ଦୁବାଇ, ୨୭।୫(ପି.ଟି.)- ତିନି ମହିଳାଙ୍କୁ ମିଶାଇ ଭାରତର ଆଉ ୫ ବକ୍ସର ଏଠାରେ ଚାଲିଥିବା ଏସିଆନ ବକ୍ସିଂ ଚାମ୍ପିୟନଶିପ୍ରେ ପଦକ ନିଶ୍ଚିତ କରିଛନ୍ତି। ଏହି ବକ୍ସରମାନେ ପ୍ରଭାବୀ ପ୍ରଦର୍ଶନ କରି ସେମିଫାଇନାଲରେ ପ୍ରବେଶ କରିଛନ୍ତି। ଫଳରେ ଭାରତ ଏହି ପ୍ରତିଯୋଗିତାରୁ ଅତିକମ୍ରେ ୧୩ଟି ପଦକ ପାଇବା ନିଶ୍ଚିତ ହୋଇଛି। ବୁଧବାର ଅନୁଷ୍ଠିତ ଲଢ଼େଇରେ ବିଜୟ ହାସଲ କରିଥିବା ଭାରତୀୟମାନେ ହେଲେ ଗତଥରର ଚାମ୍ପିୟନ ତଥା ଅଲିମ୍ପିକ୍ସ ଯୋଗ୍ୟତା ହାସଲକାରୀ ଅମିତ ପଙ୍ଘାଲ (୫୨ କେଜି), ସଞ୍ଜିତ (୯୧ କେଜି), ସାକ୍ଷୀ (୫୪ କେଜି), ଜସ୍ମିନ (୫୭ କେଜି) ଓ ଅଲିମ୍ପିକ ଯୋଗ୍ୟତା ହାସଲକାରୀ ସିମରନଜିତ କୌର(୬୦ କେଜି)। ମଙ୍ଗଳବାର ଶିବା ଥାପ୍ପା (୬୪ କେଜି) ମଧ୍ୟ କ୍ୱାର୍ଟର ଫାଇନାଲ ଜିତି ସେମିଫାଇନାଲରେ ପହଞ୍ଚତ୍ଥିଲେ।
ମଙ୍ଗୋଲିଆର ଖାର୍ଖୁ ଏଙ୍ଖମାନ୍ଦାଖଙ୍କଠାରୁ କଡ଼ା ଚ୍ୟାଲେଞ୍ଜ ପାଇଥିଲେ ହେଁ ବିଶ୍ୱ ଚାମ୍ପିୟନଶିପ୍ ରୌପ୍ୟ ପଦକ ବିଜେତା ତଥା ଗତଥରର ଚାମ୍ପିୟନ ପଙ୍ଘାଲ ଶେଷରେ ୩-୨ରେ ବିଜୟୀ ହେବାରେ ସକ୍ଷମ ହୋଇଥିଲେ। ଜୋର୍ଡାନର ଅମନଠାରେ ଅନୁଷ୍ଠିତ ୨୦୨୦ ଏସିଆନ ଅଲିମ୍ପିକ୍ କ୍ୱାଲିଫାୟରରେ ମଧ୍ୟ ପଙ୍ଘାଲ କଡ଼ା ଚ୍ୟାଲେଞ୍ଜର ସମ୍ମୁଖୀନ ହୋଇ ବିଜୟ ହାସଲ କରିଥିଲେ। ଇଣ୍ଡିଆ ଓପନ ସ୍ବର୍ଣ୍ଣ ପଦକ ବିଜେତା ସଞ୍ଜିତ ତାଜିକସ୍ତାନର ଜାସୁର କୁର୍ବୋନୋଭଙ୍କୁ ୫-୦ରେ ହରାଇ ଏସିଆନ ଚାମ୍ପିୟନଶିପ୍ର ସେମିଫାଇନାଲରେ ପ୍ରବେଶ କରିଥିଲେ। ତାଙ୍କ ପରବର୍ତ୍ତୀ ପ୍ରତିଦ୍ୱନ୍ଦ୍ୱୀ ହେଉଛନ୍ତି ଗତଥରର ରୌପ୍ୟ ପଦକ ବିଜେତା ଉଜବେକିସ୍ତାନର ସାଞ୍ଜାର ତୁର୍ସୁନୋଭ। ଚଳିତ ବର୍ଷ ସେ ତୃତୀୟ ସିଡ୍ର ମାନ୍ୟତା ପାଇଛନ୍ତି। ମହିଳା ବିଭାଗ ଲଢ଼େଇରେ ତାଜିକସ୍ତାନର ରୁହାଫ୍ଜୋ ହକ୍ଜାରୋଭାଙ୍କୁ ସାକ୍ଷୀ ୫-୦ରେ ହରାଇ ନିଜ ଦକ୍ଷତା ଦେଖାଇଛନ୍ତି। ପରବର୍ତ୍ତୀ ପର୍ଯ୍ୟାୟରେ ସେ କାଜାଖସ୍ତାନର ଦିନା ଝୋଲାମାନଙ୍କୁ ଭେଟିବା ପଥ ପରିଷ୍କାର କରିଛନ୍ତି। ମଙ୍ଗୋଲିଆର ଓନ୍ସେସେଗ୍ ୟେସୁଗେନଙ୍କୁ ୪-୧ରେ ହରାଇଥିବା ଜସ୍ମିନ ସେମିଫାଇନାଲରେ କାଜାଖସ୍ତାନର ଭ୍ଲାଡିସ୍ଲାଭ କୁଖତାଙ୍କୁ ଭେଟିବେ। ସେହିପରି ନିକଟରେ କୋଭିଡ୍-୧୯ରୁ ଆରୋଗ୍ୟଲାଭ କରିଥିବା ସିମରନଜିତ ଉଜ୍ବେକିସ୍ତାନର ରିଖୋନା କୋଡିରୋଭାଙ୍କୁ ୪-୧ରେ ପରାସ୍ତ କରିଛନ୍ତି। ସେମିଫାଇନାଲରେ ସେ କାଜାଖସ୍ତାନର ରିମା ଭୋଲୋସେଙ୍କୋଙ୍କ ସହ ମୁକାବିଲା କରିବେ।
ପୂର୍ବରୁ ବିକାଶ କ୍ରିଷ୍ଣନ (୬୯ କେଜି) ଓ ଆଶିଷ କୁମାର (୭୫ କେଜି) ବିଜୟ ସହ ସେମାନଙ୍କ ଅଭିଯାନ ଆରମ୍ଭ କରିଛନ୍ତି। ଅନ୍ୟ ଭାରତୀୟଙ୍କ ମଧ୍ୟରେ ଏସିଆନ ଚାମ୍ପିୟନ ବିକାଶ କ୍ରିଷ୍ଣନ ଇରାନର ମୋସଲେମ ମାଲାମିର, ଗତ ସଂସ୍କରଣର ରୌପ୍ୟ ପଦକ ବିଜେତା ଆଶିଷ ବିଶ୍ୱ ଚାମ୍ପିୟନଶିପ୍ ଏବଂ ଏସିଆନ ଗେମ୍ସ ସିଲଭର ମେଡାଲିଷ୍ଟ କାଜାଖସ୍ତାନର ଅବିଖାନ ଅମନକୁଲଙ୍କ ସହିତ ଲଢ଼େଇରେ ଅବତୀର୍ଣ୍ଣ ହେବେ।
