ବାରିପଦା,୨୬ା୪(ନୀଳାଦ୍ରି ବିହାରୀ ଦଣ୍ଡପାଟ): ଶିମିଳିପାଳ ଅଭୟାରଣ୍ୟରେ ପ୍ରତିଦିନ ବନାଗ୍ନି ଦେଖିବାକୁ ମିଳୁଛି। ସବୁଜିମା ଭରା ବିସ୍ତୀର୍ଣ୍ଣ ଅଞ୍ଚଳରେ ନିଆଁ ମାଡ଼ିଚାଲିଛି। କର୍ମଚାରୀମାନେ ଅକ୍ଳାନ୍ତ ପରିଶ୍ରମ କରି ଯେତିକି ନିଆଁ ଲିଭାଉଛନ୍ତି ଅନ୍ୟସ୍ଥାନରେ ସେତିକି ଜଳୁଥିବା ଦେଖିବାକୁ ମିଳୁଛି। ନିଆଁ ଲିଭା କାମରେ ବନ ବିଭାଗ, ଦମକଳ ବାହିନୀ ଓ ଓଡ୍ରାଫ୍ଟ ଟିମ୍ ନିୟୋଜିତ ଅଛନ୍ତି। ଗୁରୁବାର ଅଭୟାରଣ୍ୟରେ ୩୧ଟି ଫାୟାର ପଏଣ୍ଟ ଚିହ୍ନଟ ହୋଇଥିବା ନେଇ କ୍ଷେତ୍ର ନିର୍ଦ୍ଦେଶକ ତଥା ଆଞ୍ଚଳିକ ବନ୍ୟପ୍ରାଣୀ ସଂରକ୍ଷକ(ଆର୍ସିସିଏଫ) ଡ.ପ୍ରକାଶ ଚାନ୍ଦ ଗୋଗିନେନୀ କହିଛନ୍ତି ା
ସତ୍ତ୍ୱେ ସମ୍ପୂର୍ଣ୍ଣ ବନାଗ୍ନି ରୋକାଯାଇପାରୁ ନାହିଁ। ନିଆଁକୁ ନେଇ ବିଭାଗୀୟ ଅଧିକାରୀ ଓ ପରିବେଶବିତ୍ମାନେ ଚିନ୍ତାରେ ପଡ଼ିଛନ୍ତି। ବର୍ଷ ତମାମ ଶିମିଳିପାଳ ଅଭୟାରଣ୍ୟ ସଂଲଗ୍ନ ଓ ଆଭ୍ୟନ୍ତରୀଣ ଅଞ୍ଚଳରେ ବନାଗ୍ନିକୁ ନେଇ ବିଭିନ୍ନ ସଚେତନତା ଭିତ୍ତିିକ କାର୍ଯ୍ୟକ୍ରମ କରାଯାଉଛି। ମହୁଲ ସଂଗ୍ରହ ଓ ଶିକାର ଉଦ୍ଦେଶ୍ୟରେ ଲୋକେ ନିଆଁ ଲଗାଇବାକୁ ପଛାଉ ନାହାନ୍ତି। ଜୀବନଜୀବିକା ଉଦ୍ଦେଶ୍ୟରେ ଲୋକେ ବନ୍ୟଜାତ ଦ୍ରବ୍ୟ ଉପରେ ନିର୍ଭର କରି ଏଭଳି ପରିସ୍ଥିତି ସୃଷ୍ଟି କରୁଥିବା ନେଇ ପରିବେଶବିତ୍ ଭାନୁମିତ୍ର ଆଚାର୍ଯ୍ୟ କହିଛନ୍ତି। ସେମାନଙ୍କ ଜୀବନ ଶୈଳୀରେ ପରିବର୍ତ୍ତନ କରି ରୋଜଗାରକ୍ଷମ ପୂର୍ବକ ସମାଜର ମୁଖ୍ୟ ସ୍ରୋତରେ ସାମିଲ କରାଯାଇ ପାରିଲେ ଏହାକୁ ରୋକାଯାଇ ପାରିବ ବୋଲି ଆଚାର୍ଯ୍ୟ ମତ ଦେଇଛନ୍ତି। ସେହିପରି ନିଆଁ ଲଗାଉଥିବା ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି। ଅଭୟାରଣ୍ୟକୁ ବାଦ୍ ଦେଲେ ଗାଁ ଗଣ୍ଡାରେ ଅନେକ ଜଙ୍ଗଲ ରହିଛି। ଚଳିତ ବର୍ଷ ଏହି ଜଙ୍ଗଲଗୁଡ଼ିକରେ ବନାଗ୍ନି ଦେଖାଯାଇନାହିଁ। ବନାଗ୍ନିକୁ ରୋକିବା ପାଇଁ ଯୁବପୀଢିଠାରୁ ଆରମ୍ଭ କରି ପ୍ରତ୍ୟେକ ନାଗରିକମାନଙ୍କ ଦାୟିତ୍ୱ ଓ କର୍ତ୍ତବ୍ୟ ରହିବା ଜରୁରୀ ବୋଲି ପରିବେଶବିତ ସଂଯୁକ୍ତା ବସା କହିଛନ୍ତି। ଚଳିତ ବର୍ଷ ଅପେକ୍ଷାକୃତ କମ ବନାଗ୍ନି ସୃଷ୍ଟି ହୋଇଥିବା ବନ ବିଭାଗ ସୂଚନା ଦେଇଛି। ଅଭୟାରଣ୍ୟ ଅଧୀନ ରାଇରଙ୍ଗପୁର ବନଖଣ୍ଡରେ ୨ଟି ଓ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଦକ୍ଷିଣ ବନଖଣ୍ଡ ଅଞ୍ଚଳରେ ୧୨ଟି ଓ ଉତ୍ତର ବନଖଣ୍ଡ ଅଞ୍ଚଳରେ ୧୭ଟି ସ୍ଥାନକୁ ମିଶାଇ ୩୧ଟି ଫାୟାର ପଏଣ୍ଟ ଚିହ୍ନଟ କରାଯାଇଛି। ସୂଚନା ମିଳିବା ପରେ ନିଆଁକୁ ଆୟତ୍ତ କରିବା ପାଇଁ ବନାଗ୍ନି ରକ୍ଷାକାରୀମାନେ ପହଞ୍ଚତ୍ ୪ଟି ପଏଣ୍ଟର ନିଆଁକୁ ଆୟତ୍ତ କରିଛନ୍ତି। ଅବଶିଷ୍ଟ ୨୭ ପଏଣ୍ଟରେ ନିଆଁ ଜଳୁଥିବା ବେଳେ କର୍ମଚାରୀମାନେ ପହଞ୍ଚତ୍ ଆୟତ୍ତ କରିବାରେ ଲାଗିଛନ୍ତି। ନିଆଁ ଲାଗି ଅନେକ କୀଟପତଙ୍ଗ ନଷ୍ଟ ହେଉଥିବା ବେଳେ ବନ୍ୟଜନ୍ତୁ ଭୟଭୀତ ଅବସ୍ଥାରେ ରହିଛନ୍ତି। ବିଶେଷ ଭାବେ ବ୍ୟାଘ୍ର ସଂରକ୍ଷଣ ପ୍ରକଳ୍ପରେ ବନାଗ୍ନିର ମାତ୍ରା ଅଧିକ ରହିଛି। ଜଙ୍ଗଲ ପଥ ଗୁଡ଼ିକରେ ପାଟ୍ରୋଲିଂ ବ୍ୟବସ୍ଥା କଡ଼ାକଡ଼ି କରିବାକୁ ଦାବି ହେଉଛି।