ଲଣ୍ଡନ,୫।୭: ଇଂଲଣ୍ଡ ଏବଂ ଅଷ୍ଟ୍ରେଲିଆ ମଧ୍ୟରେ୨୦୨୩ ଆଶେସ ସିରିଜର ତୃତୀୟ ଟେଷ୍ଟ ମ୍ୟାଚ ଆସନ୍ତାକାଲିଠାରୁ ଅର୍ଥାତ୍ ୬ ଜୁଲାଇରୁ ଲିଡ୍ସର ହେଡିଙ୍ଗଲିରେ ଖେଳାଯିବ। ପ୍ରଥମ ଦୁଇଟି ଟେଷ୍ଟରେ ପରାଜୟ ପରେ ଆୟୋଜକ ଦଳ ଅନେକ ପରିବର୍ତ୍ତନ ସହିତ ତୃତୀୟ ଟେଷ୍ଟକୁ ଯିବେ। ରିପୋର୍ଟ ଅନୁଯାୟୀ, ହେଡିଙ୍ଗଲିରେ ଖେଳାଯିବାକୁ ଥିବା ତୃତୀୟ ଟେଷ୍ଟରେ ଦଳରେ ଅନେକ ପରିବର୍ତ୍ତନ ଆସିବ। ଅଷ୍ଟ୍ରେଲିଆ ଦଳ ବର୍ତ୍ତମାନ ପାଞ୍ଚ ମ୍ୟାଚ ସିରିଜରେ ୨-୦ ଆଗରେ ଅଛି।
ଆହତ କାରଣରୁ ତୃତୀୟ ନମ୍ବର ବ୍ୟାଟ୍ସମ୍ୟାନ ତଥା ଉପ-ଅଧିନାୟକ ଅଲି ପୋପ ତୃତୀୟ ଟେଷ୍ଟରୁ ବାଦ୍ ପଡିଛନ୍ତି। ଓଲି ପୋପଙ୍କର କାନ୍ଧରେ ଆଘାତ ଲାଗିଛି। ତେବେ ଆଶେସର ଅବଶିଷ୍ଟ ତିନୋଟି ମ୍ୟାଚରୁ ଇଂରାଜୀ ଉପ-ଅଧିନାୟକଙ୍କୁ ବାଦ ଦିଆଯାଇଛି।
ସେହିପରି ପ୍ରଥମ ଦୁଇଟି ଟେଷ୍ଟରେ ସାଧାରଣ ଥିବା ଜେମ୍ସ ଏଣ୍ଡରସନ ତୃତୀୟ ଟେଷ୍ଟରେ ବେଞ୍ଚରେ ବସିପାରନ୍ତି। ରିପୋର୍ଟରେ ଦାବି କରାଯାଇଛି ଯେ ଜେମ୍ସ ଏଣ୍ଡରସନଙ୍କ ସହ ଜୋଶ ଟଙ୍ଗ ମଧ୍ୟ ତୃତୀୟ ଟେଷ୍ଟରେ ଖେଳୁଥିବା ଏକାଦଶର ଅଂଶ ହେବେ ନାହିଁ। ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ, ବୋଲିଂ ଅଲରାଉଣ୍ଡର କ୍ରିସ ୱୁକ ଏବଂ ସ୍ପିଡଷ୍ଟାର ଉଡଙ୍କୁ ସୁଯୋଗ ମିଳିବ। ଏହା ବ୍ୟତୀତ ସ୍ପିନ ଅଲରାଉଣ୍ଡର ମୋଇନ ଅଲି ମଧ୍ୟ ଦଳକୁ ଫେରିବେ।
