ଅହମ୍ମଦାବାଦ,୨୪।୨: ବିଶ୍ୱର ସର୍ବବୃହତ୍ କ୍ରିକେଟ ଷ୍ଟାଡିୟମରେ ବୁଧବାରଠାରୁ ଆରମ୍ଭ ହୋଇଥିବା ଇଂଲଣ୍ଡ ବିପକ୍ଷ ତୃତୀୟ ତଥା ଦିବାରାତ୍ର ଟେଷ୍ଟ ମ୍ୟାଚ୍ ପ୍ରଥମ ଦିନ ଶେଷ ସୁଦ୍ଧା ଟିମ୍ ଇଣ୍ଡିଆ କବ୍ଜାରେ ରହିଛି। ପ୍ରଥମେ ରବିଚନ୍ଦ୍ରନ ଅଶ୍ୱିନ ଓ ଅକ୍ଷର ପଟେଲଙ୍କ ସ୍ପିନ ଯୋଡ଼ି ଏବଂ ପରେ ରୋହିତ ଶର୍ମାଙ୍କ କ୍ଲାସି ଅର୍ଦ୍ଧଶତକ ଯୋଗୁ ଏହା ସମ୍ଭବ ହୋଇପାରିଛି।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡର କୌଣସି ବ୍ୟାଟ୍ସମ୍ୟାନ ଭାରତୀୟ ସ୍ପିନରଙ୍କ ବଲକୁ ବୁଝି ପାରି ନ ଥିଲେ। ଦଳ ମାତ୍ର ୧୧୨ ରନ୍ରେ ସୀମିତ ରହିଥିଲା। ସବୁଠୁ କୌତୁହଳ କଥା ହେଲା, ଜ୍ୟାକ କ୍ରଲି ୫୩ ରନ୍ କରିଥିବାବେଳେ ଅନ୍ୟ ସମସ୍ତ ଖେଳାଳି ଏକତ୍ରିତ ହୋଇ ୫୩ ରନ୍ ହିଁ କରି ପାରିଥିଲେ। ଆଉ ଘରୋଇ ଦଳ ପକ୍ଷରୁ ଦିଆଯାଇଥିଲା ଅତିରିକ୍ତ ୬ ରନ୍। ସର୍ବାଧିକ ୬ ଉଇକେଟ ହାତେଇଥିଲେ କ୍ୟାରିୟରର ଦ୍ୱିତୀୟ ମ୍ୟାଚ୍ ଖେଳୁଥିବା ଅକ୍ଷର। ଅଭିଜ୍ଞ ରବିଚନ୍ଦ୍ରନ ଅଶ୍ୱିନ ୩ ଓ ଈଶାନ୍ତ ଶର୍ମା ଗୋଟିଏ ସଫଳତା ଅକ୍ତିଆର କରିଥିଲେ।
ଭାରତୀୟ ଦଳ ପାଇଁ ଧୈର୍ଯ୍ୟର ସହ ଇନିଂସ ଆରମ୍ଭ କରିଥିଲା ରୋହିତ ଶର୍ମା ଓ ଶୁବମାନ ଗିଲଙ୍କ ଓପନିଂ ଯୋଡ଼ି। ଦୁହେଁ ୩୩ ରନ୍ ଯୋଡ଼ିଥିଲେ। ଏହାପରେ ଦଳ କ୍ରମାଗତ ବ୍ୟବଧାନରେ ଗିଲ (୧୧) ଓ ଚେତ୍ତେଶ୍ୱର ପୂଜାରା (୦)ଙ୍କ ଉଇକେଟ ହରାଇ ଥିଲା। ଏହିଠାରୁ ଅଧିନାୟକ ବିରାଟ କୋହଲିଙ୍କ ସହ ମିଶି ରୋହିତ ଶର୍ମା ୩ୟ ଉଇକେଟ ପାଇଁ ଦଳୀୟ ସ୍କୋରରେ ଯୋଗ କରିଥିଲେ ୬୪ ରନ୍। ୨୭ ରନ୍ କରିଥିବାବେଳେ କୋହଲି ଜ୍ୟାକ ଲିଚ୍ଙ୍କ ବଲରେ କ୍ଲିନ ବୋଲ୍ଡ ହୋଇଥିଲେ। ଫଳରେ ଷ୍ଟମ୍ପ ଅପସାରଣ ସୁଦ୍ଧା ଟିମ୍ ଇଣ୍ଡିଆ ୩୩ ଓଭରରେ ୩ ଉଇକେଟ ହରାଇ ୯୯ ରନ୍ କରିବାକୁ ସକ୍ଷମ ହୋଇଛି। ରୋହିତ ୫୭ ଓ ଅଜିଙ୍କ୍ୟ ରାହାନେ ୧ ରନ୍ କରି ଅପରାଜିତ ଅଛନ୍ତି।