ନୂଆଦିଲ୍ଲୀ,୧୭ ।୮: ଉତ୍ତରାଖଣ୍ଡ ବିଧାନସଭା ନିର୍ବାଚନକୁ ଆଉ ବର୍ଷକରୁ କମ୍ ସମୟ ବାକି ରହିଛି । ତେଣୁ ଏବେଠାରୁ ସମସ୍ତ ଦଳ ପ୍ରସ୍ତୁତି ଆରମ୍ଭ କରି ସାରିଲେଣି । ଏହି ନିର୍ବାଚନକୁ ଆଖି ଆଗରେ ରଖି ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟି(ଏଏପି)ର ମୁଖ୍ୟ ଅରବିନ୍ଦ କେଜରିୱାଲ ମଙ୍ଗଳବାର ଉତ୍ତରାଖଣ୍ଡ ଗସ୍ତ କରିଛନ୍ତି । ଏହି ଅବସରରେ ସେ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିଛନ୍ତି । କର୍ନଲ ଅଜୟ କୋଟିୱାଲ ଏଏପିର ମୁଖ୍ୟମନ୍ତ୍ରୀ ପ୍ରାର୍ଥୀ ବୋଲି କେଜରିୱାଲ ଘୋଷଣା କରିଛନ୍ତି । ଏହାସହ କେଜରିୱାଲ କହିଛନ୍ତି ପୂର୍ବରୁ ନେତାମାନେ ଉତ୍ତରାଖଣ୍ଡକୁ ଲୁଟୁଥିଲେ । ହେଲେ ଜଣେ ସେନା ଦେଶ ସେବାରେ ନିଜର ଜୀବନକୁ ବାଜି ଲଗାଇଥିବା ବେଳେ ଭବିଷ୍ୟତରେ ବି ସେ ଦେଶର ସେବା କରିବେ । ଯେତେବେଳେ ଉତ୍ତରାଖଣ୍ଡରେ ପ୍ରଳୟ ହୋଇଥିଲା ସେତେବେଳେ ସେ ପୁନରୁଦ୍ଧାର କାର୍ଯ୍ୟରେ ସହଯୋଗ କରିଥିଲେ । ଆଉ ଏବେ କୋଟିୱାଲ ଉତ୍ତରାଖଣ୍ଡରେ ପୁନଃନିର୍ମାଣ କାର୍ଯ୍ୟ କରିବେ ବୋଲି କେଜରିୱାଲ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଆମେ ଉତ୍ତରାଖଣ୍ଡରେ ସର୍ଭେ କରି ଜାଣିଲୁ ଯେ ଲୋକେ ଜଣେ ଦେଶ ସେବକକୁ ସେମାନଙ୍କ ନେତାଭାବେ ଦେଖିବାକୁ ଚାହାଁନ୍ତି । ବିଶେଷ କରି ମୁଖ୍ୟମନ୍ତ୍ରୀ ପରେ ଜଣେ ଦେଶଭକ୍ତ ରହିବା ଦରକାର । ଏହାପରେ ସେ ଉତ୍ତରାଖଣ୍ଡକୁ ଆଧ୍ୟାତ୍ମିକ ରାଜଧାନୀ ଭାବେ ଗଢିବା କଥା ଉଠାଇଛନ୍ତି ।
