ନୂଆଦିଲ୍ଲୀ,୨୫।୧ : ଲଖିମପୁର ଖେରୀ ହିଂସା ମାମଲାରେ ସୁପ୍ରିମକୋର୍ଟ ଅଭିଯୁକ୍ତ ଆଶିଷ ମିଶ୍ରାଙ୍କୁ ସର୍ତ୍ତମୂଳକ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଛନ୍ତି। ୮ ସପ୍ତାହ ପାଇଁ ସର୍ତ୍ତମୂଳକ ଜାମିନରେ ମିଶ୍ରଙ୍କୁ ମୁକ୍ତ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ସମ୍ପୃକ୍ତ ଅଦାଲତଙ୍କୁ ତାଙ୍କ ଅବସ୍ଥିତି ବିଷୟରେ ଜଣାଇବାକୁ କୋର୍ଟ ଆଶିଷଙ୍କୁ ନିର୍ଦ୍ଦେଶ ଦେଇଛନ୍ତି।
ଏଥିସହ ସୁପ୍ରିମକୋର୍ଟ କହିଛନ୍ତି ଯେ ଯଦି ଆଶିଷ କିମ୍ବା ତାଙ୍କ ପରିବାର ଏହି ମାମଲା ସହ ଜଡିତ ସାକ୍ଷୀଙ୍କୁ ପ୍ରଭାବିତ କରିବାକୁ କିମ୍ବା ବିଚାର ପ୍ରକ୍ରିୟାକୁ ବିଳମ୍ବ କରିବାକୁ ଚେଷ୍ଟା କରନ୍ତି, ତେବେ ଆଶିଷ ମିଶ୍ରଙ୍କ ଜାମିନ ରଦ୍ଦ କରାଯିବ।
ଆଶିଷଙ୍କୁ ଜାମିନ ପ୍ରଦାନ କରୁଥିବାବେଳେ ସୁପ୍ରିମକୋର୍ଟ ମଧ୍ୟ ଏକ ସର୍ତ୍ତ ରଖିଛନ୍ତି ଯେ ସେ ଦିଲ୍ଲୀ ଏନସିଆର ଏବଂ ଉତ୍ତରପ୍ରଦେଶରେ ରହିବେ ନାହିଁ। ଜାମିନ ପାଇବା ପରେ ଆଶିଷଙ୍କୁ ଏକ ସପ୍ତାହ ପରେ ଉତ୍ତରପ୍ରଦେଶ ଛାଡିବାକୁ ପଡିବ।
ସୂଚନାଯୋଗ୍ୟ, ଜାନୁଆରୀ ୧୯ ରେ ଆଶିଷଙ୍କ ଜାମିନ ଆବେଦନର ଶୁଣାଣି ଶେଷ ହେବା ପରେ ସୁପ୍ରିମକୋର୍ଟ ଏହି ରାୟ ସଂରକ୍ଷିତ ରଖିଥିଲେ। ଶୁଣାଣି ସମୟରେ ଆଶିଷଙ୍କ ଆଇନଜୀବୀ ମୁକୁଲ ରୋହତଗୀ କହିଛନ୍ତି ଯେ ଆଶିଷ ଏକ ବର୍ଷରୁ ଅଧିକ ସମୟ ଜେଲରେ ଅଛନ୍ତି ଏବଂ ବିଚାର ପ୍ରକ୍ରିୟା କିପରି ଚାଲିଛି, ଏହାକୁ ସମାପ୍ତ କରିବାକୁ ୭-୮ ବର୍ଷ ସମୟ ଲାଗିବ। ମୁକୁଲ ରୋହତଗି ଏହା ମଧ୍ୟ କହିଥିଲେ ଯେ ଏହି ମାମଲାରେ ଅଭିଯୋଗ କରିଥିବା ଜଗଜିତ ସିଂ ଘଟଣାର ପ୍ରତ୍ୟକ୍ଷଦର୍ଶୀ ନୁହଁନ୍ତି ଏବଂ ତାଙ୍କ ଅଭିଯୋଗ କେବଳ ଶୁଣାଣି ଉପରେ ଆଧାରିତ। ରୋହତଗି ଏହା ମଧ୍ୟ କହିଥିଲେ ଯେ ଆଶିଷ ଅପରାଧୀ ନୁହଁନ୍ତି କିମ୍ବା ତାଙ୍କର କୌଣସି ଅପରାଧିକ ଇତିହାସ ନାହିଁ।