ନୂଆଦିଲ୍ଲୀ,୯।୯: ଅକ୍ଟୋବର ୧୭ରୁ ୟୁଏଇ ଏବଂ ଓମାନରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପ୍ ପାଇଁ ବିସିସିଆଇ ପକ୍ଷରୁ ଭାରତୀୟ ଦଳ ଘୋଷଣା କରାଯାଇଛି। ୟୁଏଇର ଅବସ୍ଥାକୁ ଦୃଷ୍ଟିରେ ରଖି ଚେତନ ଶର୍ମାଙ୍କ ନେତୃତ୍ୱରେ ଚୟନ କମିଟି ଦଳରେ ୫ ସ୍ପିନରଙ୍କୁ ସାମିଲ କରିଛି। ସେଥିରେ ଚାରି ବର୍ଷ ଧରି ଭାରତୀୟ ଟି-୨୦ ଦଳରୁ ବାହାରିଥିବା ରବିଚନ୍ଦ୍ରନ ଅଶ୍ୱିନଙ୍କ ନାମ ଥିବା ଦେଖି ଅନେକ ଚକିତ ହୋଇଛନ୍ତି। ତାଙ୍କ ଛଡ଼ା ରବିନ୍ଦ୍ର ଜାଡେଜା, ରାହୁଲ ଚହର, ଅକ୍ଷର ପଟେଲ, ବରୁଣ ଚକ୍ରବର୍ତ୍ତୀ ମଧ୍ୟ ସ୍ଥାନ ପାଇଛନ୍ତି।
ଦୀର୍ଘ ୪ ବର୍ଷର ବ୍ୟବଧାନ ପରେ ଟିମ୍ ଇଣ୍ଡିଆକୁ ଫେରିଥିବା ୩୪ ବର୍ଷୀୟ ଅଶ୍ୱିନ ଜୁଲାଇ ୯, ୨୦୧୭ରେ ଶେଷ ଥର ପାଇଁ ଟି-୨୦ ମ୍ୟାଚ୍ ଖେଳିଥିଲେ। ସେବେଠାରୁ ତାଙ୍କୁ ଟେଷ୍ଟ ଦଳରେ ସୁଯୋଗ ଦିଆଯାଇଥିଲା। ହେଲେ ଏବେ ସେ ସୀମିତ ଓଭର ଟିମ୍କୁ ପ୍ରତ୍ୟାବର୍ତ୍ତନ କରିଛନ୍ତି। ହଠାତ୍ ଦଳରେ ସୁଯୋଗ ଦିଆଯିବା ବିଷୟରେ ଚୟନ କମିଟି ଅଧ୍ୟକ୍ଷ ଚେତନ ଶର୍ମା କହିଛନ୍ତି, ଅଶ୍ୱିନ ଆମ ପାଇଁ ଜଣେ ଗୁରୁତ୍ୱପୂର୍ଣ୍ଣ ଖେଲାଳି। ସେ ଆଇପିଏଲ୍ରେ ଭଲ ପ୍ରଦର୍ଶନ କରିଛନ୍ତି। ଆମକୁ ଅଭିଜ୍ଞ ଖେଳାଳି ଦରକାର। ଓ୍ବାଶିଂଟନ ସୁନ୍ଦର ଆହତ ହୋଇଥିବା ଯୋଗୁ ଆମକୁ ଆଉ ଜଣେ ଅଫ୍ ସ୍ପିନରଙ୍କ ଆବଶ୍ୟକତା ଥିଲା। ଏଥିପାଇଁ ଅଶ୍ୱିନ ଦଳର ପ୍ରମୁଖ ଖେଳାଳି ପାଲଟିଛନ୍ତି। ସେ ଆଇପିଏଲ୍ରେ ଚମତ୍କାର କରି ଦଳରେ ସ୍ଥାନ ପାଇଛନ୍ତି ବୋଲି ଚେତନ କହିଛନ୍ତି।
୨୦୧୭ରେ ଭାରତୀୟ ଟିମ୍ରୁ ବାଦ ପଡ଼ିବା ପରେ ଅଶ୍ୱିନ ୨୦୧୮ରୁ ୨୦୨୧ ଯାଏ ଆଇପିଏଲ୍ରେ ଚମତ୍କାର ବୋଲିଂ କରି ସମସ୍ତଙ୍କୁ ପ୍ରଭାବିତ କରିଥିଲେ। ୨୦୧୮ରେ ସେ ୧୦ ଉଇକେଟ, ୨୦୧୯ରେ ୧୫, ୨୦୨୦ରେ ୧୩ ଉଇକେଟ ନେଇଥିଲେ। ଆଇପିଏଲ୍ ୨୦୨୧ର ପ୍ରଥମ ପର୍ଯ୍ୟାୟରେ ଅଶ୍ୱିନ୍ ୫ ମ୍ୟାଚ୍ରେ ମାତ୍ର ୧ ଉଇକେଟ ନେଇଥିବା ବେଳେ ପରିବାରଲୋକ କରୋନା ଆକ୍ରାନ୍ତ ହେବାକୁ ନେଇ ସେ ନିଜ ନାମ ପ୍ରତ୍ୟାହାର କରିନେଇଥିଲେ। ଏବେ ତାଙ୍କୁ ଜାତୀୟ ଦଳରେ ସୁଯୋଗ ମିଳିଥିବାରୁ ସେ ଏହି ସୁଯୋଗକୁ ହାତଛଡ଼ା କରିବାକୁ ଚାହିଁବେ ନାହିଁ ବୋଲି ଆଶା କରାଯାଉଛି।