ନୂଆଦିଲ୍ଲୀ,୨୧।୯: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ ବୁଧବାର କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଛନ୍ତି। ଏହି ସାକ୍ଷାତ ପରେ ସେ କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ପ୍ରାର୍ଥୀ ହେବେ ଚର୍ଚ୍ଚା ହେଉଛି। ଏହାପୂର୍ବରୁ ଗେହଲୋଟ ତାଙ୍କ ବାସଭବନରେ ବିଧାନସଭା ଦଳର ଏକ ବୈଠକ କରିଥିଲେ। ଏଥିରେ ସେ କଂଗ୍ରେସ ଅଧ୍ୟକ୍ଷ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ସୂଚିତ କରିଥିଲେ।
ସୋନିଆ ଗାନ୍ଧୀଙ୍କୁ ଭେଟିବା ପୂର୍ବରୁ ରାଜସ୍ଥାନର ଗେହଲୋଟ କହିଛନ୍ତି, ମୁଁ ଭାଗ୍ୟବାନ ଯେ, ସାରା ଦେଶରେ କଂଗ୍ରେସ କର୍ମୀଙ୍କ ସ୍ନେହ ଏବଂ ବିଶ୍ୱାସ ମୋ ସହ ରହିଛି। ଯଦି ମୋତେ ଅଧ୍ୟକ୍ଷ ନିର୍ବାଚନ ଲଢିବାକୁ କୁହାଯାଏ, ମୁଁ ନାମାଙ୍କନ ଦାଖଲ କରିବି। ମୁଁ କଂଗ୍ରେସର ସେବା କରିବାକୁ ଏଠାରେ ଅଛି। ତେଣୁ ଯାହା ଦାୟିତ୍ୱ ଦିଆଯିବ ମୁଁ ତାହା ପୂରଣ କରିବି। ପଦ ମୋ ପାଇଁ ଗୁରୁତ୍ୱପୂର୍ଣ୍ଣ ନୁହେଁ। ମୁଁ ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ନିର୍ବାହ କରୁଛି ଏବଂ ଏହା ଜାରି ରଖିବି।
କଂଗ୍ରେସ ଏମ୍ପି ରାହୁଲ ଗାନ୍ଧୀଙ୍କୁ ଭେଟିବା ପାଇଁ ଅଶୋକ ଗେହଲୋଟ ଆଜି କୋଚି ଯିବାର କାର୍ଯ୍ୟକ୍ରମ ରହିଛି। ରାହୁଲ ଗାନ୍ଧୀ ବର୍ତ୍ତମାନ ଭାରତ ଯୋଡ ଯାତ୍ରାରେ ଅଛନ୍ତି।
ସୂଚନାଯୋଗ୍ୟ,କଂଗ୍ରେସର ପରବର୍ତ୍ତୀ ଅଧ୍ୟକ୍ଷ ଚୟନ ପାଇଁ ନିର୍ବାଚନ ଅକ୍ଟୋବର ୧୭ରେ ହେବ ଏବଂ ଅକ୍ଟୋବର ୧୯ରେ ଭୋଟ ଗଣତି ଅନୁଷ୍ଠିତ ହେବ।
