ପାଟଣା,୨୨।୪(ସ୍ବ.ପ୍ର.): କେନ୍ଦୁଝର ଜିଲା ପାଟଣା ତହସିଲ ଅଞ୍ଚଳରେ ଗୁରୁବାର ସକାଳୁ କାଳବୈଶାଖୀ ପ୍ରଭାବରେ ଘଡ଼ଘଡି ସହ ପ୍ରବଳ ବର୍ଷା ପବନରେ ବଡ଼ ବଡ଼ ଗଛ ଭାଙ୍ଗି ପଡ଼ିବା ସହ ଘରର ଆଜବେଷ୍ଟସ୍ ଉଡ଼ିଯାଇଛି।
ମିଳିଥିବା ସୂଚନାନୁସାରେ, ପାଟଣା ବ୍ଲକ ଅନ୍ତର୍ଗତ ବଡ଼ପାଟଣା ପଞ୍ଚାୟତ ମାଧପୁର ଗ୍ରାମ ଧଉଳି ସାହିର ଆଶୀର୍ବାଦ ମହାନ୍ତଙ୍କ ପରିବାର ଗୁରୁବାର ସକାଳୁ ରୋଷେଇ କରୁଥିବା ସମୟରେ କାଳବୈଶାଖୀ ଯୋଗୁ ରୋଷେଇ ଘର ଆଜବେଷ୍ଟସ ସମ୍ପୂର୍ଣ୍ଣ ଭାବେ ଉଡ଼ିଯାଇଛି। ପରିବାର ଲୋକେ ଅଳ୍ପକେ ବର୍ତ୍ତି ଯାଇଛନ୍ତି। ଅନୁରୂପ ଭାବେ ପାଟଣା ମୁଖ୍ୟାଳୟସ୍ଥିତ ବଜାରର ରେଞ୍ଜ ଅଫିସ କାର୍ଯ୍ୟାଳୟରେ ଥିବା ଏକ ପୁରାତନ କୃଷ୍ଣଚୂଡ଼ା ଗଛ ଭାଙ୍ଗି ପଡ଼ିବାରୁ ରାସ୍ତା ଜାମ ହୋଇଯାଇଥିଲା। ବନ କର୍ମଚାରୀମାନେ ଗଛ କାଟିବା ପରେ ରାସ୍ତାରେ ଗାଡ଼ି ଚଳାଚଳ ସ୍ବାଭାବିକ ହୋଇଛି।