ପାଟନା,୧୨ ।୧: ରାମଚରିତ ମାନସକୁ ନେଇ ବିବାଦୀୟ ବୟାନ ଦେଇ ଏବେ ସମ୍ପୂର୍ଣ୍ଣ ଭାବେ ଫସି ଯାଇଛନ୍ତି ବିହାରର ଶିକ୍ଷାମନ୍ତ୍ରୀ ଚନ୍ଦ୍ରଶେଖର ସିଂ । ପ୍ରାୟ ସମସ୍ତ ରାଜନୈତିକ ଦଳ ତାଙ୍କ ବୟାନକୁ ନେଇ ଆଲୋଚନା କରିଛନ୍ତି । ଏବେ କେନ୍ଦ୍ରମନ୍ତ୍ରୀ ଅଶ୍ୱିନୀ ଚୌବେ ବି ଚନ୍ଦ୍ରଶେଖରଙ୍କ ବୟାନକୁ ନେଇ ନିଜର ପ୍ରତିକ୍ରିୟା ରଖିଛନ୍ତି ।
ଅଶ୍ୱିନୀ ଚୌବେ କହିଛନ୍ତି, ଏ ହେଉଛନ୍ତି ଅଜ୍ଞାନୀ ଶିକ୍ଷାମନ୍ତ୍ରୀ । ସେ ହଜାର ହଜାର ଧର୍ମାବଲମ୍ବିଙ୍କ ଅପମାନ କରିଛନ୍ତି । ଦୁର୍ଭାଗ୍ୟପୂର୍ଣ୍ଣ ଯେ ରାଜ୍ୟର ମୁଖ୍ୟମନ୍ତ୍ରୀ ନୀତୀଶ କୁମାର ଧ୍ରୁତରାଷ୍ଟ୍ର ହୋଇ ବସିଛନ୍ତି । ରାମଚରିତ ମାନସ ଏକ ଜୀବନ ପଦ୍ଧତି, ଏମିତି ଶିକ୍ଷାମନ୍ତ୍ରୀ ତୁରନ୍ତ ଇସ୍ତଫା ଦେବା ଦରକାର । ମୁଁ ଏବେ ବକ୍ସର ଯାଉଛି । ଏମିତି ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ହେବା ଦରକାର । ନୀତୀଶ କୁମାର ଧ୍ରୁତରଷ୍ଟ୍ର ହୋଇ ବସିଛନ୍ତି ।
ସୂଚନାଯୋଗ୍ୟ, ବିହାରର ଶିକ୍ଷାମନ୍ତ୍ରୀ ଚନ୍ଦ୍ରଶେଖର ଏମିତି ଏକ ବୟାନ ଦେଇ ବିବାଦ ଠିଆ କରାଇଛନ୍ତି, ଯାହା ଏବେ ରାଜନୀତିକୁ ସରଗରମ କରିଛନ୍ତି । ଚନ୍ଦ୍ରଶେଖର କହିଥିଲେ ହିନ୍ଦୁ ଗ୍ରନ୍ଥ ରାମଚରିତ ମାନସକୁ ମନୁସ୍ମୃତି ଭଳି ଜାଳି ଦେବା ଦରକାର, କାରଣ ଏହା ସମାଜରେ ଜାତି ବିଭାଜନକୁ ପ୍ରୋତ୍ସାହିତ କରୁଛି । ପାଟନାର ନାଳନ୍ଦା ଓପନ ୟୁନିଭର୍ସିଟିର ୧୫ ତମ ଦିକ୍ଷାନ୍ତ ସମାରୋହରେ ଚନ୍ଦ୍ରଶେଖର ଏହି ଟିପ୍ପଣୀ ଦେଇଛନ୍ତି ।