ନୂଆଦିଲ୍ଲୀ,୨୯।୯: ୨୦୧୫ ଡ୍ରଗ୍ସ ମାମଲାରେ ପଞ୍ଜାବ ପୋଲିସ କଂଗ୍ରେସ ବିଧାୟକ ସୁଖପାଲ ସିଂ ଖେରାଙ୍କୁ ଗିରଫ କରିଛି। ଏହି ଗିରଫ ପରେ ପଞ୍ଜାବର ଆମ ଆଦମୀ ପାର୍ଟି ସରକାର ଏବଂ କଂଗ୍ରେସ ମଧ୍ୟରେ ବିବାଦ ଖବର ସାମ୍ନାକୁ ଆସିଛି। ଉଭୟ ଦଳ ବିରୋଧୀ ମେଣ୍ଟ ଇଣ୍ଡିଆର ଏକ ଅଂଶ। ଏଥି ସହିତ, ବର୍ତ୍ତମାନ ଏହି ପ୍ରସଙ୍ଗରେ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟିର ସଂଯୋଜକ ଅରବିନ୍ଦ କେଜ୍ରିଓ୍ବାଲ କହିଛନ୍ତି, ତାଙ୍କ ଦଳ ଇଣ୍ଡିଆ ମେଣ୍ଟ ପାଇଁ ପ୍ରତିବଦ୍ଧ। ସେ ଇଣ୍ଡିଆ ମେଣ୍ଟର ପ୍ରଧାନମନ୍ତ୍ରୀଙ୍କ ଚେହେରା ବିଷୟରେ ମଧ୍ୟ କହିଛନ୍ତି।
ଦିଲ୍ଲୀର ଗଣମାଧ୍ୟମ ସହ କଥାବାର୍ତ୍ତା ବେଳେ ଅରବିନ୍ଦ କେଜ୍ରିଓ୍ବାଲଙ୍କୁ କଂଗ୍ରେସ ବିଧାୟକଙ୍କ ଗିରଫଦାରୀ ସମ୍ପର୍କରେ ପଚରାଯାଇଥିଲା। ଏହା ଉପରେ ସେ କହିଛନ୍ତି, ମୁଁ ଜାଣିଛି ଗତକାଲି ପଞ୍ଜାବ ପୋଲିସ କିଛି କଂଗ୍ରେସ ନେତାଙ୍କୁ ଗିରଫ କରିଛି। ମୋ ପାଖରେ କୌଣସି ସୂଚନା ନାହିଁ। କେବଳ ପଞ୍ଜାବ ପୋଲିସ ଏ ବିଷୟରେ କହିପାରିବ। କେଜ୍ରିଓ୍ବାଲ କହିଛନ୍ତି, ଆମେ ପଞ୍ଜାବରେ ଡ୍ରଗ୍ସ ବିରୋଧରେ ଲଢିଛୁ। ମୁଁ କୌଣସି ବ୍ୟକ୍ତିଗତ ବିଷୟ କିମ୍ବା ବ୍ୟକ୍ତି ଉପରେ ମନ୍ତବ୍ୟ ଦେବାକୁ ଚାହେଁ ନାହିଁ । କିନ୍ତୁ ନିଶା ସେବନକୁ ଶେଷ କରିବା ପାଇଁ ଆମେ ସଂପୂର୍ଣ୍ଣ ପ୍ରତିବଦ୍ଧ।
ପଞ୍ଜାବରେ କଂଗ୍ରେସ ବିଧାୟକ ଗିରଫ ହେବା ପରେ ଚର୍ଚ୍ଚା ଚାଲିଥିଲା କି ଏଏପି ଏବଂ କଂଗ୍ରେସ ମଧ୍ୟରେ ଇଣ୍ଡିଆ ମେଣ୍ଟରେ ବିବାଦ ସୃଷ୍ଟି ହୋଇପାରେ। ପୂର୍ବରୁ ପଞ୍ଜାବର ଆମ ଆଦମୀ ପାର୍ଟି ସରକାର ଏବଂ କଂଗ୍ରେସ ସହ ମଧ୍ୟ ସଂଘର୍ଷ ହୋଇସାରିଛି। କେଜ୍ରିଓ୍ବାଲ ବିବାଦର କଥାକୁ ଅଣଦେଖା କରି କହିଛନ୍ତି, ଆମ ଆଦମୀ ପାର୍ଟି ଇଣ୍ଡିଆ ମେଣ୍ଟ ସହିତ ଅଛି। ଆମେ ଇଣ୍ଡିଆ ମେଣ୍ଟକୁ ସମର୍ଥନ କରୁଛୁ।