କଟକ ଅଫିସ,୯।୩: ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଗିରଫ ହୋଇ ଜେଲ୍ରେ ଥିବା ପୋଲିସ କମ୍ୟୁନିକେଶନ ସେଲ୍ର ଅତିରିକ୍ତ ଏସ୍ପି ତ୍ରିନାଥ ମିଶ୍ରଙ୍କ ସ୍ତ୍ରୀ ଦୀପ୍ତିମୟୀ ମିଶ୍ରଙ୍କୁ ହାଇକୋର୍ଟ ମଙ୍ଗଳବାର ଆଗୁଆ ଜାମିନ ପ୍ରଦାନ କରିଛନ୍ତି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ତ୍ରିନାଥ ଓ ଦୀପ୍ତିମୟୀଙ୍କ ନଁାରେ ଭିଜିଲାନ୍ସ ପକ୍ଷରୁ ମାମଲା(ନଂ.୧୩/୨୨) ରୁଜୁ ହୋଇଥିଲା। ତେବେ ଗିରଫଦାରିକୁ ଏଡାଇବା ପାଇଁ ଦୀପ୍ତିମୟୀ ଗତ ୧୭ ତାରିଖରେ ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିଲେ। ବିଚାରପତି ସଙ୍ଗମ କୁମାର ସାହୁ ଏହି ମାମଲାର ଶୁଣାଣି କରି ଦୀପ୍ତିମୟୀଙ୍କୁ ଆଗୁଆ ଜାମିନ ପ୍ରଦାନ କରିଛନ୍ତି। ତଦନ୍ତବେଳେ ସେ ତଦନ୍ତକାରୀ ଅଧିକାରୀଙ୍କୁ ସହଯୋଗ କରିବେ ଓ ପ୍ରମାଣ ନଷ୍ଟ ନ କରିବାକୁ ସାହୁ ସର୍ତ୍ତ ରଖିଛନ୍ତି।
ସୂଚନାଯୋଗ୍ୟ, ଗତମାସ ୧୫ ତାରିଖରେ ତ୍ରିନାଥଙ୍କ ଘର ସମେତ କଟକ, ଯାଜପୁର, ଖୋର୍ଦ୍ଧା, ଜଗତ୍ସିଂହପୁର ଓ ନବରଙ୍ଗପୁର ଜିଲାର ୧୧ଟି ସ୍ଥାନରେ ଚଢ଼ାଉ କରାଯାଇ ୮ କୋଟି ୬୮ ଲକ୍ଷ ଟଙ୍କାରୁ ଊର୍ଦ୍ଧ୍ୱ ସମ୍ପତ୍ତି ଠାବ କରାଯାଇଥିଲା, ଯାହାକି ତାଙ୍କ ଆୟର ୪୮୯% ଅଧିକ। ଦାମୀ କାର୍, ବାଇକ, କୋଠା, ଫାର୍ମ ହାଉସ, ନର୍ସିଂହୋମ, ଔଷଧ ପ୍ରସ୍ତୁତି ୟୁନିଟ୍, ଟ୍ରାନ୍ସପୋର୍ଟ ସଂସ୍ଥା, ଫ୍ଲାଟ୍ ଆଦି ତ୍ରିନାଥ ଓ ତାଙ୍କ ପରିବାରଙ୍କ ନାମରେ ରହିଥିବା ନେଇ ଭିଜିଲାନ୍ସ ବିଭାଗ ପ୍ରାଥମିକ ତଦନ୍ତରୁ ଜାଣିବାକୁ ପାଇଥିଲା। ଏହି ଘଟଣାରେ ଗତ ୧୬ ତାରିଖରେ ତ୍ରିନାଥଙ୍କୁ ଭିଜିଲାନ୍ସ ଗିରଫ କରିଥିଲା। ଆଇନଜୀବୀ ଦେବାଶିଷ ପଣ୍ଡା, ସୁଦୀପ୍ତ ପଣ୍ଡା ଓ ବିଭୂତି ଭୂଷଣ ଚୌଧୁରୀ ମାମଲା ପରିଚାଳନା କରିଥିଲେ।
