ଭୋପାଳ,୧୮।୯: ମଧ୍ୟପ୍ରଦେଶରେ ବିଧାନସଭା ନିର୍ବାଚନ ପାଇଁ ଆଉ ଅଳ୍ପ ଦିନ ବାକି ଅଛି। ଆମ ଆଦମୀ ପାର୍ଟିର ମୁଖ୍ୟ ଅରବିନ୍ଦ କେଜ୍ରିୱାଲ ନିର୍ବାଚନ ବିଗୁଲ ବଜାଇବା ପାଇଁ ସୋମବାର ରେୱାରେ ପହଞ୍ଚିଛନ୍ତି। ମଧ୍ୟପ୍ରଦେଶରେ ଦୁଇଟି ଦଳ ଅଛି – ଭାଜପା ଏବଂ କଂଗ୍ରେସ, ଉଭୟଙ୍କୁ ହଟାନ୍ତୁ ବୋଲି ମଧ୍ୟପ୍ରଦେଶ ଜନସାଧାରଣଙ୍କୁ କେଜ୍ରିଓ୍ବାଲ୍ ଆହ୍ବାନ ଦେଇଛନ୍ତି।
ଅରବିନ୍ଦ କେଜ୍ରିୱାଲ ଭାଜପାକୁ ଟାର୍ଗେଟ କରି କହିଛନ୍ତି, ଭାଜପାକୁ କେବଳ କ୍ଷମତା ଆବଶ୍ୟକ ଏବଂ କ୍ଷମତା ପାଇଁ ଯଦି ଦେଶ ବିକ୍ରି କରିବାକୁ ପଡେ, ତେବେ ସେମାନେ ବିକି ଦେବେ। ମିଳିତ ମେଣ୍ଟ ‘ଇଣ୍ଡିଆ’କୁ ନେଇ ମଧ୍ୟ ଭାଜପାର ସମସ୍ୟା ରହିଛି। ଭାଜପାକୁ ‘ଇଣ୍ଡିଆ’ ନାଁ ଶୁଣି ବିରକ୍ତ ଲାଗୁଛି। ସେଥିପାଇଁ ସେମାନେ ଦେଶର ନାଁ ବଦଳାଇବାକୁ ଚେଷ୍ଟା କରୁଛନ୍ତି।
କଥାରେ ଅଛି ପ୍ରଥମେ ବ୍ୟବହାର କର, ପରେ ବିଶ୍ୱାସ କର। ଯଦି ଆପଣ ଭାବୁଛନ୍ତି ଦିଲ୍ଲୀ ଏବଂ ପଞ୍ଜାବରେ କାମ ହୋଇଛି, ତେବେ ଆମକୁ ଭୋଟ ଦିଅନ୍ତୁ। ମଧ୍ୟପ୍ରଦେଶରେ ଦୁଇଟି ଦଳ କଂଗ୍ରେସ ଏବଂ ଭାଜପାକୁ ହଟାଇ ଆମ ଆଦମୀ ପାର୍ଟିକୁ ସୁଯୋଗ ଦିଅନ୍ତୁ, ମୁଁ ଚ୍ୟାଲେଞ୍ଜ କରୁଛି ଆପଣ ଉଭୟ ଦଳକୁ ଭୁଲିଯିବେ ବୋଲି କେଜ୍ରିଓ୍ବାଲ୍ କହିଛନ୍ତି।