ନୂଆଦିଲ୍ଲୀ,୧୭ ।୭: ଉତ୍ତରାଖଣ୍ଡରେ ଆସନ୍ତା ବର୍ଷ ହେବାକୁ ଯାଉଛି ବିଧାନସଭା ନିର୍ବାଚନ । ଏବେଠାରୁ କିନ୍ତୁ ସବୁ ରାଜନୈତିକ ଦଳ ଏହାକୁ ନେଇ ପ୍ରସ୍ତୁତି ଆରମ୍ଭ କରି ଦେଲେଣି । ଦିଲ୍ଲୀର ଶାସକ ଦଳ ଆମ ଆଦମୀ ପାର୍ଟି(ଏଏପି) ପ୍ରଥମ କରି ଏହି ନିର୍ବାଚନରେ ଭାଗ ନେବାକୁ ଯାଉଛି । ଏହାକୁ ନେଇ ସେ ଭୋଟରଙ୍କ ନିକଟତର ହେବାକୁ ଚେଷ୍ଟା କରିଛି । ପ୍ରଥମେ ମାଗଣା ବିଜୁଳୀ ଭଳି ଆଉ କିଛି ସୁବିଧା ଦେବ ବୋଲି କହିଥିବା ଏଏପି ଏବେ ପରିବେଶବିତ୍ ସ୍ୱର୍ଗତଃ ସୁନ୍ଦରଲାଲ ବହୁଗୁଣାଙ୍କୁ ଭାରତ ରତ୍ନ ଦେବାକୁ ଦାବି କରିଛି । ଏନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିଛନ୍ତି । ସେ ଲେଖିଛନ୍ତି, ଦିଲ୍ଲୀ ସରକାରଙ୍କ ପକ୍ଷରୁ ମୁଁ ଅନୁରୋଧ କରୁଛି କି ଶ୍ରୀ ସୁନ୍ଦରଲାଲ ବହୁଗୁଣାଙ୍କୁ ଭାରତରନ୍ନ ଦିଆଯାଉ । ତାଙ୍କୁ ଭାରତ ରତ୍ନ ପ୍ରଦାନ କରାଗଲେ ଏହି ସମ୍ମାନର ସମ୍ମାନ ହେବ । ମୁଁ ଆଶା କରୁଛି ଦିଲ୍ଲୀ ସରକାରଙ୍କ ଏହି ନିବେଦନକୁ ଆପଣ ବିଚାର କରିବେ । ଏହା ପୂର୍ବରୁ ମୁଖ୍ୟମନ୍ତ୍ରୀ କେଜରିୱାଲ ଗୁରୁବାର ଦିଲ୍ଲୀ ବିଧାନସଭା ପରିସରରେ ସୁନ୍ଦରଲାଲ ବହୁଗୁଣାଙ୍କ ସ୍ମୃତିରେ ଗଛ ଲଗାଇବା ସହ ଏକ ତୈଳ ଚିତ୍ର ଉନ୍ମୋଚନ କରିଥିଲେ । ସୁନ୍ଦରଲାଲ ବହଗୁଣା ଜଣାଶୁଣା ପରିବେଶବିତ ଏବଂ ଉତ୍ତରାଖଣ୍ଡରେ ‘ଚିପକୋ ଆନ୍ଦୋଳନ’ର ପ୍ରଣେତା ଥିଲେ । ମେ’ ୨୧ରେ ତାଙ୍କର ପରଲୋକ ହୋଇଛି । ‘ଚିପକୋ ଆନ୍ଦୋଳନ’ ବନ ସଂରକ୍ଷଣ ଅଭିଯାନ ଥିଲା ଯାହା ୧୯୭୩ରେ ଆରମ୍ଭ ହୋଇଥିଲା ।