ଯାଜପୁର,୨୭।୧୧(ହର୍ଷବର୍ଦ୍ଧନ ବେହେରା): ଯାଜପୁର ଜିଲା ଧର୍ମଶାଳା ଅଞ୍ଚଳରେ ବେଆଇନ କ୍ରଶର ଏବଂ କଳାପଥର ଖାଦାନ ମାଲିକମାନେ କୌଣସି ନୀତିନିୟମକୁ ମାନୁ ନାହାନ୍ତି। ଏପରି କି ଲଘୁଖଣି ଉପନିର୍ଦ୍ଦେଶକ(ଡିଡିଏମ୍)ଙ୍କ କୌଣସି ନିର୍ଦ୍ଦେଶ ଏଠାରେ କାର୍ଯ୍ୟକାରୀ ହୋଇପାରୁନାହିଁ। ଏହାକୁ ଦୃଷ୍ଟିରେ ରଖି ଅଞ୍ଚଳବାସୀ ଆରୁହା ଖାଦାନରୁ କଳାପଥର ଉତ୍ତୋଳନ ବନ୍ଦ କରିବାକୁ ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ କରିଥିଲେ। ଏ ନେଇ ଡବ୍ଲ୍ୟୁପିସି ପିଆଇଏଲ୍ ନଂ. ୨୮୦୩/୨୦୨୪ରେ ସେହି ମାମଲା ପଞ୍ଜୀକୃତ ହୋଇଛି। ଏହି ମାମଲା ଉପରେ ରାଜ୍ୟ ସରକାରଙ୍କ ଷ୍ଟିଲ୍ ଓ ମାଇନ୍ସ ବିଭାଗ ପକ୍ଷରୁ ଉପସଚିବ ରାଜେଶ ପ୍ରସାଦ ନାୟକ ଆଇନ ଅନୁସାରେ ଆରୁହା କଳାପଥର ଖାଦାନ ଓ କ୍ରଶର ୟୁନିଟ ବନ୍ଦ କରିବାକୁ ଯାଜପୁର ଜିଲାପାଳ ଏବଂ ଡିଡିଏମ୍ଙ୍କୁ ନିର୍ଦ୍ଦେଶନାମା ଜାରି କରିଛନ୍ତି।
ସୂଚନା ଅନୁଯାୟୀ, ଗତ ୧୭ ତାରିଖରେ ଜିଲାର ୨୬ଟି କଳାପଥର ଖାଦାନକୁ ବନ୍ଦ କରିବାକୁ ଡିଡିଏମ୍ ଅଫିସରୁ ନିର୍ଦ୍ଦେଶ ଦିଆଯାଇଥିଲା। ହେଲେ ବନ୍ଦ ହେବା ପରିବର୍ତ୍ତେ ଆରୁହା ଖାଦାନରୁ ଗତ ୩ ଦିନ ହେବ ମାଟି, ମୋରମ ଏବଂ କଳାପଥର ବାହାରକୁ ଚାଲାଣ କରାଯାଉଥିବା ଅଭିଯୋଗ ହୋଇଛି। ସେହିପରି ରାହାଡ଼ପୁର ଓ ବିଛାଖଣ୍ଡି ଖାଦାନର ଲିଜ୍ଧାରୀ ଡିଡିଏମ୍ଙ୍କ ନିର୍ଦ୍ଦେଶକୁ ନ ମାନି ଦିନରାତି ଶତାଧିକ ଟ୍ରିପ୍ କଳାପଥର ଚାଲାଣ କରୁଥିବା ସ୍ଥାନୀୟ ଗ୍ରାମବାସୀ କହିଛନ୍ତି। ଅନ୍ୟପକ୍ଷେ ଜନସ୍ବାର୍ଥ ମାମଲା ଆବେଦନକାରୀଙ୍କୁ ମରଣାନ୍ତକ ଆକ୍ରମଣ ହୋଇଛି ା ଇତିମଧ୍ୟରେ ୧୦ ଦିନ ବିତିଥିଲେ ମଧ୍ୟ ଧର୍ମଶାଳା ଥାନା ପୋଲିସ ଏକ ମାମଲା(ନଂ.୮୨୪/୨୦୨୪)ରୁଜୁକରି ଚୁପ୍ ହୋଇ ବସିଛି। ଡାଇରେକ୍ଟର ଜେନେରାଲ ଅଫ୍ ମାଇନ୍ସ ସେଫ୍ଟି(ଡିଜିଏମ୍ଏସ୍)ଙ୍କ ନିର୍ଦ୍ଦେଶ ଅନୁସାରେ ଯେଉଁ ଲିଜ୍ଧାରୀମାନେ ମାଇନ୍ସ ମ୍ୟାନେଜର ନିଯୁକ୍ତି, ବ୍ଲାଷ୍ଟିଂ ଅନୁମତି ଇତ୍ୟାଦି ଆଇନ ପାଳନ କରି ନ ଥିବେ ସେମାନଙ୍କ ଖାଦାନ ପାଇଁ ଇ-ଟିପି(ଟ୍ରାନ୍ଜିଟ ପାସ୍) ନ ଦେବାକୁ ନିର୍ଦ୍ଦେଶ ଜାରି ହୋଇଥିଲା। ତଥାପି ଆରୁହା ଏବଂ ଅନ୍ୟ କେତେକ ଖାଦାନରେ ପ୍ରତିଦିନ ବେଆଇନ ଭାବେ ପଥର ଉତ୍ତୋଳନ ଜାରି ରହିଛି। ଏନେଇ ଆରୁହା ଗ୍ରାମର ବିପିନ କୁମାର ବେହେରା ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ କରିଥିଲେ। ତେବେ ଗତ ୧୭ ତାରିଖରେ ଲିଜ୍ଧାରୀ ମନୋଜ କୁମାର ସାମଲ କେତେଜଣ ବ୍ୟକ୍ତିଙ୍କୁ ପଠାଇ ଆବେଦନକାରୀ ବିପିନଙ୍କୁ ମରଣାନ୍ତକ ଆକ୍ରମଣ କରିଥିବା ଥାନାରେ ଅଭିଯୋଗ ହୋଇଥିଲା। ଏନେଇ ଧର୍ମଶାଳା ଥାନାରେ ମନୋଜ କୁମାର ସାମଲ, ନିରାକାର ସାମଲ, ସୁରେଶ ସାମଲ ଓ ପ୍ରମୋଦ ସାମଲଙ୍କ ନାମରେ ମାମଲା ରୁଜୁ ହୋଇଛି।
ଏ ସଂକ୍ରାନ୍ତରେ ଯାଜପୁର ଡିଡିଏମ୍ ଜୟପ୍ରକାଶ ନାୟକଙ୍କୁ ପଚାରିବାରୁ ସେ କହିଛନ୍ତି, ନିୟମିତ ବ୍ୟବଧାନରେ ବେଆଇନ ଖାଦାନଗୁଡିକ ଉପରେ ଚଢ଼ାଉ ଜାରି ରହିଛି। ଆରୁହା ପାହାଡ଼ରେ ଚାଲିଥିବା ଖାଦାନଗୁଡିକ ଉପରେ ମଧ୍ୟ ଆବଶ୍ୟକ ପଦକ୍ଷେପ ଗ୍ରହଣ କରାଯିବ।