ନୂଆଦିଲ୍ଲୀ,୧୦।୭: ଚଳିତ ବର୍ଷ ଏସିଆକପ୍ କ୍ରିକେଟ ଟୁର୍ନାମେଣ୍ଟ ସ୍ଥଗିତ ରହିବା ସ୍ପଷ୍ଟ ହୋଇଛି। ଏହି ଟୁର୍ନାମେଣ୍ଟ ଆସନ୍ତାବର୍ଷ ଜୁନ୍ରେ ଆୟୋଜନ କରିବାକୁ ଯୋଜନା ହେଉଛି ଓ ଏଥିପାଇଁ ଓ୍ବେଣ୍ଡୋ ଖାଜା ଯାଉଛି ବୋଲି ଏସିଆନ୍ କ୍ରିକେଟ କାଉନସିଲ (ଏସିସି) ତରଫରୁ କୁହାଯାଇଛି।
ଏହି ଟୁର୍ନାମେଣ୍ଟ ଚଳିତ ବର୍ଷ ସେପ୍ଟେମ୍ବରରେ ପାକିସ୍ତାନରେ ଆୟୋଜନ ହେବାର କାର୍ଯ୍ୟକ୍ରମ ଥିଲା। ତେବେ ଏହାକୁ ନିରପେକ୍ଷ ଭେନ୍ୟୁରେ ଆୟୋଜନ କରିବାର କାର୍ଯ୍ୟକ୍ରମ ଥିଲା। କିନ୍ତୁ କୋଭିଡ୍-୧୯ ମହାମାରୀ କାରଣରୁ ଟୁର୍ନାମେଣ୍ଟକୁ ଏଥର ସ୍ଥଗିତ ରଖାଯାଇଛି। ଏ ନେଇ ମଧ୍ୟ ଏସିସି ସ୍ପଷ୍ଟିକରଣ ମଧ୍ୟ ଦେଇଛି। ଯାତ୍ରାକୁ ନେଇ କଟକଣା, କ୍ୱାରାଣ୍ଟାଇନ୍କୁ ନେଇ ନିୟମ, ବିଶ୍ୱରେ ଦେଖା ଦେଇଥିବା ସ୍ବାସ୍ଥ୍ୟ ସଙ୍କଟ, ସାମାଜିକ ଦୂରତ୍ୱକୁ ନେଇ ବିଭିନ୍ନ ସମସ୍ୟା ରହିଛି। ଏପରିସ୍ଥଳେ ଟୁର୍ନାମେଣ୍ଟ ଆୋୟାଜନ କରିବା ଏକ ବଡ଼ ଚ୍ୟାଲେଞ୍ଜ୍ ବୋଲି ଏସିସି ତରଫରୁ କୁହାଯାଇଛି। କେବଳ ସେତିକି ନୁହଁ ଟୁର୍ନାମେଣ୍ଟରେ ଭାଗ ନେବାକୁ ଥିବା ଖେଳାଳି, ସପୋର୍ଟ ଷ୍ଟାଫ୍, କମର୍ସିଆଲ ପାର୍ଟନର, ପ୍ରଶଂସକ ଓ ସାରା କ୍ରିକେଟ ଜଗତ ସ୍ବାସ୍ଥ୍ୟ ଜନିତ ସୁରକ୍ଷା ଓ ନିରାପତ୍ତା ମଧ୍ୟ ଏକ ବଡ଼ ସମସ୍ୟା ରୂପେ ଉଭା ହୋଇଛି। ସମ୍ପୂର୍ଣ୍ଣ ନିରାପତ୍ତା ମଧ୍ୟରେ ଟୁର୍ନାମେଣ୍ଟ ଆୟୋଜନ କରିବାକୁ ପ୍ରାଥମିକତା ଦେଉଛୁ। ତେଣୁ ୨୦୨୧ ଜୁନ୍ରେ ଟୁର୍ନାମେଣ୍ଟ ଆୟୋଜନ କରିବାକୁ ଯୋଜନା ନେଇଛୁ ବୋଲି ଏସିସି କହିଛି। ଇତିମଧ୍ୟରେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଅଷ୍ଟ୍ରେଲିଆରେ ଆସନ୍ତା ଅକ୍ଟୋବର- ନଭେମ୍ବରରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ର ଭବିଷ୍ୟତ ନେଇ ନିଷ୍ପତ୍ତି ନେବ ବୋଲି ଆଶା କରାଯାଉଛି। ତେଣୁ ସବୁ ପ୍ରକାର ସ୍ଥିତିକୁ ନେଇ ଏସିସି ଏହି ନିଷ୍ପତ୍ତି ନେଇଛି ବୋଲି କୁହାଯାଉଛି।
