ଦୁବାଇ, ୨୯।୫(ପି.ଟି.)-
ଏଠାରେ ଚାଲିଥିବା ଏସିଆନ ବକ୍ସିଂ ଚାମ୍ପିୟନଶିପ୍ର ଫାଇନାଲରେ ଭାରତର ସାକ୍ଷୀ ଚୌଧାରୀ (୫୪ କେଜି) ରିଭ୍ୟୁରେ ଲଢ଼େଇ ହାରି ଯାଇଛନ୍ତି। ମହିଳା ବାଣ୍ଟମଓ୍ବେଟ ୫୪ କେଜି ଲଢ଼େଇ ପରେ ସାକ୍ଷୀ ୩-୨ରେ ବିଜୟ ହାସଲ କରିଥିବା ରେଫରି ଘୋଷଣା କରିଥିଲେ। ମାତ୍ର ତାହାକୁ ପ୍ରତିଦ୍ୱନ୍ଦ୍ୱୀ କାଜାଖସ୍ତାନର ଦିନା ଝୋଲାମାନ ଚ୍ୟାଲେଞ୍ଜ କରିଥିଲେ। ପରେ ଫଳାଫଳ ଓଲଟି ଯାଇଥିଲା। ଅଫିସିଆଲ ରେଜଲ୍ଟ ଶିଟ୍ରେ ଝୋଲାମାନ ୩-୨ରେ ବିଜୟୀ ହୋଇଥିବା ଘୋଷଣା ହୋଇଥିଲା। ଏସିଆନ ବକ୍ସିଂ କନ୍ଫେଡେରେଶନ ପକ୍ଷରୁ ଏହା ସ୍ପଷ୍ଟ କରାଯାଇଛି।
ସାକ୍ଷୀଙ୍କ ସପକ୍ଷରେ ରେଫରି ଫଳାଫଳ ଘୋଷଣା କରିବା ପରେ କାଜାଖ ଟିମ୍ ୩ୟ ରାଉଣ୍ଡକୁ ରିଭ୍ୟୁ ପାଇଁ ଆବେଦନ କରିଥିଲା। ଏହି ରାଉଣ୍ଡରେ ତାଙ୍କ ବକ୍ସରଙ୍କ ସପକ୍ଷରେ ପଏଣ୍ଟ ଆସିବା କଥା ବୋଲି ସେମାନେ ଅନୁଭବ କରିଥିଲେ। ରିଭ୍ୟୁ ସମୟରେ ଜୁରି ସଦସ୍ୟମାନେ ସେମାନଙ୍କ ଭୁଲ ବୁଝିପାରିଥିଲେ ଏବଂ ଫଳାଫଳକୁ ଓଲଟାଇବାକୁ ବାଧ୍ୟ ହୋଇଥିଲେ। ଅନ୍ତର୍ଜାତୀୟ ବକ୍ସିଂ ଆସୋସିଏଶନ (ଏଆଇବିଏ) ପକ୍ଷରୁ ବାଉଟ୍ (ଲଢ଼େଇ) ରିଭ୍ୟୁ ସିଷ୍ଟମ୍ ୨୦୧୯ରେ ପ୍ରଣୟନ କରାଯାଇଥିଲା। ”ଏହି ଲଢ଼େଇ ଅତ୍ୟନ୍ତ ସଂଘର୍ଷପୂର୍ଣ୍ଣ ହୋଇଥିଲା। ମାତ୍ର ଫଳାଫଳ ଓଲଟିଯିବା ପରେ ସାକ୍ଷୀ ଖୁବ୍ ଭାଙ୍ଗି ପଡ଼ିଥିଲେ। ମାତ୍ର ସେ ଜଣେ ଯୁବ ବକ୍ସର। ୨୦୨୪ ଅଲିମ୍ପିକ୍ସକୁ ଫୋକସ୍ କରିବା ପାଇଁ ମୁଁ ତାଙ୍କୁ ପରାମର୍ଶ ଦେଇଥିଲି। ପରେ ସେ ହାଲୁକା ଅନୁଭବ କରୁଛନ୍ତି“ ବୋଲି ଭାରତୀୟ ମହିଳା ବକ୍ସିଂ ହାଇ ପରଫରମାନ୍ସ ନିର୍ଦ୍ଦେଶକ ରାଫେଲ ବେର୍ଗାମାସ୍କୋ ପ୍ରକାଶ କରିଛନ୍ତି। କୌଣସି ଲଢ଼େଇରେ ପରାଜିତ ବକ୍ସରଙ୍କ ଟିମ୍ ମ୍ୟାନେଜର କିମ୍ବା ମୁଖ୍ୟ କୋଚ୍ ଫଳାଫଳ ଘୋଷଣାର ୧୫ ମିନିଟ ମଧ୍ୟରେ ନିଷ୍ପତ୍ତିକୁ ଚ୍ୟାଲେଞ୍ଜ କରିପାରିବେ। କାଗଜପତ୍ର ପ୍ରସ୍ତୁତ କରିବାକୁ ସେମାନଙ୍କୁ ଆଉ ୩୦ ମିନିଟ ସମୟ ଦିଆଯିବ। ତେବେ ଫଳାଫଳ ଯଦି ୫-୦ କିମ୍ବା ୪-୧ ରହିଥାଏ ତେବେ ରିଭ୍ୟୁ ପାଇଁ ଆବେଦନ ହୋଇପାରିବ ନାହିଁ। ”କୌଣସି ପକ୍ଷ ଆବେଦନ କଲେ ବୈଷୟିକ ପ୍ରତିନିଧିମାନେ ବାଉଟ୍ ରିଭ୍ୟୁ ଜୁରିଙ୍କ ସହ ଆଲୋଚନା ପରେ ଏହା ରିଭ୍ୟୁ ପାଇଁ ଉପଯୁକ୍ତ କି ନୁହେଁ ତାହା ନିଷ୍ପତ୍ତି ନିଅନ୍ତି। ସେମାନଙ୍କର ହୃଦୟଙ୍ଗମ ହେଲେ ଜୁରି, ପର୍ଯ୍ୟବେକ୍ଷକ, ରେଫରି ଏବଂ ଜଜ୍ ମୂଲ୍ୟ ନିର୍ଦ୍ଧାରକଙ୍କ ଦ୍ୱାରା ବାଉଟ ରିଭ୍ୟୁ ହୋଇଥାଏ ବୋଲି ଏଆଇବିଏ ପକ୍ଷରୁ ପ୍ରକାଶ କରାଯାଇଛି। ଜୁରିଙ୍କ ନିଷ୍ପତ୍ତି ନିର୍ବିବାଦୀୟ ଏବଂ ଚୂଡ଼ାନ୍ତ ହୋଇଥାଏ। ପ୍ରକାଶଯୋଗ୍ୟ ଯେ, ୬ ଥର ବିଶ୍ୱ ଚାମ୍ପିୟନ ଭାରତର ଏମ୍.ସି. ମେରୀ କମ୍ (୫୧ କେଜି), ଲାଲବୁଆସାଇ (୬୪ କେଜି), ପୂଜା ରାଣୀ (୭୫ କେଜି) ଏବଂ ଅନୁପମା (+୮୧ କେଜି) ଫାଇନାଲରେ ପ୍ରବେଶ କରିଛନ୍ତି।