କୋଣାର୍କ, ୧୦ା୧୨(ଡି.ଏନ୍.ଏ.): ବିଶ୍ୱ ଐତିହ୍ୟ କୋଣାର୍କର ଗର୍ବ ଓ ଗୌରବ ହେଉଛି ସୂର୍ଯ୍ୟମନ୍ଦିର। ଏହାର ଐତିହ୍ୟ, ସ୍ଥାପତ୍ୟ ଓ କଳାସଂସ୍କୃତି ବିଶ୍ବରେ ଅନନ୍ୟ ଏବଂ ଅଦ୍ବିତୀୟ। ସୂର୍ଯ୍ୟ ମନ୍ଦିର ଓଡ଼ିଶାର ଅସ୍ମିତା ଓ ସଂସ୍କୃତିର ପ୍ରାଣକେନ୍ଦ୍ର। କେନ୍ଦ୍ର ସରକାରଙ୍କ ଅଧୀନ ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ (ଏଏସ୍ଆଇ) କର୍ତ୍ତୃପକ୍ଷ ଏହି ଐତିହ୍ୟସ୍ଥଳୀର ଗାରିମା ଓ କଳାକୃତିର ମର୍ଯ୍ୟାଦା ରଖିବା ପରିବର୍ତ୍ତେ ସୂର୍ଯ୍ୟ ମନ୍ଦିର ମୁଖଶାଳାରେ ଲଗାଇଥିବା ଲାଇଟ ଗାର ଗାର ହୋଇ ମନ୍ଦିର ଉପରେ ପଡ଼ୁଛି। ଫଳରେ ସୂର୍ଯ୍ୟମନ୍ଦିରର ଗରିମା ଓ ସଂସ୍କୃତିର ମର୍ଯ୍ୟାଦାହାନି ହେଉଛି ବୋଲି ଶୁକ୍ରବାର କୋଣାର୍କ ପରିଦର୍ଶନ ଅବସରରେ ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ମତବ୍ୟକ୍ତ କରିଛନ୍ତି। ପଟ୍ଟନାୟକ କହିଛନ୍ତି, ଦୂରରେ ଥାଇ ଦେଖିଲେ ଗାର ସଦୃଶ ଆଲୋକ ଯୋଗୁ ସୂର୍ଯ୍ୟମନ୍ଦିର ଏକ ଗେଟ୍ ଭଳି ଲାଗୁଛି, ଯାହା ଆମ ଗର୍ବ ଓ ଗୌରବର ଐତିହ୍ୟ ପ୍ରତି କୁଠାରଘାତ ସଦୃଶ। ସୂର୍ଯ୍ୟମନ୍ଦିର ଦାୟିତ୍ୱରେ ଥିବା ଏଏସ୍ଆଇ କର୍ତ୍ତୃପକ୍ଷ ଏବଂ ୟୁନେସ୍କୋ ଐତିହ୍ୟ ସୁରକ୍ଷା ଆଇନ ମୁତାବକ ଐତିହ୍ୟର ଗରିମା ବୃଦ୍ଧି ଲାଗି ସୁନ୍ଦର ଆଲୋକ ବ୍ୟବସ୍ଥା କରିବା ପରିବର୍ତ୍ତେ କଳାକୃତି ବିବର୍ଣ୍ଣ ହେବା ଭଳି ଲାଇଟ ବ୍ୟବହାର କରିବା ଓଡ଼ିଆ ଜାତିର ଅସ୍ମିତା ଓ ସଂସ୍କୃତି ପ୍ରତି ଏଏସ୍ଆଇର ବୈମାତୃକ ମନୋଭାବର ପରିଚାୟକ। ଏହି ଘଟଣାକୁ ନେଇ ସେ ସୂର୍ଯ୍ୟମନ୍ଦିର ଦାୟିତ୍ୱରେ ଥିବା କେନ୍ଦ୍ର ସରକାରଙ୍କ ଏଏତ୍ସ୍ଆଇ ମହାନିର୍ଦ୍ଦେଶକଙ୍କୁ ଟୂୁଇଟ୍ କରି ଏହି ଲାଇଟ ହଟାଇ ଐତିହ୍ୟ ଆଇନ ମୁତାବକ ଲାଇଟ ଲଗାଇ ସୂର୍ଯ୍ୟମନ୍ଦିର ଗାରିମା ବୃଦ୍ଧି କରିବା ପାଇଁ ପଟ୍ଟନାୟକ ଦାବି କରିଛନ୍ତି।