ନୂଆଦିଲ୍ଲୀ,୧।୧: ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ପାଇଁ ଦଳକୁ ଫେରିଛନ୍ତି ଟିମ୍ ଇଣ୍ଡିଆର ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ। ପ୍ରାୟ ସାଢେ ଚାରି ବର୍ଷ ପରେ ଅଶ୍ୱିନ ଦିନିକିଆ ଦଳକୁ ଫେରିଛନ୍ତି। ଏହାପୂର୍ବରୁ ୨୦୨୧ ଟି-୨୦ ବିଶ୍ୱକପ୍ରେ ଅଶ୍ୱିନ୍ଙ୍କୁ ହଠାତ୍ ସାମିଲ କରାଯାଇଥିଲା। ଏହି ସୁଯୋଗର ଫାଇଦା ଉଠାଇଥିଲେ ସେ। ବିଶ୍ୱକପ୍ରେ ସେ ପ୍ରଭାବି ବୋଲିଂ କରିବା ସହ ୬ ଉଇକେଟ ନେଇଥିଲେ। ଏବେ ଏହାର ପରିଣାମସ୍ବରୂପ ପୁଣି ଥରେ ତାଙ୍କୁ ଦିନିକିଆ ଦଳରେ ସାମିଲ କରାଯାଇଛି ବୋଲି କୁହାଯାଉଛି।
୩୫ ବର୍ଷୀୟ ଅଶ୍ୱିନ ଏପର୍ଯ୍ୟନ୍ତ ୧୧୧ ଟି ଦିନିକିଆ ଖେଳି ୧୫୦ ଉଇକେଟ ନେଇଛନ୍ତି। ଟି -୨୦ରେ ସେ ୫୧ ମ୍ୟାଚ୍ରେ ୬୧ ଉଇକେଟ ନେଇଛନ୍ତି। ଟେଷ୍ଟରେ ଅଶ୍ୱିନ ଏକ ମହାନ ଅଫ୍ ସ୍ପିନର ଭାବରେ ବିବେଚିତ ହୋଇଛନ୍ତି। ଏଯାବତ ସେ ୮୨ ଟେଷ୍ଟ ଖେଳି ୪୨୯ ଉଇକେଟ ନେଇଛନ୍ତି।
କହିରଖୁଛୁ, ଦକ୍ଷିଣ ଆଫ୍ରିକା ବିପକ୍ଷ ସିରିଜ ପାଇଁ ବିସିସିଆଇ ଶୁକ୍ରବାର ୧୮ ଜଣିଆ ଦଳ ଘୋଷଣା କରିଛି। ଜାନୁଆରୀ ୧୯, ୨୧ ଏବଂ ୨୩ରେ ଏହି ସିରିଜ ଖେଳାଯିବ। ଏହି ସିରିଜ ପାଇଁ ରୋହିତ ଶର୍ମା ଫିଟ ନ ଥିବାରୁ ଦଳର ନେତୃତ୍ୱ କେ.ଏଲ ରାହୁଲଙ୍କୁ ହସ୍ତାନ୍ତର କରାଯାଇଛି।