ଲକ୍ଷ୍ନୌ,୧୩ ।୬: ଭାରତୀୟ ଜନତା ପାର୍ଟି(ଭାଜପା)ରୁ ନିଲମ୍ବିତ ହୋଇଥିବା ରାଷ୍ଟ୍ରୀୟ ପ୍ରବକ୍ତା ନୁପୁର ଶର୍ମା ପ୍ରଫେଟ ମହମ୍ମଦଙ୍କୁ ନେଇ ଦେଇଥିବା ବିବାଦୀୟ ଟିପ୍ପଣିକୁ ବିରୋଧ କରି ଦେଶର ବିଭିନ୍ନ ସ୍ଥାନରେ ହିଂସା ପରିସ୍ଥିତି ଉପୁଜିଛି । ଶୁକ୍ରବାରର ନମାଜ ପରେ ଉତ୍ତର ପ୍ରଦେଶର ବିଭିନ୍ନ ସ୍ଥାନରେ ପରିସ୍ଥିତି ଅଣାୟତ ହୋଇ ପଡିଥିଲା । ଏହାପରେ ଉତ୍ତର ପ୍ରଦେଶର ଯୋଗୀ ସରକାର ଅଭିଯୁକ୍ତଙ୍କ ବିରୋଧରେ ଲଗାତାର କଡା କାର୍ଯ୍ୟାନୁଷ୍ଠାନ କରି ଆସୁଛନ୍ତି । ପ୍ରୟାଗରାଜରେ ହୋଇଥିବା ହିଂସାର ମାଷ୍ଟରମାଇଣ୍ଡ କୁହାଯାଉଥିବା ମହମ୍ମଦ ଜାଭେଦ ଓରଫ ଜାଭେଦ ପମ୍ପ ଅବୈଧ ଭାବେ ନିର୍ମାଣ କରିଥିବା ଏକ ୩ ମହଲା ଘରକୁ ରବିବାର ବୁଲଡୋଜର ସାହାଯ୍ୟରେ ଭାଙ୍ଗି ଦିଆଯାଇଛି । ଏହାକୁ ନେଇ ଏବେ ରାଜନୀତି ହେଲାଣି ସରଗରମ । ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓୱାଇସି ବୁଲଡୋଜର ଚଲାଇବାକୁ ନେଇ କଡା ପ୍ରତିକ୍ରିୟା ଦେଇଛନ୍ତି ।
ଗୁଜରାଟର କଚ୍ଛରେ ରାଲି କରୁଥିବା ସମୟରେ ଓସଦୁଦ୍ଦିନ ଓୱାଇସି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଟାର୍ଗେଟ କରି କହିଛନ୍ତି, ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଏବେ ଉତ୍ତର ପ୍ରଦେଶର ଚିଫ ଜଷ୍ଟିଶ ହୋଇଗଲେଣି । ସେ ଏବେ ସ୍ଥିର କରିବେ ଯେ କାହାର ଘର ଭଙ୍ଗାଯିବ । ତେଣୁ ଉତ୍ତର ପ୍ରଦେଶର କୋର୍ଟରେ ତାଲା ଲଗାଇଦେବା ଦରକାର । ଆଉ ବିଚାରପତିଙ୍କୁ କହିଦେବା ଉଚିତ ଯେ ସେମାନେ ଆଉ କୋର୍ଟ ଯିବାର ଆବଶ୍ୟକତା ନାହିଁ, କାରଣ ସୋମାନଙ୍କର ଆଉ କିଛି କାମ ନାହିଁ । ଏବେ ମୁଖ୍ୟମନ୍ତ୍ରୀ ଯୋଗୀ ନିଷ୍ପତ୍ତି ନେବେ ଯେ ଅପରାଧି କିଏ । ଏହି ଘଟଣାକୁ ନେଇ ଓୱାଇସି କହିଛନ୍ତି, ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଦେଶର ରୁଲ ଅଫ ଲ ଉପରେ ବୁଲଡୋଜର ଚଲାଇ ଦେଇଛନ୍ତି ।
