ନୂଆଦିଲ୍ଲୀ,୨୧ ।୧୨: ଗୋଟିଏ ପଟେ ଖୁବଶୀଘ୍ର କରୋନା ଭ୍ୟାକ୍ସିନ ଆସିବା କଥା ଜଣାପଡିବା ପରେ ଦେଶବାସୀ ଉତ୍ସାହିତ ଥିବା ବେଳେ ଅନ୍ୟପଟେ କରୋନାର ନୂଆ ରୂପ ସାମ୍ନାକୁ ଆସିବା ପରେ ଚିନ୍ତା ବଢି ଯାଇଛି । ବ୍ରିଟେନରେ କରୋନା ଭାଇରସର ନୂଆ ଷ୍ଟ୍ରେନ୍ ସାମ୍ନାକୁ ଆସିଥିବା ଜଣାପଡିଛି । ଯାହା ଖୁବ୍ ମାରାତ୍ମକ ବୋଲି କୁହାଯାଉଛି । ଏହା ଜଣାପଡିବା ପରେ ୟୁରୋପର କିଛି ଦେଶ ବ୍ରିଟେନ ଯାଉଥିବା ବିମାନ ଚଳାଚଳକୁ ବନ୍ଦ କରି ଦେଇଥିବା କୁହାଯାଉଛି । ଏହାକୁ ଦେଖି ଏବେ ଭାରତର କେତେଜଣ ରାଜନେତା ବ୍ରିଟେନ ବିମାନ ଚଳାଚଳ ରଦ୍ଦ କରିବାକୁ ଦାବି କଲେଣି । ଏହାକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଓ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଟୁଇଟ୍ କରିଥିବା ସୂଚନା ମିଳିଛି । କେଜରିୱାଲ ଲେଖିଛନ୍ତି ୟୁନାଇଟେଡ କିଙ୍ଗଡମରେ କରୋନାର ନୂଆ ରୂପ ସୁପର ସ୍ପ୍ରେଡର ଭଳି କାମ କରୁଛି । ତେଣୁ ସରକାର ତୁରନ୍ତ ସେଠାକୁ ଚଳାଚଳ କରୁଥିବା ବିମାନକୁ ବନ୍ଦ କରନ୍ତୁ । ଅନ୍ୟପଟେ ଗେହଲଟ ଲେଖିଛନ୍ତି ବ୍ରିଟେନରେ ଆସିଥିବା କରୋନାର ନୂଆ ଷ୍ଟ୍ରେନ୍ ଚିନ୍ତା ବଢାଇ ଦେଲାଣି । ତେଣୁ ଭାରତ ସରକାର ଏ ଦିଗରେ ତୁରନ୍ତ ପଦକ୍ଷେପ ନେବା ଦରକାର । ତେଣୁ ସେଠାକୁ ଚଳାଚଳ କରୁଥିବା ସମସ୍ତ ବିମାନକୁ ବନ୍ଦ କରି ଦିଆଯାଉ ।