ଇଟାନଗର,୨୮ ।୨: ଅରୁଣାଚଳ ପ୍ରଦେଶ ଏବେ କରୋନା ମୁକ୍ତ ରାଜ ପାଲଟି ଯାଇଛି । ରବିବାର ଜଣେ ବରିଷ୍ଠ ସ୍ୱାସ୍ଥ୍ୟ ଅଧିକାରୀଙ୍କ ସୂଚନା ଅନୁଯାୟୀ, ରାଜ୍ୟରେ ଥିବା ୩ କରୋନା ସଂକ୍ରମିତ ସୁସ୍ଥ ହେବା ପରେ ଏବେ ଏହି ରାଜ୍ୟ କରୋନା ମୁକ୍ତ ହୋଇଛି । ରାଜ୍ୟରେ ମୋଟ ୧୬,୮୩୬ କରୋନାରେ ସଂକ୍ରମିତ ହୋଇଥିବା ବେଳେ ସେମାନଙ୍କ ମଧ୍ୟରୁ ୧୬,୭୮୦ ଜଣ ସୁସ୍ଥ ହୋଇଛନ୍ତି । ରାଜ୍ୟର ସର୍ଭିଲାନ୍ସ ଅଫିସର ଲବସାଙ୍ଗ ଜାମ୍ପା କହିଛନ୍ତି ଗତ ୨୪ ଘଣ୍ଟାରେ ରାଜ୍ୟରେ କୌଣସି କରୋନା ସଂକ୍ରମିତଙ୍କୁ ଚିହ୍ନଟ କରାଯାଇ ନାହିଁ । ତେବେ ମୋଟ ସଂକ୍ରମିତଙ୍କ ମଧ୍ୟରୁ ୫୬ ଜଣଙ୍କ ମୃତ୍ୟୁ ହୋଇଥିବା ସେ କହିଛନ୍ତି । ଅରୁଣାଚଳ ପ୍ରଦେଶରେ ସୁସ୍ଥ ହାର ୯୯.୬୬ ଥିବା ବେଳେ ସଂକ୍ରମିତଙ୍କ ହାର ପାଖାପାଖି ଶୂନ ଥିଲା ବୋଲି କୁହାଯାଉଛି । ଏବେସୁଦ୍ଧା ରାଜ୍ୟରେ ୩୨,୩୨୫ ସ୍ୱାସ୍ଥ୍ୟକର୍ମୀ ଓ ଫ୍ରଣ୍ଟଲାଇନ୍ ୱାରିୟର୍ସଙ୍କୁ ଟିକା ଦିଆ ସରିଲାଣି ।