ଝାରସୁଗୁଡ଼ା ଅଫିସ,୧୧ା୪: ଝାରସୁଗୁଡ଼ାସ୍ଥିତ ଓଡ଼ିଶା ବିଦ୍ୟୁତ୍ ଉତ୍ପାଦନ ନିଗମ (ଓପିଜିସି)ର ଇବ୍ଥର୍ମାଲ ପ୍ରକଳ୍ପରୁ ନିର୍ଗତ ହେଉଥିବା ତରଳ ବର୍ଜ୍ୟବସ୍ତୁ ପାଉଁଶ ପାଇପ୍ ଦ୍ୱିତୀୟଥର ପାଇଁ ଫାଟିଯାଇଛି। ଫଳରେ ତରଳ ବର୍ଜ୍ୟବସ୍ତୁ ପୋଖରୀ ଓ ଚାଷଜମିରେ ମାଡିଯାଇଛି।
ସୂଚନାଯୋଗ୍ୟ ଗତ ଶୁକ୍ରବାର ଏହି ପାଇପ୍ ଫାଟିଯିବା ଫଳରେ ପାର୍ଶ୍ୱବର୍ତ୍ତୀ ଗ୍ରାମ ବନହରପାଲି ପ୍ରଭାବିତ ହୋଇଥିଲା। ବର୍ଜ୍ୟବସ୍ତୁ ପାଉଁଶ ଗାଁ ପୋଖରୀ ଓ ଚାଷଜମିରେ ମାଡିଯିବାରୁ ଉତ୍ତ୍ୟକ୍ତ ଗ୍ରାମବାସୀ ପ୍ରକଳ୍ପ କାର୍ଯ୍ୟାଳୟ ଘେରାଉ କରିଥିଲେ। କମ୍ପାନୀ ପକ୍ଷରୁ ତଦନ୍ତ କରାଯାଇ ପ୍ରତିକାର କରାଯିବ ବୋଲି ପ୍ରତିଶ୍ରୁତି ମିଳିବା ପରେ ସେମାନେ ଆନ୍ଦୋଳନରୁ ଓହରିଥିଲେ।
କମ୍ପାନୀର ଏକ ସ୍ବତନ୍ତ୍ର ଟିମ୍ ଗତ ଶନିବାର ଗ୍ରାମରେ ପହଞ୍ଚତ୍ ପୋଖରୀ ପୁନରୁଦ୍ଧାର ସାଙ୍ଗକୁ କ୍ଷତିପୂରଣ ଦେବାପାଇଁ ପ୍ରତିଶ୍ରୁତି ଦେଇଥିଲେ। ଆଗାମୀ ଦିନରେ ଏଭଳି ଘଟଣା ଯେଭଳି ନ ହେବ ସେ ନେଇ ପଦକ୍ଷେପ ନିଆଯିବ ବୋଲି କହିଥିଲେ। ଏହାର ଦିନକ ପରେ ସୋମବାର ସକାଳେ ପୁଣି ପାଉଁଶ ପାଇପ୍ ଫାଟି ତରଳ ବର୍ଜ୍ୟବସ୍ତୁ ପୋଖରୀରେ ମିଶିଛି। ଗ୍ରାମବାସୀ ପହଞ୍ଚତ୍ କମ୍ପାନୀର ଏଭଳି କାର୍ଯ୍ୟକଳାପକୁ ବିରୋଧ କରିଥିଲେ। କମ୍ପାନୀ ଅଧିକାରୀ ଗ୍ରାମବାସୀଙ୍କ ସହିତ ଆଲୋଚନା କରି ପାଇପ୍ ମରାମତି ପାଇଁ ପାଣି ଛଡାଯାଇଛି ବୋଲି କହିଥିଲେ। ଗ୍ରାମବାସୀ ପୂର୍ବରୁ କାହିଁିକି ପ୍ରତିକାର କରାଗଲା ନାହିଁ, ପାଉଁଶ ପାଣି ପୋଖରୀରେ କିଭଳି ପ୍ରବେଶ କଲା ବୋଲି ପ୍ରଶ୍ନ କରିଥିଲେ। ଏଭଳି ପରିସ୍ଥିତିରେ ପୋଖରୀରେ ପାଉଁଶ ପାଣି ପ୍ରବେଶ ନ କରିବା ପାଇଁ କମ୍ପାନୀ ପକ୍ଷରୁ ଏକ ମାଟି ଆଡ଼ିବନ୍ଧ ନିର୍ମାଣ ଚାଲିଛି। ହେଲେ ଏହି ବନ୍ଧ ବର୍ଷାଋତୁରେ ପାଉଁଶ ପାଣିକୁ ଅଟକାଇପାରିବ ନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ପୋଖରୀ ମୁଣ୍ଡରେ ଆଡ଼ିବନ୍ଧ ନିର୍ମାଣ ହେବା ଫଳରେ ନିକଟରେ ଥିବା କେତେକ ବାସଗୃହ ପାଉଁଶ ପାଣିରେ ବୁଡ଼ିଯିବ ବୋଲି ଗ୍ରାମବାସୀ କହିଛନ୍ତି। ଏ ନେଇ ଓପିଜିସି ବିସ୍ଥାପିତ ଥଇଥାନ ସଂଗ୍ରାମ ସିମିତି ଓ ଭାରତୀୟ କମ୍ୟୁନିଷ୍ଟ ପାର୍ଟିର ମିଳିତ ପ୍ରତିନିଧି ଦଳ ଜିଲା ପ୍ରଦୂଷଣ ନିୟନ୍ତ୍ରଣ ଅଧିକାରୀଙ୍କୁ ଭେଟି ପ୍ରତିକାରପାଇଁ ଲିଖିତ ଅଭିଯୋଗ କରିଛନ୍ତି। ଏହି ପ୍ରତିନିଧି ଦଳରେ ସିପିଆଇ ନେତା ରମେଶ ତ୍ରିପାଠୀ, ଯୋଗେନ୍ଦ୍ର ମାଝି, ଗୌରଚନ୍ଦ୍ର କାଲୋ, ରବୀନ୍ଦ୍ର ବାରିକ ପ୍ରମୁଖ ରହିଥିଲେ। ଏ ନେଇ କମ୍ପାନୀ ସୂଚନା ଓ ଲୋକସମ୍ପର୍କ ଅଧିକାରୀ ହିମାଂଶୁ ବେହେରା କହିଛନ୍ତି, ସୋମବାର ପାଉଁଶ ପାଇପ୍ ଫାଟିନାହିଁ ା ପୂର୍ବରୁ ଫାଟିଥିବା ପାଇପ୍ ମରାମତି ଚାଲିଥିବାବେଳେ ପାଣି ଛଡାଯାଇଥିଲା।