ମୁମ୍ବାଇ, ୧୫।୧୨: ବଲିଉଡ୍ ଷ୍ଟାର ଶାହରୁଖ ଖାନ୍ଙ୍କ ପୁଅ ଆର୍ୟନ ଖାନ୍ଙ୍କୁ ଜାମିନ ସର୍ତ୍ତ ଅନୁଯାୟୀ ଆଉ ମୁମ୍ବାଇର ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନ୍ସିବି) ଅଫିସରେ ପ୍ରତି ଶୁକ୍ରବାର ହାଜିରା ଦେବାକୁ ପଡ଼ିବ ନାହିଁ। ଏହି କଟକଣାରୁ ତାଙ୍କୁ ଆଶ୍ୱସ୍ତି ଦେଇଛନ୍ତି ବମ୍ବେ ହାଇକୋର୍ଟ।
କ୍ରୁଜ୍ ଜାହାଜରେ ରେଭ୍ ପାର୍ଟି ବେଳେ ଡ୍ରଗ୍ସ ସହ ଏନ୍ସିବି ଆର୍ୟନଙ୍କୁ ଗିରଫ କରିଥିଲା। ଜାମିନ ପ୍ରଦାନ ବେଳେ ପ୍ରତି ଶୁକ୍ରବାର ଏନ୍ସିବି ଅଫିସରେ ହାଜର ହେବାକୁ ସର୍ତ୍ତ ରଖାଯାଇଥିଲା। ସର୍ତ୍ତାବଳୀ କୋହଳ କରିବା ପାଇଁ ଆର୍ୟନ ବମ୍ବେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସର୍ତ୍ତାବଳୀରେ ସଂଶୋଧନ କରାଯାଇଥିବା ବିଚାରପତି ଏନ୍.ଡବ୍ଲ୍ୟୁ. ସାମ୍ବ୍ରେଙ୍କ ଖଣ୍ଡପୀଠ କହିଛନ୍ତି।
କେବଳ ଦିଲ୍ଲୀ ଏନ୍ସିବି କାର୍ଯ୍ୟାଳୟ ନିର୍ଦ୍ଦେଶ ଦେଲେ ଆର୍ଯ୍ୟନ ହାଜର ହେବେ। ଏଥିପାଇଁ ୭୨ ଘଣ୍ଟା ପୂର୍ବରୁ ଏନ୍ସିବି ତାଙ୍କୁ ନୋଟିସ କରିବାକୁ ପଡ଼ିବ। ସେହିପରି ଆର୍ୟନ ମୁମ୍ବାଇ ବାହାରକୁ ଯିବା ପାଇଁ ଏନ୍ସିବିରେ ଯାତାୟାତର ବିବରଣୀ ଦାଖଲ କରିବାକୁ କୁହାଯାଇଥିଲା। ଏହି ସର୍ତ୍ତରେ ମଧ୍ୟ ସଂଶୋଧନ କରାଯାଇଛି। ବୟାନ ରେକର୍ଡ ପାଇଁ ଦିଲ୍ଲୀ ଯିବାକୁ ହେଲେ ତାଙ୍କୁ ଯାତ୍ରା ବିବରଣୀ ଦେବାକୁ ପଡ଼ିବ ନାହିଁ। ତେବେ ଅନ୍ୟ କୌଣସି ସ୍ଥାନକୁ ଗଲେ ବିବରଣୀ ଦାଖଲ କରିବାକୁ ହେବ ବୋଲି ହାଇକୋର୍ଟ କହିଛନ୍ତି। ଆର୍ୟନଙ୍କ ମାମଲା ସହ ଏବେ ମୁମ୍ବାଇ ଏନ୍ସିବି କାର୍ଯ୍ୟାଳୟର କିଛି କରିବାର ନାହିଁ। ତାଙ୍କ ମହକିଲ ତଦନ୍ତରେ ସହଯୋଗ କରିବା ସହ ଦିଲ୍ଲୀ ଏସ୍ଆଇଟି ତଦନ୍ତର ସମ୍ମୁଖୀନ ହୋଇ ବୟାନ ରେକର୍ଡ କରାଇଛନ୍ତି। ତେଣୁ ତାଙ୍କ ଜାମିନ ସର୍ତ୍ତାବଳୀ ଉଠାଇଦେବାକୁ ଆର୍ୟନଙ୍କ ଓକିଲ ଅମିତ୍ ଦେଶାଇ ହାଇକୋର୍ଟଙ୍କୁ ଅନୁରୋଧ କରିଥିଲେ।
