ଦୁବାଇ,୭।୧୦ (ପି.ଟି.): ଭାରତ ତଥା ଦିଲ୍ଲୀ କ୍ୟାପିଟାଲ୍ସ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ମଙ୍କଡିଙ୍ଗ୍ ନେଇ ନିଜର ପ୍ରଥମ ଓ ଅନ୍ତିମ ଚେତାବନୀ ଦେଇଛନ୍ତି। ଦିଲ୍ଲୀ ଓ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମୁକାବିଲାରେ ଅଶ୍ୱିନ ପୁଣି ଥରେ ସମସ୍ତଙ୍କ ନଜରକୁ ଆସିଛନ୍ତି। ଏହି ମ୍ୟାଚ୍ରେ ଅଶ୍ୱିନ ଯେତେବେଳେ ବୋଲିଂ କରୁଥିଲେ ସେତେବେଳେ ବାଙ୍ଗାଲୋରର ଓପନର ଆରୋନ ଫିଞ୍ଚ୍ଙ୍କୁ ମଙ୍କଡିଙ୍ଗ୍ ଦ୍ୱାରା ଆଉଟ କରିବା ସୁଯୋଗ ଥିଲା। କିନ୍ତୁ ଅଶ୍ୱିନ ଫିଞ୍ଚ୍ଙ୍କୁ ମଙ୍କଡିଙ୍ଗ ନ କରି ଚେତାବନୀ ଦେଇ ଛାଡି ଦେଇଥିଲେ। ଉଲ୍ଲେଖଥାଉ କି, ବୋଲିଂ କରିବା ବେଳେ ନନ୍ ଷ୍ଟ୍ରାଇକର ଏଣ୍ଡରେ ଥିବା ବ୍ୟାଟ୍ସମ୍ୟାନ ବଲ୍ ପଡିବା ପୂର୍ବରୁ କ୍ରିଚ୍ରୁ କିଛି ବାଟ ଆଗକୁ ଚାଲିଯାଇଥାନ୍ତି। ଏହାର ସୁଯୋଗ ନେଇ ବୋଲର ଯଦି ସମ୍ପୃକ୍ତ ବ୍ୟାଟ୍ସମ୍ୟାନଙ୍କୁ ରନ୍ ଆଉଟ କରିନ୍ତି ତା’ହେଲେ ତାକୁ ମଙ୍ଗଡିଙ୍ଗ୍ କୁହାଯାଇଥାଏ। ଏବେ ଏ ନେଇ ଅଶ୍ୱିନଙ୍କ ଚେତାବନୀର ଯଥେଷ୍ଟ ଗୁରୁତ୍ୱ ରହିଛି।
ନନ୍ ଷ୍ଟ୍ରାଇକର ଏଣ୍ଡରେ ଥିବା ବ୍ୟାଟ୍ସମ୍ୟାନଙ୍କୁ ଅଶ୍ୱିନ ଟୁଇଟ୍ କରି ଚେତାବନୀ ଦେଇ କହିଛନ୍ତି ଯେ, ଭବିଷ୍ୟତରେ ସେ ଏଭଳି ପରିସ୍ଥିତିରେ ମଙ୍କ୍ଡିଙ୍ଗ୍ କରିବାକୁ ପଛାଇବେ ନାହିଁ। ତେଣୁ ଭବିଷ୍ୟତରେ ମୋତେ କେହି ଦୋଷ ଦେବେନାହିଁ।
ତେବେ ଆଇପିଏଲ୍ ଆରମ୍ଭ ହେବା ପୂର୍ବରୁ ଅଶ୍ୱିନଙ୍କୁ ଆଉ ମଙ୍କ୍ଡିଙ୍ଗ୍ କରିବାକୁ ସୁଯୋଗ ଦେବେ ନାହିଁ ବୋଲି ଦିଲ୍ଲୀ ହେଡ୍ କୋଚ୍ ରିକି ପଣ୍ଟିଂ କହିଥିଲେ। ଅଶ୍ୱିନ ମଧ୍ୟ ତାଙ୍କ କଥା ମାନି ମଙ୍କଡିଙ୍ଗ୍ କରି ନ ଥିଲେ। ଆଇପିଏଲ୍ର ଗତ ସଂସ୍କରଣରେ ରାଜସ୍ଥାନ ରୟାଲ୍ସ ତରଫରୁ ବ୍ୟାଟିଂ କରୁଥିବା ଜୋଶ ବଟଲରଙ୍କୁ ମଙ୍ଗଡିଙ୍ଗ୍ କରି ଆଉଟ କରିଥିଲେ। ଏହାକୁ ନେଇ ସେତେବେଳେ ବହୁତ ବିବାଦ ହୋଇଥିଲା। ଏପରିକି ଏହି ନିୟମକୁ ହଟାଇ ଦେବାକୁ ଦାବି ମଧ୍ୟ ହୋଇଥିଲା। ଏବେ କିନ୍ତୁ ଅଶ୍ୱିନ ଆଉ କାହାକୁ କ୍ଷମା କରିବେ ନାହିଁ ଓ ମଙ୍ଗଡିଙ୍ଗ୍ କରିବାକୁ ଆଦୌ ଦ୍ୱିଧା ଅନୁଭବ କରିବେ ନାହିଁ ବୋଲି ସ୍ପଷ୍ଟ କରିଛନ୍ତି।
