ଜେନେଭା, ୨୪।୪: ଜଳବାୟୁ ପରିବର୍ତ୍ତନର ପ୍ରଭାବ ଉପରେ ସାରା ବିଶ୍ୱର ନଜର ରହିଛି। ତେବେ ଗତ କିଛି ବର୍ଷ ଧରି ଏହାର ସର୍ବାଧିକ ପ୍ରଭାବ ବିଭିନ୍ନ ଏସୀୟ ଦେଶ ଉପରେ ପଡ଼ୁଥିବା ବିଶ୍ୱ ପାଣିପାଗ ସଂଗଠନ(ଡବ୍ଲ୍ୟୁଏମ୍ଓ) ସ୍ପଷ୍ଟ କରିଛି। ଗତବର୍ଷ ଏସିଆ ବିଶ୍ୱର ସବୁଠାରୁ ବିପର୍ଯ୍ୟୟ ପ୍ରଭାବିତ ମହାଦେଶ ହୋଇଥିବା ଡବ୍ଲ୍ୟୁଏମ୍ଓର ‘ଷ୍ଟେଟ ଅଫ୍ ଦି କ୍ଲାଇମେଟ୍ ଇନ୍ ଏସିଆ-୨୦୨୩’ ରିପୋର୍ଟରେ ପ୍ରକାଶ ପାଇଛି। ବନ୍ୟା, ବାତ୍ୟା, ଭୂକମ୍ପ, ମରୁଡ଼ି ଆଦି କାରଣରୁ ଗତ କିଛି ବର୍ଷ ଧରି ଏସିଆ ମହାଦେଶ ବହୁଳ ଭାବେ କ୍ଷତିଗ୍ରସ୍ତ ହେବା ସହ ଏଠାରେ ଅନେକ ସଂଖ୍ୟାରେ ଲୋକଙ୍କର ପ୍ରାଣହାନି ଘଟୁଛି। ଉତ୍ତର-ପଶ୍ଚିମ ପ୍ରଶାନ୍ତ ମହାସାଗରରେ ଜଳର ତାପମାତ୍ରା ରେକର୍ଡ ସ୍ତରକୁ ବଢିବାକୁ ଲାଗିଛି। ସେହିପରି ଆର୍କଟିକ ଅଞ୍ଚଳରେ ମଧ୍ୟ ସାମୁଦ୍ରିକ ଗରମ ପବନ ପ୍ରବାହିତ ହେଉଛି। ଏହି କାରଣରୁ ଗତବର୍ଷ ଏସିଆ ମହାଦେଶର ଅଧିକାଂଶ ଦେଶରେ ରେକର୍ଡ ସ୍ତରର ତାତି ଅନୁଭୂତ ହୋଇଥିବା ଡବ୍ଲ୍ୟୁଏମ୍ଓ ମୁଖ୍ୟ ସେଲେଷ୍ଟେ ସାଉଲୋ ବୟାନ ଦେଇଛନ୍ତି। ଜଳବାୟୁ ପରିବର୍ତ୍ତନ ଯୋଗୁ ବିଭିନ୍ନ ଏସୀୟ ଦେଶରେ ବିପର୍ଯ୍ୟୟର ପରିମାଣ ବହୁଗୁଣିତ ହୋଇଥିବା ସେ କହିଛନ୍ତି। ଫଳରେ ଏହି ସବୁ ଦେଶଗୁଡ଼ିକୁ ଆର୍ଥିକ କ୍ଷତି ସହିବାକୁ ପଡ଼ୁଥିବାବେଳେ ଏଠାରେ ପରିବେଶର ସ୍ତର ନିମ୍ନଗାମୀ ହୋଇଚାଲିଛି। ଡବ୍ଲ୍ୟୁଏମ୍ଓର ଏହି ରିପୋର୍ଟ ଅନୁଯାୟୀ ଗତବର୍ଷ ଏସିଆ ମହାଦେଶରେ ୭୯ଟି ପ୍ରାକୃତିକ ବିପର୍ଯ୍ୟୟ ଘଟିଥିବାବେଳେ ଏଥିରେ ୨୦୦୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିଲା। ସେହିପରି ଗତବର୍ଷ ପ୍ରାକୃତିକ ବିପର୍ଯ୍ୟୟ ଯୋଗୁ ଏଠାରେ ୭୦ ଲକ୍ଷରୁ ଅଧିକ ଲୋକ କ୍ଷତିଗ୍ରସ୍ତ ହୋଇଥିଲେ। ତେବେ ଏଥିମଧ୍ୟରୁ ୮୦ ପ୍ରତିଶତ ବିପର୍ଯ୍ୟୟ କେବଳ ବନ୍ୟା ଓ ବାତ୍ୟା ଦ୍ୱାରା ହୋଇଥିବା ରିପୋର୍ଟରେ ପ୍ରକାଶ ପାଇଛି। ବିଭିନ୍ନ ଏସୀୟ ଦେଶରେ ଗତବର୍ଷ ତାପମାତ୍ରା ମଧ୍ୟ ବୃଦ୍ଧି ପାଇଥିଲା। ୧୯୯୧ରୁ ୨୦୨୦ ମଧ୍ୟରେ ରହିଥିବା ହାରାହାରି ତାପମାତ୍ରାଠାରୁ ଗତବର୍ଷ ଏଠାକାର ତାପମାତ୍ରା ୦.୯୧ ଡିଗ୍ରୀ ସେଲସିୟସ ଅଧିକ ଥିଲା। ସେହିପରି ୧୯୬୧ରୁ ୧୯୯୦ ପର୍ଯ୍ୟନ୍ତ ରହିଥିବା ହାରାହାରି ତାପମାତ୍ରାଠାରୁ ଗତବର୍ଷ ଏଠାକାର ତାପମାତ୍ରା ୧.୮୭ ଡିଗ୍ରୀ ସେଲସିୟସ ଅଧିକ ଥିଲା।