ସମ୍ବଲପୁର,୧୩ା୬(ବ୍ୟୁରୋ): ଝାରସୁଗୁଡ଼ା ଓ ସମ୍ବଲପୁର ଜିଲାରେ ଶିଳ୍ପ କାରଖାନା ଗଢ଼ିଉଠିବା ପରେ ପାଉଁଶ ଡମ୍ପିଂ ଲୋକଙ୍କ ପାଇଁ ଏକ ବଡ଼ ସମସ୍ୟା ଭାବେ ଉଭାହୋଇଛି। ଝାରସୁଗୁଡ଼ା ପରେ ସମ୍ବଲପୁର ଜିଲାରେ ଏହି ଡମ୍ପିଂ ବଢିବାରେ ଲାଗିଛି। ଯୁଯୁମୁରା ତହସିଲ ଅଞ୍ଚଳରେ ଏଭଳି ଡମ୍ପିଂ ଲୋକଙ୍କୁ ଅତିଷ୍ଠ କରୁଛି। ଏବେ ସଦର ଉପଖଣ୍ଡ ଓ ରେଙ୍ଗାଲି ଅଞ୍ଚଳରେ ପୁଣି ଏଭଳି ୟାର୍ଡ ପାଇଁ ଆବେଦନ କରାଯାଇଥିବା ଜଣାପଡିଛି। ଏହି ସମସ୍ୟା ନେଇ ଯୁଯୁମୁରା ଅଞ୍ଚଳବାସୀ ଅଭିଯୋଗ କରିବା ପରେ ମଧ୍ୟ ପ୍ରଦୂଷଣ ବିଭାଗ କିମ୍ବା ଜିଲା ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଅଭିଯୋଗ ହେଉଛି। ଫଳରେ ପାଉଁଶର ପାହାଡ଼ ବଢ଼ି ବଢ଼ି ଚାଲିଛି। ଏଥିରେ ନିୟୋଜିତ ଟ୍ରାନ୍ସପୋର୍ଟର ମାଲାମାଲ ହେଉଥିବାବେଳେ ସବୁଜ ବନାନୀ ଉଜୁଡିବା ଆଶଙ୍କା ସୃଷ୍ଟି ହୋଇଛି। ଏହି ବ୍ୟବସାୟରେ ରାଜନେତାଠାରୁ ଆରମ୍ଭକରି ବଡ଼ବଡ଼ିଆଙ୍କ ସମ୍ପୃକ୍ତି ରହୁଥିବା କୁହାଯାଉଛି। ପ୍ରାୟ ସ୍ଥାନରେ ବେଆଇନ ଭାବେ ଚାଲୁଥିବାବେଳେ ସରକାରୀ ନିୟମକୁ ବେଖାତିର କରି କେତେକ ସ୍ଥାନରେ ପାଉଁଶ ୟାର୍ଡ କରିବାକୁ ଅନୁମତି ମଧ୍ୟ ପ୍ରଦାନ କରାଯାଉଛି। ହେଲେ ସେଥିରେ ଯେଉଁ ସର୍ତ୍ତାବଳୀ ରହିଛି ତାହାକୁ ଅନୁମତି ପାଇଥିବା କମ୍ପାନୀ ପାଳନ କରୁନାହିଁ।
ଯୁଯୁମୁରା ତହସିଲ ନୀଳଡୁଙ୍ଗରୀ (କେଶିଡେରା) ଅଞ୍ଚଳରେ ପାଉଁଶ ଡମ୍ପିଂୟାର୍ଡ କରାଯାଇଛି। ସାମାନ୍ୟ ପବନ ହେଲେ ଏହି ପାଉଁଶ ଜାତୀୟ ରାଜପଥ, ନିକଟସ୍ଥ ଗ୍ରାମକୁ ଉଡ଼ି ଆସୁଛି। ଏପରି କି ଘର ଭିତରେ ପଶିଯାଉଛି। ବର୍ଷ ବର୍ଷ ଧରି ନିକଟ ଗ୍ରାମବାସୀ ଏହାକୁ ବିରୋଧ କରିଆସୁଛନ୍ତି। ସ୍ଥାନୀୟ ଲୋକଙ୍କ ଅଭିଯୋଗକ୍ରମେ, ପୂର୍ବରୁ ସବୁଜ ବଳୟ ଓ ବନ୍ୟପ୍ରାଣୀଙ୍କ ଆଶ୍ରୟସ୍ଥଳ ଭାବେ ପରିଚିତ ଥିଲା ଏହି ଘଞ୍ଚ ଜଙ୍ଗଲ। ଏପରି କି ସିସାଲ ଫାର୍ମ ନାମରେ ମଧ୍ୟ ପ୍ରସିଦ୍ଧ ଥିଲା। କିନ୍ତୁ ଏବେ ପରିଚୟ ହରାଇବାକୁ ବସିଲାଣି। ଏଠାରେ ରହୁଥିବା ବନ୍ୟପ୍ରାଣୀ ଓ ନିକଟସ୍ଥ ଗ୍ରାମବାସୀ ଅସୁରକ୍ଷିତ ମନେକରୁଛନ୍ତି। କାରଣ ନିକଟରେ ପାଉଁଶ ଡମ୍ପିଂ ୟାର୍ଡ କରିବାକୁ ଅନୁମତି ଦିଆଯାଇଛି। ଏହାକୁ ନେଇ ସ୍ଥାନୀୟ କବରପାଲି ସରପଞ୍ଚ ଓ ପରିବେଶବିତ୍ ପୂର୍ବରୁ ଜିଲାପାଳ ଓ ପ୍ରଦୂଷଣ ବିଭାଗ ପାଖରେ ଅଭିଯୋଗ କରିଥିଲେ। ହେଲେ କୌଣସି ସମାଧାନ ହୋଇପାରିଲା ନାହିଁ। ବୃହତ୍ ମାର୍କେଟ ଟର୍ମିନାଲ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶିଳାନ୍ୟାସ କରିଥିଲେ। ହେଲେ ଜଙ୍ଗଲ ବିଭାଗ ଅନୁମତି ନ ଦେବାରୁ ଉକ୍ତ ପ୍ରକଳ୍ପ ହୋଇପାରିଲା ନାହିଁ ବୋଲି କୁହାଯାଉଛି। ଅନ୍ୟପଟେ ଦ୍ୱିତୀୟ ଚିିଡ଼ିଆଖାନାରେ ପରିଣତ କରିବାକୁ ମଧ୍ୟ ଯୋଜନା କରାଯାଇଥିଲା। ତାହା ମଧ୍ୟ ଅଧାରେ ରହିଯାଇଛି। ନିକଟରେ ଗ୍ରାମ ରହିଥିବା ବେଳେ କୃଷି ବିଭାଗର ତାଲିମ କେନ୍ଦ୍ର, ଜାତୀୟ ରାଜପଥ, ଗ୍ରାମ୍ୟ ଜଙ୍ଗଲ, ଲୋକଙ୍କ ରୟତି ଜମି ରହିଛି। ହେଲେ କେମିତି ଅନୁମତି ଦିଆଯାଇଛି ତାହା ଏବେ ସନ୍ଦେହଘେରକୁ ଆସିଛି। ୨୦୨୨ ଡିସେମ୍ବର ୨୯ରେ ପଞ୍ଚାୟତ ପତ୍ର ସଂଖ୍ୟା ୫୪୭ରେ ଜିଲାପାଳଙ୍କ ପାଖରେ କବରାପାଲି ସରପଞ୍ଚ ମଧ୍ୟ ଏନ୍ଓସି ଦେଇ ନ ଥିବା ଅଭିଯୋଗ କରାଯାଇଥିଲା। ହେଲେ ପ୍ରଦୂଷଣ ବିଭାଗ ଘଟଣାସ୍ଥଳ ପରିଦର୍ଶନକରି ଲୋକଙ୍କ ବାସ୍ତବ ସମସ୍ୟାକୁ ଦେଖି ଯଦି ଅନୁମତି ଦେଇଛି ତା’ହେଲେ ବାତିଲ କରାଯାଉ ବୋଲି ଦାବି ହେଉଛି। ଏ ସମ୍ପର୍କରେ ସମ୍ବଲପୁର ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ବୋର୍ଡ ଦାୟିତ୍ୱରେ ଥିବା ଅଧିକାରୀ ସତ୍ୟନାରାୟଣ ନନ୍ଦ କହିଛନ୍ତି, ନିକଟରେ ଜଙ୍ଗଲ ଓ ବନ୍ୟପ୍ରାଣୀ ଆଶ୍ରୟସ୍ଥଳ ବାବଦରେ ଜାଣି ନ ଥିଲି। ହେଲେ ପ୍ରଥମେ ତହସିଲଦାର ଓ ଜିଲାପାଳ ଅନୁମତି ଦେବା ପରେ ପ୍ରଦୂଷଣ ବିଭାଗ ଅନୁମତି ଦେଇଥାଏ। ୩ବର୍ଷ ପୂର୍ବରୁ ଅନୁମତି ଦିଆଯାଇଥିଲା। ୨୦୨୩ ମାର୍ଚ୍ଚରେ ଅବଧି ଶେଷ ହେବା ପରେ ପୁଣି ଏକବର୍ଷ ପାଇଁ ସମୟ ବୃଦ୍ଧି କରାଯାଇଛି। ଲୋକଙ୍କ ସମସ୍ୟା ନେଇ ଅଭିଯୋଗ କରିବା ପରେ କମ୍ପାନୀକୁ ନିୟମ ଅନୁସାରେ କାମ କରିବାକୁ ତାଗିଦ କରାଯିବ ବୋଲି ସେ କହିଥିଲେ।