍ନତ ଏଆଇ ଜିପିଟି-୪ ନିର୍ମାଣ କରାଯାଇଥିବାବେଳେ ଆସନ୍ତା ୬ ମାସ ପର୍ଯ୍ୟନ୍ତ ଏଆଇ ଗବେଷଣା ରୋକିବା ଦରକାର ବୋଲି ବିଶେଷଜ୍ଞ ସୂଚନା ଦେଇଛନ୍ତି। ଅନ୍ୟପକ୍ଷେ ଏଆଇ ପାଇଁ ଲୋକଙ୍କ ଚାକିରି ଏବେ ବିପଦରେ ପଡ଼ିଯାଇଛି। ଇନ୍ଭେଷ୍ଟମେଣ୍ଟ ବ୍ୟାଙ୍କିଙ୍ଗ୍ କମ୍ପାନୀ ଗୋଲ୍ଡମ୍ୟାନ୍ ସ୍ୟାଚସ୍ର ଆକଳନ ଅନୁସାରେ ଆଗାମୀ ଦିନରେ ୩୦୦୦ ମିଲିୟନ୍ (୩୦) କୋଟି ଲୋକ ନିଜ ଚାକିରି ହରାଇବେ।
ଏଆଇ ଜ୍ଞାନକୌଶଳରେ ଉନ୍ନତି ଫଳରେ କମ୍ପାନୀଗୁଡ଼ିକ ବିନା ବିରତିରେ ଅଧିକ ଉତ୍ପାଦନ ପାଇଁ ଲୋକଙ୍କ ବଦଳରେ ଏଆଇର ବ୍ୟବହାର ବଢ଼ିଯିବ।ତେବେ ଏହି ୬ ମାସ ମଧ୍ୟରେ ଏଆଇ ଲାବ୍ ଏବଂ ଏକ୍ସପର୍ଟ ଏଆଇ ଡିଜାଇନ୍ କରିବା ଲାଗି ନୂଆ ନିୟମ ତିଆରି କରିବେ, ଯାହାଫଳରେ ସୁରକ୍ଷା ସହିତ ଏହି ଗବେଷଣା ସମ୍ପନ୍ନ କରାଯିବ। ବିଶେଷଜ୍ଞଙ୍କ ପକ୍ଷରୁ ଜାରି କରାଯାଇଥିବା ଚିଠିରେ ବେର୍କେଲି, ପ୍ରିନ୍ସେଟୋନ ଆଦି ୟୁନିଭର୍ସିଟି ବିଶେଷଜ୍ଞ, ଏଆଇକୁ ନେଇ ଗବେଷଣା କରୁଥିବା କମ୍ପାନୀଗୁଡ଼ିକ ସମେତ ପିଣ୍ଟେରେଷ୍ଟ, ସ୍କାଇପ୍, ଆପଲ, ଟେସ୍ଲା କମ୍ପାନୀର ଅଧ୍ୟକ୍ଷମାନେ ସ୍ବାକ୍ଷର କରିଛନ୍ତି।