ଭଦ୍ରକ ଅଫିସ, ୨୦।୬: ଜଣେ ଯୁବକଙ୍କୁ ମଦ ମାଗୁଥିବା ନେଇ ଭିଡିଓ ଭାଇରାଲ ପରେ ଭଦ୍ରକ ଟାଉନ ଥାନାର ଏଏସ୍ଆଇ ବୀରଭଦ୍ର ବେହେରାଙ୍କୁ ସସ୍ପେଣ୍ଡ କରିଛନ୍ତି ଏସ୍ପି ଚରଣ ସିଂ ମୀନା। କିଛି ଦିନ ତଳେ ଏଏସ୍ଆଇ ବେହେରା ଥାନାର ଅନ୍ୟ ଜଣେ କର୍ମଚାରୀଙ୍କ ସହ ମିଶି ଜଣେ ଯୁବକଙ୍କୁ ମଦ ପାଇଁ ଅଶ୍ଳୀଳ ଭାଷାରେ ଗାଳି କରିଥିଲେ, ଯାହାର ଭିଡିଓ ଭାଇରାଲ ହୋଇଥିଲା। ଏହି ଭିଡିଓ ଭାଇରାଲ କରିଥିବା ନେଇ ଏଏସ୍ଆଇ ବେହେରା ଉକ୍ତ ଯୁବକଙ୍କୁ ଧମକାଉଥିବାର ଆଉ ଏକ ଅଡିଓ ମଧ୍ୟ ଏବେ ଭାଇରାଲ ହୋଇଛି। ଏ ନେଇ ଟାଉନ ପୋଲିସ ପକ୍ଷରୁ କୌଣସି ଅଧିକାରୀଙ୍କ ପ୍ରତିକ୍ରିୟା ମିଳିପାରି ନାହିଁ।