ବରଗଡ଼ ଅଫିସ୍,୮।୧୧: ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବ ଆସନ୍ତା ଡିସେମ୍ବର ୨୭ରୁ ଆରମ୍ଭ ହେବ। ଅନ୍ୟବର୍ଷ ଅପେକ୍ଷା ଏଥର ଧନୁଯାତ୍ରାକୁ ଅଧିକ ଆକର୍ଷଣୀୟ କରିବା ପାଇଁ କମିଟି ନିଷ୍ପତ୍ତି ନେଇଛି। ଏହି କ୍ରମରେ ଚଳିତବର୍ଷ ଧନୁଯାତ୍ରା କଳାକାର ଚୟନ ପ୍ରକ୍ରିୟା ଚାଲିଛି। ମହୋତ୍ସବର ମୁଖ୍ୟ ଚରିତ୍ର କଂସ ସମେତ ଅନ୍ୟ ପାର୍ଶ୍ୱ କଳାକାରଙ୍କ ଚୟନ କରାଯିବ।
ଏହି ପରିପ୍ରେକ୍ଷୀରେ ସୋମବାରଠାରୁ ସ୍ଥାନୀୟ ବିଜୁ ପଟ୍ଟନାୟକ ଟାଉନ ହଲରେ ଆଶାୟୀ କଳାକାରଙ୍କ ଅଡ଼ିଶନ ପ୍ରକ୍ରିୟା ଆରମ୍ଭ ହୋଇଛି। ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋ ଏହାର ଶୁଭାରମ୍ଭ କରିଥିଲେ। ଧନୁଯାତ୍ରା ମହୋତ୍ସବ ସମିତି ସମ୍ପାଦକ ସୁରେଶ୍ୱର ଶତପଥି ଉପସ୍ଥିତ ଥିଲେ। ପ୍ରଥମ ଦିବସରେ ଉଗ୍ରସେନ, ବସୁଦେବ, ଦେବକୀ, ନାରଦ ଏବଂ ସେନାପତିଙ୍କ ଅଡ଼ିଶନ ଥିଲା। ଉଗ୍ରସେନ ଚରିତ୍ର ପାଇଁ ୭ଜଣ ଆବେଦନ କରିଥିବାବେଳେ ଅଡ଼ିଶନରେ ୬ଜଣ ଭାଗ ନେଇଥିଲେ। ସେହିପରି ବସୁଦେବ ଚରିତ୍ରରେ ୧୯ଜଣଙ୍କ ମଧ୍ୟରୁ ୧୪, ଦେବକୀ ଚରିତ୍ରରେ ୮ଜଣଙ୍କ ମଧ୍ୟରୁ ୪, ସେନାପତି ଚରିତ୍ରରେ ୩୭ଜଣୀଙ୍କ ମଧ୍ୟରୁ ୨୪ ଏବଂ ନାରଦ ଚରିତ୍ରରେ ୧୪ଜଣଙ୍କ ମଧ୍ୟରୁ ୭ଆଶାୟୀ କଳାକାର ଅଡ଼ିଶନରେ ଅଂଶଗ୍ରହଣ କରିଥିଲେ ।
ବିଚାରକଙ୍କ ମଧ୍ୟରେ ବରଗଡ଼ ଜିଲାର ୩ଜଣ ଏବଂ ଜିଲା ବାହାରର ୪ଜଣ ଅଛନ୍ତି। ସେମାନଙ୍କ ମଧ୍ୟରେ କଳାହାଣ୍ଡିର ଡଃ ପ୍ରଦୀପ ମାଝି, ବଲାଙ୍ଗୀରର ଜମାଲ ଖାଁ, ସମ୍ବଲପୁରର ବ୍ରଜେନ୍ଦ୍ର ନାୟକ, ଦେବଗଡ଼ର ହେମନ୍ତ ମହାପାତ୍ର, ବରଗଡ଼ର ଲିଟୁ ମହାନ୍ତି, ବିଜେପୁରର ଶିବଲାଲ ସାଗର ଏବଂ ପଦ୍ମପୁରର ଅଶୋକ ବହିଦାର ବିଚାରକ ଭାବେ ଯୋଗ ଦେଇଥିଲେ। ଆସନ୍ତା ୯ତାରିଖରେ ଚାଣୁର, ମୁଷ୍ଟିକ, ମହାମନ୍ତ୍ରୀ, ଅକ୍ରୂର, ସାତ୍ୟକୀ ଚରିତ୍ର ପାଇଁ ଅଡ଼ିଶନ ହେବ। ସେହିପରି ୧୦ତାରିଖରେ କଂସ ଚରିତ୍ର ପାଇଁ ଆଶାୟୀ କଳାକାରମାନେ ଅଡ଼ିଶନରେ ଭାଗନେବାର କାର୍ଯ୍ୟକ୍ରମ ରହିଛି। ଏହି ଚରିତ୍ର ପାଇଁ ସର୍ବାଧିକ ୫୬ଜଣ ଆଶାୟୀ ରହିଥିବାବେଳେ ଏଥର କାହା ଭାଗ୍ୟରେ କଂସ ଅଭିନୟର ସୁଯୋଗ ଜୁଟିବ, ତାକୁ ସମସ୍ତେ ଉତ୍କଣ୍ଠାର ସହିତ ଚାହିଁ ରହିଛନ୍ତି।
