ଅହମଦାବାଦ,୩ ।୯: ଗୁଜରାଟର ଆଗାମୀ ବିଧାନସଭା ନିର୍ବାଚନ ଲାଗି ଆମ ଆଦମୀ ପାର୍ଟି(ଏଏପି) ତା’ର ସମସ୍ତ ଶକ୍ତି ଲଗାଇ ଦେଇଛି । ଦଳର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଲଗାତାର ଗୁଜରାଟ ଗସ୍ତ କରୁଛନ୍ତି । ଏହି କ୍ରମରେ ଦୁଇ ଦିନିଆ ଗୁଜରାଟ ଗସ୍ତରେ ଯାଇଥିବା କେଜରିୱାଲ ଭାରତୀୟ ଜନତା ପାର୍ଟି(ଭାଜପା) କର୍ମୀଙ୍କୁ ନିଜ ଆଡକୁ ଆଣିବାକୁ ଏକ ଗରୁତ୍ୱପୂର୍ଣ୍ଣ ଅପିଲ କରିଛନ୍ତି ।
ଦୁଇ ଦିନିଆ ଗୁଜରାଟ ଗସ୍ତର ଶେଷ ଦିନରେ କେଜରିୱାଲ କହିଛନ୍ତି, ଆମକୁ ଭାଜପାର ବଡ ବଡ ନେତା ଦରକାର ନାହିଁ । ଆମକୁ ଏହାର ରାଜ୍ୟ ମୁଖିଆ ଓ କର୍ମୀ ଦରକାର । ସେ କହିଛନ୍ତି ଆପଣମାନେ ସମସ୍ତେ ଭାଜପାରେ ରୁହନ୍ତୁ । ଭାଜପା ପେମେଣ୍ଟ କରିଥାଏ, ପେମେଣ୍ଟ ସେଠାରୁ ନିଅ, ଆମ ପାଇଁ କାମ କର । କେଜରିୱାଲ ଦାବି କରିଛନ୍ତି ଯେ ବହୁ ସଂଖ୍ୟାରେ ଭାଜପା କର୍ମୀ ଏଏପିରେ ଯୋଗ ଦେଉଛନ୍ତି ।