ଅହମ୍ମଦାବାଦ,୨୫।୨ : ଏଠାରେ ଇଂଲଣ୍ଡ ବିପକ୍ଷରେ ଚାଲିଥିବା ତୃତୀୟ ଟେଷ୍ଟ ମ୍ୟାଚ୍ରେ ଭେଟେରାନ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ହାସଲ କରିଛନ୍ତି ୪୦୦ ଉଇକେଟ। କ୍ୟାରିୟରର ୭୭ତମ ଟେଷ୍ଟରେ ଅଶ୍ୱିନ ସ୍ପର୍ଶ କରିଛନ୍ତି ଏହି ମାଇଲଷ୍ଟୋନ। ଏହି ଧାରାରେ ସେ ମହାନ ଭାରତୀୟ ସ୍ପିନର ତଥା ପୂର୍ବତନ ଅଧିନାୟକ ଅନିଲ କୁମ୍ବଲେଙ୍କୁ ପଛରେ ପକାଇ ଦେଇଛନ୍ତି। କୁମ୍ବଲେ କ୍ୟାରିୟରର ୮୫ ତମ ଟେଷ୍ଟରେ ୪୦୦ ଉଇକେଟ ହାସଲ କରିଥିଲେ। ଟେଷ୍ଟ କ୍ରିକେଟ ଇତିହାସରେ ୪୦୦ ଉଇକେଟ ହାତେଇବାରେ ଅଶ୍ୱିନ ଦ୍ୱିତୀୟ ଦ୍ରୁତତମ ବୋଲର।
ତେବେ ଏହି ରେକର୍ଡ କିମ୍ବଦନ୍ତୀ ଅଫ୍ ସ୍ପିନର ମୁଥୟା ମୁରଲିଧରଣ (ଶ୍ରୀଲଙ୍କା)ଙ୍କ ନାମରେ ରହିଛି। ସେ ମାତ୍ର ୭୨ଟି ଟେଷ୍ଟରେ ଏହି ମାଇଲଷ୍ଟୋନରେ ପହଞ୍ଚିଥିଲେ। ତାଲିକାରେ ଅଶ୍ୱିନଙ୍କ ପଛକୁ ରିଚାର୍ଡ ହାଡଲି ଓ ଡେଲ ଷ୍ଟେଇନ (୮୦ତମ ଟେଷ୍ଟ) ଏବଂ ରଙ୍ଗନା ହେରାଥ (୮୪) ରହିଛନ୍ତି।