ନୂଆଦିଲ୍ଲୀ, ୯।୭(ପି.ଟି.)- ଆସନ୍ତା ସେପ୍ଟେମ୍ବରରେ ହେବାକୁଥିବା ଏସିଆ କପ୍ କ୍ରିକେଟ ଟୁର୍ନାମେଣ୍ଟ ବାତିଲ ହୋଇଛି ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ସଭାପତି ସୌରଭ ଗାଙ୍ଗୁଲି ବୁଧବାର ପ୍ରକାଶ କରିଛନ୍ତି। ”ଏସିଆ କପ୍ କ୍ୟାନସଲ ହୋ ଚୁକା ହୈ, ଯୋ ସେପ୍ଟେମ୍ବରେ ଥା“ ବୋଲି ସ୍ପୋଟର୍ସ ଟକ୍ ସହିତ ଏକ ଇନ୍ଷ୍ଟାଗ୍ରାମ ଲାଇଭ୍ ସେସନ ଅବସରରେ ଗାଙ୍ଗୁଲି ପ୍ରକାଶ କରିଛନ୍ତି। ପାକିସ୍ତାନ ଏହି ପ୍ରତିଯୋଗିତାର ଆୟୋଜନ ଅଧିକାର ପାଇଥିଲେ ହେଁ ଏହା ୟୁଏଇରେ ହେବା ସମ୍ଭାବନା ଥିଲା। କୋଭିଡ୍-୧୯ ସଂକ୍ରମଣ ଯୋଗୁ ଆସନ୍ତା ଅକ୍ଟୋବର-ନଭେମ୍ବରରେ ଟି୨୦ ବିଶ୍ୱକପ ହେବା ସମ୍ଭାବନା କ୍ଷୀଣ। ଏବେ ଏସିଆ କପ୍ ବାତିଲ ହୋଇଥିବାରୁ ବିସିସିଆଇ ଏହି ସମୟ ମଧ୍ୟରେ ଇଣ୍ଡିଆନ ପ୍ରିମିୟର ଲିଗ୍ ଆୟୋଜନ କରିବା ସମ୍ଭାବନା ଦୃଢ଼ ହୋଇଛି।