ଭୁବନେଶ୍ୱର,୨୨।୨ (ବ୍ୟୁରୋ): ଯାତ୍ରା ପରିବେଷଣ ପାଇଁ ଅନୁମତି ଦେବାକୁ ସୋମବାରଠାରୁ ଆନ୍ଦୋଳନକୁ ଓହ୍ଲାଇବେ ଯାତ୍ରା କଳାକାର। ଭୁବନେଶ୍ୱର ଲୋୟର ପିଏମ୍ଜିରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଗଣଧାରଣା ଦିଆଯିବ। ଏଥିସହ ଦାବି ସମ୍ପର୍କରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଯିବ। ଏଥିରେ ବିଭିନ୍ନ ବର୍ଗର କଳାକାର ସାମିଲ ହେବେ ବୋଲି ଯାତ୍ରା କଳାକାର ଓ କର୍ମଚାରୀ ସଂଘ ଚେତାବନୀ ଦେଇଛି।
ରବିବାର ସାମ୍ବାଦିକ ଭବନରେ ଆୟୋଜିତ ଖବରଦାତା ସମ୍ମିଳନୀରେ ସଂଘ କର୍ମକର୍ତ୍ତାମାନେ ଯାତ୍ରା କଳାକାରଙ୍କ ଦୁଃଖ ବଖାଣିବା ସହ ଗୁରୁତର ଅଭିଯୋଗ ଆଣିଛନ୍ତି। ସେମାନେ କହିଛନ୍ତି, ଦୀର୍ଘ ୧୧ମାସର କୋଭିଡ୍ କଟକଣା କାରଣରୁ କୌଣସି ଯାତ୍ରା ପରିବେଷଣ କରାଯାଉନାହିଁ। ଫଳରେ ଓଡ଼ିଶା ଯାତ୍ରା କଳାକାର ଓ ସେମାନଙ୍କ ପରିବାରର ଅବସ୍ଥା ଶୋଚନୀୟ ହେବାରେ ଲାଗିଛି। ଅନେକ କଳାକାର ବାଧ୍ୟହୋଇ ଦାଦନ ଖଟିବାକୁ ଚାଲି ଯାଇଥିବାବେଳେ ଶହ ଶହ କଳାକାର ବାହାର ରାଜ୍ୟରେ ଡ୍ୟାନ୍ସ କରିବାକୁ ଯାଇ ସେଠାରେ ନିଜ ପିଲା ପରିବାର ସହିତ ବନ୍ଧା ପଡ଼ି ନିର୍ଯାତନାର ଶିକାର ହେଉଛନ୍ତି। ପୁଣି କେତେଜଣ କଳାକାର ରୋଗଗ୍ରସ୍ତ ହୋଇ ଅର୍ଥ ଅଭାବରୁ ଚିକିତ୍ସିତ ହୋଇ ନ ପାରି ମୃତ୍ୟୁବରଣ ମଧ୍ୟ କରିଛନ୍ତି। ତେବେ ରାଜ୍ୟ ସରକାର ଫେବୃୟାରୀ ମାସ କୋଭିଡ୍ ଗାଇଡ୍ ଲାଇନରେ ୫ଶହ ଲୋକଙ୍କୁ ନେଇ ଯାତ୍ରା କରିବାକୁ ଅନୁମତି ଦେଇଥିଲେ ମଧ୍ୟ ସ୍ଥାନୀୟ ପ୍ରଶାସନ ବାଧକ ସାଜିଛି। ୫ଶହ ଲୋକ ଏକାଠି ହେଲେ ଆଇନଶୃଙ୍ଖଳା ବ୍ୟାହତ ହେବ କହି ଏହାକୁ ଏଡାଇ ଯାଉଛନ୍ତି। ଯାତ୍ରା ବନ୍ଦ ଯୋଗୁ ହଜାର ହଜାର କଳାକାରଙ୍କ ପାଇଁ ମରିବା ବଞ୍ଚତ୍ବା ସମାନ ହୋଇଯାଇଛି। ସମସ୍ତଙ୍କ ପାଇଁ କରୋନା କଟକଣା କୋହଳ କରି ଦିଆଯାଇଥିବାବେଳେ ଯାତ୍ରା କଳାକାରଙ୍କୁ ଅନୁମତି ନ ଦେଇ ଅବିଚାର କରାଯାଉଛି ବୋଲି ଯାତ୍ରା କଳାକାର ଓ କର୍ମଚାରୀ ସଂଘ ପକ୍ଷରୁ ଅଭିଯୋଗ କରାଯାଇଛି। ୨ହଜାର ଦର୍ଶକରେ ସବୁ ବର୍ଗର କଳା ପରିବେଷଣ କରିବାକୁ ଅନୁମତି ପ୍ରଦାନ କରିବାକୁ ସଂଘ ଦାବି କରିଛି।